本來心想一單應該不會太複雜的做卡既事,竟然要折騰咁耐,對這個地方長了不少知識之餘更測試自己的耐性可以有幾強大。
故事自 2015 年 10 月開展,當時認知以為落地移民如暫不打算長住沒需要建立“居住關係”(包括開銀行戶口,永久居民卡(楓葉卡),社會保障號碼(大陸人俗稱呢張叫“工卡”,因爲主要係搵工報稅拿福利用),租屋等),以免引伸稅務問題。所以沒有多加思索,決定去一趟溫哥華當做一次旅行,登陸確認身份而已。
問題一直沒有浮現,直到今年 5 月決定去長住.....
完成人生 bucket list一件事,就係搭船横越太平洋,經溫哥華轉機到多倫多,再落紐約跟大學同學聚舊,meet up 吓多倫多 bnb 既屋主(佢人係住 nyc, 多倫多間屋就出租)後,心想要玩已經玩夠,要做正經事。回多市第二天去 City Hall 的 Service Canada 做工卡然候準備搵工。
當日大約早上10點左右,Service Canada 人不多,門口接待既係一個華裔服務員,交上15年已確認既移民紙,護照之類既證明文件。佢睇左一陣,同我地講因爲已經登陸超過一年,不能再用來作證明而必需要楓葉卡。Fine,“但我有更新的移民簽證而且係未過期喔”。他看了看然後一句 “No” 落閘,而且表情上好似我地阻住佢收工玩手機(大佬返緊工喔,中午都未過)??最後只好帶住滿腦疑問白行一趟後返屋企。
經過一倫資料搜集發現工卡真係如佢所講有一年限期呢回事,而且楓葉卡要重新申請(本來15年第一次抵達時移民官會幫忙申請而且免費,因當時沒有打算長住也沒有地址可提供寄卡所以作罷),每人50加紙,重填完整申請表,寄去大西洋省 Nova Scotia 統一處理。可以用錢解決既問題都唔算問題,錢?俾咯,影20加紙兩大張證件相?OK咯,用快郵寄件?都俾,但一睇到需要處理時間要61日心頓時一沉, WTF!
等待期還算OK,返正定居要做既事未完成(搵 condo,考車,買家私之類),邊做邊等。如是者,搵到市中心新居,認識附近環境,再而考到車牌,家私廚具齊全..... 無錯!搬新屋要注意所有信件要轉去新地址,好在以前係美國讀書都有所聞北美郵政系統係可以做郵件轉送(舊居郵件係限定時間內轉發新地址之類),呢方面不用多加研究。但為安全計還是通知移民部更新 profile為上:上網改?ok,無問題,但回覆係話15年既申請因爲已過 180 日所以要重新申請(無L嘢阿嘛?15年有申請過?)。後來經多方研究相信15年第一次抵達係會自動開 profile所以會有咁既回覆,但,我已經重新遞表申請楓葉卡,咁我份申請去左邊?OK,FINE,打電話問,經過漫長的 40 分鐘等待,Agent 回覆可能收到但未處理。“咁我可以更新地址掛?””得”。
8月頭,天氣比往年同時熱。沒有冷氣只有風扇的日子對我來說還可以,畢竟以前係美國有同樣情況,但阿太就鬼曬咁嘈。“香港到處吹冷氣其實係唔正常”,“未過30度都算係咁”,“地球唔會咁暖化啊”深知其實多倫多一年裏覺得熱的日數不多,我唯有講呢啲。
一天,就如平常去地下大堂開郵箱,赫然發現有一封雞皮紙公文袋“難道張卡搞掂?”一拆之下,發現整份申請退回,心情即時掉落谷底。再細心睇,原來有一封信說明我們的照片不附規格,但無再詳細講係點唔得。回家再次量度要求其實也沒有發現有任何明顯的不妥當,只是說明信寫明最少其中一張照片需要有照相地址印(當時其實兩張照片都有印)。沒有任何其他來源幫助下只好再求教印度人的討論區,發現其實類似問題其實常見,建議再去補拍另外兩張再重新投遞。
