少年成長今日: 2|主題: 15991

收藏本版

發帖

返回列表

跳至頁

查看: 40967 | 回覆: 4

裝修 [複製鏈接]

csir3290

子爵府

積分: 11835

1^#

發表於 23-6-25 12:16 |只看該作者 |倒序瀏覽 |打印

阿仔阿女開始大，要幫佢哋分房，所以屋企都將會裝修。呢輸每一日都係執嘢，因為又要返工佢哋又要考試所以差唔多去到要開工嘅時候先至開始執嘢。唔好話裝修，有個執嘢經驗嘅人都知道執嘢係好容易令人好忟憎，邊啲嘢要邊啲嘢唔要，點樣執法各自都有自己嘅諗法，所以係最容易發生磨擦。

喺呢段執嘢嘅時間入面，其實我都非常忟憎，因為我要將我自己間書房執空曬，然之後先至可以裝修跟住畀阿仔用。但係因為實在太多嘢又太多書，所以執起上嚟真係越執越忟憎。再加上唔係全屋裝修淨而只係裝修兩間房，所以擺到一屋都係嘢，唔使執見到都已經好忟憎。由於主要係清我間書房，所以主要都係我執，阿仔阿女就要執清曬佢哋自己而家一齊瞓嗰間房，同埋佢哋啲玩具及書櫃入面嘅書。呢幾日放工都係咁執，再加上公司亦都好多嘢做所以每一次見到要執嘅嘢都搞到自己情緒低落。但係諗深一層其實發脾氣亦都係冇用，因為阿仔阿女自己都執緊，而且阿仔阿女亦都好幫手自己執自己嘅嘢亦都執得好整齊。所以父母有陣時懂得調整自己嘅心情係好緊要，我而家都好知道總言之就將個任務交畀阿仔阿女，話畀佢哋聽佢哋放學之後要執啲乜嘢就由佢哋自己執，雖然佢哋未必一定係按我嘅意思去執，但係佢都有自己嘅方法，總之執好咗就可以。但係有陣時父母係呢啲時間就硬係覺得仔女做嘅嘢篤眼篤鼻，唔係按自己意思去做，就變成大家會有啲磨擦，仔女肯自己去執其實已經好好，所以父母有陣時就要放低自己嘅諗法，畀佢哋去發揮，最緊要畀清楚明確嘅指示做完嘅目標係點樣，再加上畀多啲鼓勵例如佢哋執完之後都讚下佢哋咁，佢哋就會更加願意更加肯用自己嘅方法再去處理自己要執嘅嘢。而我自己為咗唔好令到自己忟憎嘅情緒影響咗佢哋，所以執嘢嘅時候我都寧願閂埋房門自己拎咗幾個紅白藍入去就係咁即係咁執，而我老婆亦都好識做，佢唔會干涉我點執邊啲嘢要同邊啲嘢唔要。因為其實最容易發脾氣嘅時候就係當自己執嘢嘅時候其他人多多意見，呢樣又話要，嗰樣又話唔要，所以為咗避免有呢啲磨擦最好就係自己閂埋房門自己決定點樣執法。如果有唔係自己嘅嘢，就執好曬之後交畀佢哋佢哋自己決定要定唔要，同點執法。

總之喺日常生活入面其實好多嘢都會令到屋企人之間產生磨擦，呢啲時間就好睇父母自己嘅情緒控制係點樣。如果父母自己都樣樣嫌三嫌四諸多挑剔，唔識放開自己嘅心情，磨擦就會更加多。明明係一件好事可能都因為大家嘅爭拗而變成破壞感情嘅壞事。以目標為本就最好，總之大家完成咗嗰件事大家就唔好干涉大家究竟用啲乜嘢方法去達到呢個目標。好似執屋咁，我每一日都係話定畀阿仔阿女聽佢哋第二日返嚟要執到幾多嘢同放邊度，至於點樣執法就由佢哋自己解決，幸好佢兩個都好聽話，每一日返嚟都自己搞掂曬啲嘢。其實只要清楚簡單話畀佢哋聽個目標係點，佢哋就會做得到。做家長唔係要挑剔佢哋做得唔好嘅地方，反而係要搵佢哋做得好嘅地方，讚佢哋從而增強佢哋嘅自信。因為做家長更加需要明白每個人嘅做嘢方法都唔同，未必自己嗰套一定係最好，但係家長好多時就將自己嗰套強加咗落仔女身上，覺得自己嗰套就係最好，磨擦就係咁出現。所以做家長除咗要控制自己情緒之外，亦都要懂得放開同埋接受，更加重要嘅唔係做搵錯處嘅人，反而係要做找正確地方嘅人，懂得從細微處搵到仔女嘅優點同埋做得好嘅地方，自自然然同細路仔嘅關係就會好，同埋仔女嘅成長亦都會充滿自信。不過我正如我之前講過，自細開始訓練仔女自理嘅生活習慣，到佢哋慢慢長大先至懂得有規律有條理咁去做。