少年成長今日: 0|主題: 16113

收藏本版

發帖

返回列表

跳至頁

查看: 12188 | 回覆: 0

性格 [複製鏈接]

csir3290

子爵府

積分: 12621

1^#

發表於 21-8-8 11:03 |只看該作者 |倒序瀏覽 |打印

早幾日揸住車全家一齊聽緊收音機，聽到有個都幾出名嘅玄學家喺個電台節目度講緊邊啲生肖將來會係一個惡嘅老公或者老婆。其中一個生肖就同阿仔嘅生肖一樣，阿玄學家就話呢個生肖嘅人呢將來好大機會係脾氣大同較好自我中心，而且好鍾意冒險，好容易喺屋企入面要話曬事將來會有好大機會成為一個惡嘅老公或者老婆。但係我同老婆講話佢講嘅性格同阿仔完全相反，阿仔而家唔單止脾氣好就得人，好多嘢都冇乜所謂，更加連阿仔自己都講佢最唔鍾意就係冒險試新嘢。

我唔敢話阿玄學家嘅嘢錯，因為好多時玄學嘅嘢都係統計出嚟。但係之後同老婆傾開，其實阿仔bb嘅時候又真係脾氣都幾大，好容易發忟憎。但係越大脾氣就變得愈好，愈就得人樣都冇乜所謂。其實我覺得細路仔出世開始雖然都有先天嘅性格，但其實都仲係白紙一張好睇父母點教。細路仔嘅性格其實好多時都係嚟自父母點樣去教導佢，根本性格好多時就係承傳於父母嘅性格同埋佢嘅教導嘅手法。

正如我之前都講阿仔bb嘅時候或者一兩歲嘅時候其實脾氣都幾大，但係當佢越嚟越發覺其實發脾氣冇用，亦都唔能夠令到佢得到佢想要嘅嘢，反而爸爸媽媽係欣賞佢唔發脾氣，脾氣好重容易得到讚賞，慢慢阿仔嘅脾氣變得越嚟越平和。另外如果父母自己經常都發脾氣，咁自自然然教出嚟嘅細路仔都會學到脾氣大鍾意操控嘅性格。父母經常用責備嘅口吻去教細路仔，鍾意找錯處，自自然然就會令到個細路仔越嚟越冇乜自信，更加覺得鍾意挑剔人同埋搵錯處係啱嘅。父母鍾意用脾氣來操控仔女或者話事咁仔女亦都會學咗呢種性格。

我唔係話玄學家嘅嘢錯，因為可能佢睇到喺佢嘅經驗入面屬於某一種生肖嘅人有呢種性格比較多。但係細路仔嘅可塑性係非常之高，如果父母留心喺細路仔好細個開始就用合適嘅方法去教導佢哋，咁佢哋嘅先天嘅性格係可以改變。