少年成長今日: 3|主題: 16012

收藏本版

發帖

返回列表

跳至頁

查看: 21567 | 回覆: 2

耐性的最大考驗 -- 教功課 [複製鏈接]

csir3290

子爵府

積分: 11995

1^#

發表於 22-10-9 11:43 |只看該作者 |倒序瀏覽 |打印

講開教功課，早幾日又喺網上睇到話有家長交功課教導情緒崩潰，去到搣爛咗晒仔女啲功課然之後喪鬧。其實教功課教到發曬脾氣一啲都唔奇怪，去到情緒崩潰都只不過係去到比較極端嘅地步。講真我都試過教功課教到發曬脾氣，尤其是我哋覺得好淺嘅嘢但係啲仔女教極都唔識，呢啲情況最容易係喺溫習默書同埋數學呢啲科目度出現。

我都試過教阿仔阿女數學教極都唔識，明明我望落去覺得好容易嘅內容，但係就係講極佢哋都唔明，做極都係做錯，真係好容易發忟憎。但係諗深一層，其實大人嘅情緒控制應該好過細路仔，其實自己愈發忟憎就越解決唔到問題。所以慢慢亦都開始明白發脾氣冇用，因為唔識就係唔識，你發脾氣都解決唔到問題，反而只有令到啲細路仔越嚟越唔敢問你，咁惡性循環之下，都係永遠解決唔到問題，而且只會將唔識嘅嘢累積得越嚟越多，最後都係解決唔到問題。講真肯教細路仔功課嘅家長都係緊張仔女嘅成績，咁問題嘅重心就係在於點樣幫佢解決唔識嘅內容，家長發曬脾氣，細路仔又情緒唔好，到最後都係解決唔到嘅問題。所以後來我都慢慢發展到一個地步就係開始要意識到自己嘅脾氣，當想發脾氣嘅時候暫時唔好教住，叫佢哋做住其他嘢先，等自己情緒平復一下，然之後喺呢段期間先至諗下有冇其他方法可以講得清楚啲。因為好多時我哋發脾氣嘅原因就係因為我哋講嚟講去都係同一個方法，但係講極佢都唔明講極都係做錯，明明家長已經講咗好多次，但係佢哋都係唔識，所以就會越嚟越忟憎，尤其是係一啲我哋覺得好簡單嘅題目，但都要花好多時間都唔識，再加上家長已經好多嘢做好忙，放咗工返嚟都想休息，家長又心急細路仔又唔識最終就演變到大家都發脾氣。

其實做大人嘅真係要明白細路仔嘅理解能力同大人係真係唔同，慢慢我發覺其實換一個方法去教，心平氣和可能個效果仲好。好似我主要教阿仔阿女數學有陣時啲比較抽象嘅概念係真係要諗啲方法令呢啲概念實體化，先至會容易啲理解慢慢一步一步，反而佢哋仲容易明白。家長要明白講嚟講去如果都係同一個方法，細路仔唔明就真係唔明，就算同一個方法講一百次佢都係唔會明。所以佢兩個讀小學嘅時候，好多時間我教數學都要攞曬啲lego呀，畫曬圖呀慢慢一步一步分拆去諗方法教佢哋，正如我之前講過雖然係用多咗時間，但係見住佢哋一步一步慢慢解拆個問題，其實做家長嘅都有啲成功感。

當然我明白有啲家長可能真係冇咁多時間亦都冇咁多心機又或者未必有咁嘅程度去幫細路仔解決佢功課上面嘅問題，如果係咁就真係可能要假手於人，補習又好參加學校嘅功課輔導班又好，總之就唔好勉強自己去教。如果因為為咗功課而破壞大家嘅親子關係咁可能仲得不償失。

我自己都親身經歷，好似我個妹因為細我哋好多，我同我細佬大學畢業出嚟做嘢我個妹都仲係讀緊中學。我阿媽同阿妹期間曾經有一段時間關係好差，就係為咗讀書成績。但係最後我都係同我媽講，其實阿妹成績唔好唔係今時今日嘅事，由阿妹細個開始其實我阿媽都冇着意幫佢建立一套溫習嘅方法，直至中學先至覺得佢成績越嚟越差，但係我媽又幫唔到，淨係識得鬧所以我先至同我阿媽講，你再咁鬧法就連同阿妹嘅關係都打碎埋，如果中重視同阿妹嘅關係，咁學業上面就要放開一啲，可能阿媽到最後自己都有諗又真係放開咗一啲，雖然我妹最後中學畢業成績唔算太好，但係起碼過渡咗大家親子關係嘅危機，兩母女嘅關係亦都越嚟越好。

所以做家長真係要懂得控制自己嘅情緒，我明白學業重要學業重要，但係如果危害到親子關係，家長就要諗下究竟邊一樣重要啲。如果自己真係唔能夠控制情緒，真係唔能夠有太多時間花落去諗方法教自己嘅細路仔嘅時候，就真係要嘗試下喺學業上面搵其他人幫手又或者真係要放開一啲。教功課教到情緒崩潰只會導致到連自己親子關係都會崩潰。