少年成長今日: 2|主題: 16013

收藏本版

發帖

返回列表

跳至頁

查看: 23561 | 回覆: 6

留學考慮 [複製鏈接]

csir3290

子爵府

積分: 12004

1^#

發表於 22-7-10 10:41 |只看該作者 |倒序瀏覽 |打印

本帖最後由 csir3290 於 22-7-10 21:23 編輯

早兩日同我老婆傾開計，佢突然間好認真咁問我話佢想早啲送阿仔阿女出國讀書，佢話擔心啲政策成日有變，驚遲啲可能政策又唔同咗出國讀書就冇咁容易。其實我同老婆一早都有共識，都計劃咗會送阿仔阿女出國讀書，原本嘅計劃係阿女喺香港讀完中學跟住就出去讀大學，而當家姐走嘅時候細佬就會跟埋一齊出去讀書。其中最大嘅考慮就係我同老婆都唔捨得阿仔阿女離開我哋身邊，所以當阿仔阿女出國讀書嘅時候，最理想就係我同老婆可能是但一個都可能會陪佢哋一齊過去。但係而家我老婆突然間話想提早畀佢哋去，佢話想家姐過去讀中四而細佬就跟埋一齊去升中二。

其實為咗佢哋兩個去外國讀書，我老婆一早都已經幫佢哋搭好曬路，嗰邊亦都會有人照顧，但係其實最唔放心佢哋嘅就係我，因為我真係好唔捨得咁細個就畀佢哋過去讀書，好似將阿仔阿女推離開自己身邊咁，尤其是如果阿女過去升中四阿仔只不過係升中二，我真係覺得有啲細個。阿仔阿女到而家都仲咁黐身，我真係好難想像第二時要隔幾個月先至可以見佢哋一次，而家每日都可以傾好多計，都仲會攬攬錫錫，真係好難想像佢哋出咗去讀書之後大家相處嘅關係會唔會改變。講落可能最接受唔到改變嘅可能係我。我明白細路仔係真係需要畀佢哋時間去獨立，而佢哋亦都遲早會離開父母嘅身邊，但係情感上真係唔想咁早，又或者好似當初嘅計劃咁我同老婆是但一個會陪佢哋一齊過去。

都試過同佢兩個講話會安排佢哋去外國讀書，可能佢兩個暫時都仲覺得未係殺到埋身，所以佢哋反應都未係好大，佢哋亦都接受會係出國讀書，因為我哋間唔中都有同佢哋傾下，但係而家計劃早咗佢哋又好似冇乜所謂咁。不過可能到真係落實要送佢哋走時佢哋嘅反應就會大啲啦！

不過無論如何都一定會送佢兩個走，但係如果要中二同中四就送佢兩姊弟走，我就點都唔捨得，不過又要尊重老婆嘅諗法，有陣時理智同情感就真係咁難決定。不過就算點唔捨得都好，但我完全明白我老婆嘅諗法，所以如果老婆真係決定要咁細個就送佢哋走，就算唔捨得我都會尊重，唯有到時可能要多啲攞假過去陪佢哋。而家我同老婆講，橫掂阿仔而家都係五年班，不如睇下呀仔升中派學校派得好唔好先啦！如果情況唔理想嘅話，咁就真係等阿仔升中二嘅時候就送佢哋兩個走。因為而家家姐讀緊嘅中學家姐讀得開心亦都能夠應付，如果細佬派嘅中學都係理想嘅話，咁我就寧願佢兩個讀埋中學先至走。我老婆同我而家都大致有呢個共識，睇吓呀仔派中學嘅情況再作決定。但係我就同老婆講千祈唔好同阿仔講呢個計劃注，由得佢好似平時咁去考中學，我哋唔想再增添佢嘅壓力，又或者令佢覺得派到邊間中學都冇所謂，因為都係會走而令到佢唔努力。不講點講都好，總之做老豆嘅就點都希望佢兩姊弟喺自己身邊啦！