終於都復課，但係暫時只係家姐可以復課先。剛剛復課嗰日大風大雨，本來平時工人姨姨就會湊埋細佬去接家姐，但係嗰日大風大雨如果湊埋細佬去接家姐會好唔方便，所以就諗住留低細佬喺屋企請婆婆落嚟睇住佢先。咁嗰日我老婆打電話返去同細佬講叫佢留低，佢已經做好曬應該要做嘅練習，我老婆驚佢悶就叫佢自己開電視睇等家姐返嚟。點知細佬同我老婆講話爸爸話過要兩點鐘先可以開電視所以唔開得。最後我老婆同阿仔講叫佢開電視，因為佢會直接話畀爸爸聽，咁佢先至肯開電視睇。
到放工我去接我老婆，我老婆一上車就講話阿仔好守規矩，晏晝唔肯開電視。因為我曾經同佢講過要上晝做好曬啲嘢睇曬書到下晝做佢最鍾意睇嗰套卡通嘅時候先至可以開電視，由兩點睇到三點。停課嘅時候佢哋兩個都好受呢個規矩，咁到而家得返細佬喺度，細佬都仲係守住呢個規矩。返到屋企細佬仲同我講話佢襯家姐返咗學，佢喺屋企已經執定曬書包，檢查曬啲功課預備跟住嗰個禮拜復課。我哋梗係即刻讚佢，我仲同阿仔講話好欣賞佢咁守規矩。
我同老婆都要返工，所以自細我哋就好重視究竟佢兩個喺屋企可唔可以自律，坦白講如果佢兩個靜靜雞開電視其實工人姨姨都唔會干涉。所以佢兩姊弟自細我哋已經好重視要佢哋有學習嘅規律，由佢哋細個未讀書開始，一定唔會成日開住電視，通常都係要去到五點之後先至會開電視。所以佢兩個自細就已經習慣唔係成日睇電視。到佢兩個開始讀書 ，我哋更加在意一定要佢哋做曬啲功課溫曬習然之後先至可以玩。尤其是初初讀書嘅階段我同我老婆輪住攞大假陪佢哋就係要培養佢哋做功課同埋學習嘅習慣，尤其是要控制睇電視嘅時間。所以自細佢哋已經習慣開電視一定要問過我哋。都而家咁大個，佢哋做完曬功課想開電視都仲係會打電話問我或者問我老婆先。所以我成日都覺得規矩係要自細學習，當佢哋習慣咗自細就係咁，要收呢啲規矩就唔會好困難。我哋亦都唔會因為佢哋能夠守規矩而特別有啲乜嘢物質嘅獎勵，好似今次咁我都係攬住阿仔同阿仔講好欣賞佢係一個咁守規矩嘅小朋友，阿仔都已經即刻笑曬。其實經驗話俾我知鼓勵同埋自信心都係令到小朋友守規矩好重要嘅因素，比起責罰更加有效果。再者如果小朋友越細個開始培養佢哋自律守規矩效果將更為明顯，正所謂習慣成自然就係咁解。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
