少年成長今日: 0|主題: 16011

收藏本版

發帖

返回列表

跳至頁

查看: 31873 | 回覆: 4

升中適應 [複製鏈接]

csir3290

子爵府

積分: 11995

1^#

發表於 23-9-10 11:28 |只看該作者 |倒序瀏覽 |打印

阿仔終於都開學，對阿仔嚟講，升中當然係一個適應嘅過程，但對於家長嚟講其實都係要適應，其中最大要適應嘅就係阿仔由細路仔慢慢開始變成一個青少年，對家長嚟講好多嘢都要重新適應，例如同佢嘅相處方法，要畀幾多自由，幾多自主佢，其實家長好多嘢都要慢慢去學習同埋適應。阿仔升中除咗成績要擔心之外，其實更加需要擔心嘅就係交朋結友。因為始終佢都係一個中學生，開始會需要多啲自由度，而朋友對佢嘅影響亦都應該會越嚟越大，所以如果唔懂得交朋結友做成嘅後果可能比成績唔好仲大。

有一樣嘢可以有少少放心嘅，就係阿仔而家派到間中學都算係幾好，所以應該喺佢嘅同學入面都唔會有啲太差嘅同學仔。因為我聽我啲教書嘅朋友講細路仔最易出問題就喺初中嘅時候認識咗啲唔好嘅朋友而家長冇留心到。因為當個細路仔小學嘅時候，好多佢嘅同學啲家長都會識，都會知道呢啲同學嘅情況，而且因為小學生亦都比較少時間自己同同學出去玩，咁所以問題冇咁容易出現。但係當佢哋去到中學，佢哋會識到全新嘅同學，呢啲同學可能嚟自唔同嘅學校，而佢哋背後亦都有佢哋各自自己嘅朋友，當細路仔同埋呢啲新嘅同學玩嘅時候，家長就已經唔再知道呢啲同學仔嘅背景，而且因為佢哋係中學生，多咗時間會出街尤其是係食晏嘅時候，所以出問題就好多時係嚟自呢啲時間。所以我的教書嘅朋友成日都提醒我千祈唔好以為個仔升中就可以一次過放好多自由畀佢哋，佢哋見得最多嘅就係一到升中，本來家長接送嘅都變成自己返學放學，本來都冇乜問題，但係因為啲細路仔自己返學放學嘅時候好多時都會同埋啲新嘅朋友，家長又冇特別留心個細路仔返屋企嘅時間，慢慢就會越嚟越遲，亦都掌握唔到啲細路仔去咗邊度同邊個一齊，所以問題通常就會出係呢啲時間度。另一個要留心嘅就係當個細路仔升中之後，佢哋會要求嘅自由度越嚟越多，另一方面家長亦都覺得個細路仔大，所以會畀多咗自由佢哋，可能由慢慢嘅遲返屋企變成可能星期六或者星期日都要同朋友出下街，家長又覺得細路仔都大所以亦都放低咗戒心，呢啲時間亦都係最容易出問題嘅時間。所以我成日都講做家長真係對住啲仔女要好似懂得放紙鷂咁，識放式收。唔好淨係識得放而唔識得收，重要嘅係要睇時機幾時先至放。

好似接送放學咁，其實當年阿女升中一嘅時候我哋都要工人接送佢返學接咗差唔多半個學期先至開始慢慢俾佢自己返，到佢自己放學嘅時候就更加要掌握到佢返屋企嘅時間，要佢有個習慣就係要有交帶，即係如果要遲放學嘅，一定要事先通知咗我哋先，始終都係讀中學好多時都會同同學留喺學校做嘢，所以就更加要佢有交帶，有啲乜嘢事都要通知咗我哋先。家長一定要小心觀察仔女日常嘅情況，如果仔女嘅表現係穩定嘅先至慢慢開始放鬆畀多啲嘅自由，但係如果當仔女嘅情況有少少偏差就要盡早收番，同埋要同佢哋傾究竟發生咩事。由於有家姐喺前面，所以阿仔我哋都會用返呢套方法。

有樣好重要嘅就係我啲教書朋友提醒嘅，就係好多時細路仔小學有補習，但一轉到上嚟中學，細路仔就會要求唔再去補習班，好多時家長都因為佢哋只係中一，所以就畀佢哋試下，但係我啲教書嘅朋友講千祈唔好咁做住，因為佢哋已經有一個良好嘅生活習慣，就係習慣咗每日放學都係去補習班，而且喺嗰度都識到朋友，如果突然間停咗，佢哋好似突然間多咗好多自由，但係佢哋懂唔懂得自我控制，呢個係家長要考慮嘅問題，所以就算唔使佢哋補習都應該先觀察慢慢先至停，因為對於家長嚟講最好嘅原因就係因為佢哋啱啱上中學，應該要先觀察下佢哋讀唔讀得掂然之後先至再作決定。

總之對於升中嘅同學嚟講，都係嗰句家長要留心佢哋嘅朋友，永可以嘗試下畀佢哋去補習班或者去啲興趣班識多啲唔同嘅朋友，而且要慢慢適度地給予自由，但係亦都要隨時隨地懂得收放自如。我哋唔係要做一個事事插手事事干預嘅家長，亦都唔好做一個只係懂得放，樣樣都唔理嘅家長。要做一個懂得觀察，收放自如嘅家長。唯有係咁先至能夠令仔女平穩咁過度升中嘅階段。就正如我啲教師朋友成日都提醒嘅，細路仔只要平穩過渡到中一中二之後，其實出問題嘅機會就會大大減少。

0 0 0

私人傳訊

pya

別墅

積分: 854

2^#

發表於 23-9-17 00:33 |只看該作者

多謝分享！我女女剛升中一，我都有啲煩惱，女女適應得唔錯，好快識到新同學新朋友，反而係我唔放心佢有時話要同d同學出街食飯睇戲，因為唔清楚佢d同學係乜品格，擔心學壞，好似升上中學，又唔好似小學咁講學業，叫我唔好理佢，佢自己搞定，但又擔心佢搞唔掂，又唔想囉嗦，都幾茅盾，好似係我呢個媽咪要適應多啲，好多野要調整，有啲唔習慣

私人傳訊

csir3290

子爵府

積分: 11995

3^#

發表於 23-9-17 10:42 |只看該作者

本帖最後由 csir3290 於 23-9-17 10:44 編輯

Deleted

私人傳訊

csir3290

子爵府

積分: 11995

4^#

發表於 23-9-17 10:42 |只看該作者

回覆 pya 的帖子

嘗試慢慢放手！觀察住佢嘅情況，畀佢覺得父母係信任嘅，如果做得唔好嘅時候先至利用作為藉口慢慢收緊，亦都令佢知道雖然父母係信任，但係都係會監察住佢嘅轉變。好似而家開咗學兩個禮拜，我同老婆都冇再每一晚睇住阿仔啲功課，由得佢自己發展。只係間唔中問下佢幾時默書測驗，睇下佢做得好唔好。總之做父母都要慢慢適應，繼續努力加油！