少年成長今日: 0|主題: 16012

收藏本版

發帖

返回列表

跳至頁

查看: 2552 | 回覆: 5

升小一搵學校 [複製鏈接]

csir3290

子爵府

積分: 11997

1^#

發表於 17-9-4 15:02 |只看該作者 |倒序瀏覽 |打印

本帖最後由 csir3290 於 17-9-4 15:02 編輯

9月1日，阿仔都升上小一。終於完成曬小一搵學校嘅階段。阿仔比較好彩，因為可以跟埋家姐讀同一間小學，所以搵學校嘅時候比較輕鬆。回想家姐當年搵學校真係好辛苦。當年仲有相非，好多人一齊搵小學，所以當時我同其他家長一樣幫家姐報咗好多間唔同嘅直資或者係私立小學，因為家姐喺自行分配學位階段冇乜特別嘅分數可以加，所以就要報咁多間。我想講嘅係，唔係點樣令到小朋友可以搵到心儀嘅學校，反而係點樣令到小朋友嘅壓力冇咁大。記得當年同老婆都有一個共識，就係唔會同阿女講邊間學校好或者我哋想去讀邊間讀之類的說話，面試完就算收或者唔收都唔會同阿女講，直至到7月先至同佢講會去邊間學校升小一。因為其實小朋友根本就唔會有壓力，壓力只不過是來自父母。而且最壞打算係所有佢面試嘅學校都唔收佢，最後要到7月大抽獎派位先至知結果，而派出嚟嘅又未必係我哋鍾意嘅學校，但最後冇辦法都可能要去讀，所以唔想阿女先入為主覺得邊啲學校好同唔好。我哋唯一會同阿女講嘅就係因為佢要升小一而要搵學校，所以就要去唔同嘅學校面試。個個小朋友都係咁做嘅，而家姐亦都見到佢啲同學都係要去面試所以唔會覺得奇怪同辛苦。當然我哋揀得去面試嘅學校都係想阿女考到喇，不過我哋唔會同佢講囉。面試咗差唔多十間學校，最後嘅結果係真係得一間肯收佢，但呢嗰間又唔係我哋最心水嗰間。最後都係要靠大抽獎，可惜結果仲衰，派出嚟嘅係一間我哋連揀都冇揀嘅學校，但係我哋都係冇同呀女講，佢亦冇放榜嘅概念。之後咁唯有靠叩門啦。成個過程直至到叩門面試完家姐都唔知道有邊間學校收佢，我哋亦都唔會喺佢面前表現到好失望，更加唔會怪佢面試表現得唔好啦！諗起每年放榜都必定會見到新聞入邊有啲家長喺度喊或者好失望話派得唔好，但係其實咁樣對個小朋友係非常之唔好，因為小朋友第一個感覺就知道自己去嗰間學校係家長覺得好差所以唔鍾意，咁佢點樣繼續讀落去啦。其實小朋友根本就唔會知道間學校好定唔好，所有嘅概念根本只係嚟自家長。我明白家長緊張，但有冇必要將呢啲壓力轉落小朋友身上呢？最後因為揾學校已破壞家長同小朋友嘅關係又有乜為呢？
終於阿囡喺叩門階段俾一間心儀嘅津貼學校收咗，咁我哋到終於放心曬。喺等結果期間，曾經都有個最壞打算就係阿女要去派位嗰間學校讀，咁更加唔可以畀阿女覺得間學校唔好。最後亦都想講下有關叩門嘅一啲心得，阿女當日只係扣咗兩間終於兩間到收咗呀女。因為好多官津學校喺大抽獎階段根本就冇得揀學生，所以去到叩門階段一般佢哋都會揀得比較嚴格，雖然唔可以考筆試但喺面試階段一般都會問一啲比較學術嘅問題，如果小朋友能夠清晰表達自己，而對英文同數學有基本認識，一般都比較著數。而且我覺得學校都會更加重視揀家長嘅背景同埋睇重細路仔同家長嘅關係。我哋除咗教阿女面試嘅時候要有禮貌之外，而且每一次面試完咗，我太太都會親自寫一封信去多謝校長畀機會呀女去面試，如果可以的話當然最好係英文信啦！
最後當然希望各位家長都可以搵到自己心儀嘅學校，不過記住真係應該平常心去面對，唔好令到小朋友增加無謂嘅壓力。就算派得唔好都唔代表小朋友嘅學業成績一定會差，其實最重要係睇家長點樣教。唔代表喺嗰啲所謂好學校小朋友成績就會自動好，而重點係家長點樣幫小朋友建立學習嘅常規，好學校都會有差嘅學生，當然差嘅學校亦都會有Band one嘅同學。就算家長唔鍾意間學校，都唔可以令到個小朋友唔鍾意間學校，因為佢有可能要喺嗰度讀六年，讀得好唔好，唔係全部關學校事，家長都有好大嘅責任，千祈唔好做一個不負責任嘅家長，乜都外判曬畀學校教就算，咁樣就算入到乜嘢學校，小朋友都唔會讀得好。