18/1更新
由我實行左呢個方法之後,本來我同我老公最多係零晨5點起身,有時抱佢一陣佢會瞓下,有時佢發晒癲就比少少佢食,等佢滿足下。
但自從有一日佢去左人地屋企過左一個下午,佢就打回原形,每晚醒兩次。但就算比足150ml, 佢都會飲唔晒就瞓左。
琴日佢0100佢醒一醒,比奶咀佢又瞓過,之後0230左右又醒,果轉比左100ml佢(平時飲開150ml),佢就繼續瞓到今朝0430左右,抱佢一陣,比奶咀佢,又可以瞓到0530, 之後抱住佢,瞓到0600左右,見佢瞓淋左,又放返低,過多廿幾分鐘,佢又喊。抱多一陣,換下片,見到已經0645,就比奶佢飲。
半夜喊,比我覺得似下慣性喊多過肚餓喊,最起碼0100果轉,佢好準時就喊,所以企圖唔比奶佢,拍下佢等佢瞓。
我地唔會用由得佢喊果招,因為佢嘔奶問題嚴重。唔知幾時可以再瞓到4-5個鐘以上呢...
---------------------------------------------------------------------------------------------------------
從0歲開始(戒夜奶)
有好多父母都有參考過呢本書,台灣果邊亦會將呢本書同「百歲醫師」比較,呢本書我終於睇晒,都實行左好幾日,入面有啲模式幾合適我個仔,所以我用佢嘅方法,暫時呀b進度良好。
首先講下呢本書主旨:
第一點講緊即使bb出世,照顧者都應該有自己嘅生活,同朋友一齊玩、兩夫妻嘅dating 等等,當然有時候帶埋呀b去啦,目的係示範比bb睇「人」係果樣生活、無論朋友之間定係夫妻之間。
第二點係講緊有規律嘅餵食,父母會相對舒服啲之餘,bb發展都好啲。而且佢提出第6-8星期開始可以戒夜奶。(呢啲最多人關心,我最主要都係想分享呢點。)
背景資料:
而家我個b仔46日,實行左5日。每日7餐,每次150ml奶。
書中嘅模式係「食->清醒->瞓」
食:20~30分鐘
清醒:(連埋食都係要清醒)60~90分鐘
瞓:90~120分鐘
如果早肚餓,可以有半個鐘彈性。
早餐一定要定時,即係話半夜果餐可能遲左食,但早餐一定係果段時間食,唔可以太遲。
未實行之前:
佢係由食完奶計起三個鐘就會叫肚餓,夜晚就4-5個鐘。夜晚果較放落床大致上可以自己瞓,由於佢易嘔奶,所以每次佢喊,我都會睇下佢咩事,唔會唔理佢。
實行之後:
餵奶時間係:
0700,1000,1300,1600,1900,2200,0300
0300果餐我等佢自然瞓醒先食,通常由2200開始瞓到04~0500先醒,更試過0700先起身飲奶。
佢一開始會怪叫,未係喊,我會睇下佢,如果醒左就比奶咀,拍下佢,佢通常會瞓到多一陣,大約15~20分鐘。如果重覆三次佢都仲係醒+怪叫,我就會比奶佢,唔會等佢喊。以我呀仔嘅性格,佢肚餓先會啜到個奶咀好用力,唔會係咪都食。
由於下一餐係0700(最遲0730比),而佢醒嘅時間大約4~5點,有時0530, 所以奶嘅分量比少啲。例如佢到捱到0500頂唔順,我本來比150ml,最後比100ml。
佢瞓左唔食就由得佢,但如果佢食完仲未瞓,會比奶咀,再抱佢一陣,等佢就瞓著先放落床,除非佢真係頂唔順想飲多啲。
呢5日中,有一日0300醒,比奶咀佢,佢瞓到0500
有一日係可以0400左右醒,瞓到0700
其他日子都係大約04-05醒,瞓唔返,我就比80~100ml佢。當佢習慣左0500支奶得80ml後,會再減少,變50ml,慢慢減,直到變0為止。(呢個減奶方式唔係本書教,而係參考其他人做法)
琴晚我0500餵佢,佢食完,就嚟瞓著,然後我再比奶咀,抱佢一陣,等佢瞓(因為未食飽佢唔會自己瞓到)。呀B合埋眼之後,我再放佢上床,佢怪叫幾分鐘就瞓左,直到今朝0700.
佢唔可以捱到「食->清醒->瞓」,所以佢想瞓就瞓,醒就同佢玩,夠鐘就食,早肚餓就最多早半個鐘比佢食。呢幾日佢都跟到呢個飲奶時間。但我盡量同佢玩多啲,想佢夜晚瞓得好啲。
暫時佢一次比一次遲少少半夜醒,我估佢都好快戒到。反而最眼瞓係半夜泵奶就真。
本書有一點講得好似幾啱。
我地肚餓嘅原因係仲有冇energy去比身體使用,唔係因為個胃係咪空空如也。所以人奶同奶粉對戒夜奶冇太大分別。
關於喊:
本書話佢喊我地要留意,唔同喊嘅原因有唔同confort方法
餓->食奶
大小便->換片
有胃氣->掃風
扭計->唱歌、拍拍、奶咀等等
所以佢喊唔係唔抱,而係搵合適嘅方式去應付佢喊嘅原因,抱唔係唯一解決方法。
呢本書嘅方法可能唔係啱每一個BB,所以要自己衡量跟幾多成,同埋會唔會融合其他方法去照顧BB。