這一次決定搵另外一間照證件相片舖,幫我們照的是一個黑人,只有兩個字形容這人:專業。燈光是 studio 級,為左燈光均勻照的時後要求我們拿反光板放係大腿上。還仔細研究臉上會否有過份油光,頭同白底邊緣突出既頭髮絲也會用 Photoshop 執走,而且印相前再三確認頭,外框呎吋。並且解釋3-4張相裏面哪一幅最好。
上回講到照片重拍,打算再將退回既所有文件再校對一次然後寄出。問題來了,申請表上報的地址是bnb舊居,應不應該改成現址?我的申請表還好只戳有當初收件日期,但家人的除此外竟然有一張有 Bar Code 有號碼的貼紙。“難道我們的申請已經在進行?”“如果現在亂改會不會跟他系統裏的資料不一致?”最後決定反正我們曾經打過電話改過地址,待他們收到後再確認一次應改ok。就這樣將新照片和原有文件再寄出(當然又是快郵,盛惠$30 多加紙)
相比下,感覺上第二次的等待的過程比退件前來得漫長,因爲第一次是理所當然的預算時間,第二次反而多了很多看上去不確定的因素:照片,貼紙,是否需要再更新出國記錄之類(上回有提及其實我們曾經去了NYC幾天)。“如果因這些問題再退回那怎辦?2個月然後再2個月然後....?”與其終日胡亂猜度,不如再求教討論區的印度大神們。他們俾既答案其實不太重要,因該做的已經做得妥當,開眼界的反而係佢地啲個案千奇百怪:有因照片問題退回兩次以上,有的人在國外想在國外拍照想手寫照相館資料扮人係國內,也有人等待了差不多10個月沒有任何回音而手上的存款用得八八九九的發洩文...
講起印度人,有些他們實際上既行爲習慣我真的不敢恭維,但他們其實心底裏大都願意幫助其他人的。他們大多都會放他們自己申請的各樣證件的 timeline(哪個時候收到甚麽,進展之類)俾其他等待既同學們一個 reference。現實上,我們也曾經造訪過 YMCA 做一種移民語言與技術評估,當時接待我們的 counseller 也是一名印度大神,給我們某啲建議其實都幾貼地同掏心講佢心底話,呢度唔再詳細講。
過了9月,天氣算係快速轉冷,與我當初的估算大致應驗。10月頭既一個早上,我倆突然接到移民部的電郵說明申請收到,立時放下心頭大石(因以其他人經驗跟估算文件上應該全部接受,不會出現退第二次件既情況)咁地址方面又點?決定再打電話去問吓
移民部 Agent 姐姐們,當然,真人接聽前要先按一堆選項(好似打機“chok”秘技咁以離開錄音迷宮,呢招相信香港人非常熟悉),然候再等40幾分鐘排隊已是常識。
經過一輪身份確認後,Agent 話原來卡已批仲要已寄,不過係舊地址!(唔係已經曾經打電話更新過?果時除了心裏壓住大大個個“X”字就沒有其他)Agent 氣定神閒,問
“咁係咪要更新住址?”
”係,咁仲想問吓如果寄去舊地址咁點?”
“你可以用郵局轉寄”
“我知道,但我想確認吓係咪封信有”Do-not-forward”印,因爲咁係唔可以轉寄喔”
“你要問返郵局”
“但係信封係移民部,有寫無寫“Do-not-forward”唔關佢地事.....”
“你要問郵局.... 你要問郵局.... 你要問郵局.... You have to check with Canada Post!”
好嘢!做錯嘢之餘應對問題仲可以9唔搭8,投訴無門,真可以吹佢地唔漲。
多謝你,好好的分享。
咁是否打算暫時(例如2年內)不會長住,都應該在 Land 後攞埋 PR card 同 SIN 先離開加拿大? 仲有無其他要拎埋? 攞晒呢D一般要預幾多時間?
謝謝!