我個女農曆新年花市街會表演咗兩日,場地唔係往年嘅位置,人流比往年少咗,其實咁樣仲好似好D,我都擔心人流聚集問題,家長同老師都等主辦機構取消活動,但一直都等唔到,其實有消息知道參加花市嘅檔口少咗,最後兩星期主辦方減價,但想參加都嚟唔切入貨。後來FB見到有谷友果兩日去過花市,影相放上去,痴線架,人頭踴踴,同往年差不多,莫非真係因為上一年冇花市,一有就個個忍唔住?
好啦,今個星期又陸續有同事報告確診,佢地話已經冇去多人地方,但都避唔到,有一個直情幾乎崩潰,佢話而家已經只係返工放工返屋企,邊度都冇去,農曆新年冇出街冇拜年,點知都係中招,幸好係症狀算輕,希望係自我隔離後快D好番。
不過冇最痴線,有更痴線:尋日一早4點半,我俾老公嘈醒,佢話我地泊喺屋企門口架車俾人爆格,拎走咗個catalytic converter(我呢D唔識車嘅人,聽完都幾乎講唔番係咩),老公話佢聽到聲,之後望出屋外,見到有人喺架車旁邊,之後聽到鋸嘢聲,知道出事啦,好快人走咗,老公叫醒我後就落樓去睇。當時天仲未光,佢睇完返入屋,之後就上網睇要買番個新嘅幾多錢,痴線架,原廠要二千幾,怪不得有人咩都唔拎,拎走呢個零件,最平OEM都要幾百,未計人工。
我地就完全再冇心情返去瞓,起身整早餐再送仔女返學。後來老公做mechanic嘅朋友嚟睇,佢話個零件仲喺度,偷嘢嘅人只係鋸斷咗一邊,但扯唔甩,可能聽到有人聲就即刻走。我地算好彩,老公同人拎架車去整,人工二百有找,佢話修車行話好車主都俾人偷走呢個零件,有個最倒霉嘅係同一架車發生三次。我同一個同事講起,佢都話聽見好多SUV俾人偷走呢個零件,而佢自己架車俾人爆格6次,三次俾人偷走hubs,3次係第三排後座位(真係,我聽完都O嘴),大家同時都話what a world we live in! 我腦裡面不斷重覆出現「痴線」呢兩個字。
花旗太太生活在花旗國,留意時差,你問我未必即時答到。