少年成長今日: 1|主題: 16114

收藏本版

發帖

返回列表

跳至頁

查看: 19731 | 回覆: 0

農曆年長假危機 [複製鏈接]

csir3290

子爵府

積分: 12634

1^#

發表於 22-2-13 11:12 |只看該作者 |倒序瀏覽 |打印

講農曆新年假期嘅危機並唔係講緊世界有啲咩危機，而係講緊農曆新年假期前後都係親子關係嘅危機位。因為農曆新年假期前後父母都多咗時間在家，所以更容易引發親子衝突。

首先大掃除可以話係危機中的危機，因為到大掃除嘅時候，父母好多時都會覺得仔女好多嘢係唔等使，又或者覺得仔女唔執嘢，尤其是係叫啲仔女幫手執嘢嘅時候，就更加眼火爆，因為執極都係咁亂，又或者叫極都唔執。為咗叫仔女幫手執嘢，有陣時真係叫到發曬忟憎鬧曬交咁，但啲仔女又一副愛理不理嘅樣子。所以自細我已經訓練對仔女，好似比任務佢哋完成咁，通常我都會前一晚話定畀佢哋聽要執啲乜嘢，等佢哋好似任務咁完成，當然佢哋細個嘅時候唔係叫佢哋執啲好複雜嘅嘢，只係可能係執整齊個書架或者檯面咁簡單。因為我同老婆都返咗工，所以佢哋就好似自己完成任務感自己搞掂，當時因為佢哋仲細個，所以一般都會聽話好快咁執完。我同老婆返到屋企見到就梗係要大讚佢哋，又讚佢哋執得整齊，慢慢培養佢哋有執嘢嘅習慣，因為佢哋細個覺得執完又有人讚又好似完成任務咁，所以都會好樂意咁做。到而家就算佢哋大咗，為咗減少矛盾，我都仍然係前一晚話定畀佢哋聽要執乜嘢，跟住就等佢哋自由發揮等佢哋自己執，通常都放工返嚟佢哋就會自己搞掂曬，仲要分開幾次嚟執，每日執唔同嘅位置。因為我唔干涉佢哋點樣執，所以佢哋自己自由發揮，我哋都睇唔佢哋點執，減少咗好多眼火爆嘅情況，所以一般嚟講執嘢都好順利，而且執完之後都仲要讚賞佢哋為屋企付出努力添。到而家佢兩個細路仲會間唔中就自己執下個書櫃同埋書枱，因為已經成為佢哋嘅習慣。

另外一樣引發親子危機嘅地方，就係因為農曆年假期都係比較長嘅假期，父母多咗時間喺身邊，好多時就會更加容易見到啲唔順眼嘅嘢，日哦夜哦自然就會產生衝突。最明顯又係叫佢哋執好啲嘢，好似叫極都唔執，又或者趕時間嘅時候又慢吞吞，總之父母多咗時間喺屋企，多咗時間對住對仔女，自自然然眼火爆嘅嘢就多咗。其實呢啲嘢又係要自細訓練，我屋企嗰兩個細路，我從來叫工人都唔可以幫佢哋執玩具，試過佢兩個玩完嘅玩具就咁放喺地下唔執，叫咗佢哋都唔理嘅時候，我就收起咗佢哋玩具等佢哋冇得玩。又試過出門口去街之前唔執好啲嘢又或者顧住玩慢吞吞，我同老婆就放低佢兩個叫工人睇住佢哋我哋自己出街。不過當然我唔會一叫佢唔做就即刻罰，通常我都會預早開始提醒佢哋，預佢哋有足夠時間，真係唔做先至罰。其實只要恨心一兩次，佢嘅習慣慢慢就會形成，不過當然要自細開始訓練啦，同埋最緊要係佢哋做到嘅時候一定要讚要鼓勵，一定要加強佢哋嘅成功感，令佢哋覺得佢哋係幫咗爸爸媽媽，幫咗屋企手，正所謂成日淨係日哦夜哦又唔會讚，細路又點會聽你嗰套呢。

其實講到尾家長都應該放開啲，須知道每個人嘅生活習慣都唔同，生活節奏亦都唔同，講真就算我老婆叫我做嘅嘢有陣時我都未必係即刻做，所以我對仔女而家都十一二歲，所有會叫佢哋做嘅嘢都會提早預定話畀佢哋聽，亦都容讓彈性同埋自由度等佢哋自己做，總之佢哋做咗就可以。就好似今朝起身叫阿仔執床一樣，佢都唔係即刻執，食完曬早餐坐咗一輪佢先至施施然走入房執好床舖，雖然唔係即刻做，但係佢最後都有做當然我亦都要讚下佢執得好。

總之家長寬容啲，唔好樣樣睇唔順眼，接受每個人都有自己嘅生活節奏，到頭來其實大家關係又會好啲，放假都放得開心啲。另外，如果細個冇幫細路仔養成呢啲生活習慣，到佢大個嘅時候就更加要寬容啲，慢慢畀時間佢哋去處理。有陣時家長以為啲細路仔係事事同自己作對，其實有陣時佢哋都只不過係依從自己嘅生活規律。況且有陣時如果懂得用邀請嘅方式請佢哋幫下手可能比用鬧嘅方式來得更有效果呢！