關於T18成功翻盤嘅分享，有興趣可以睇返之前個post：
唐氏綜合症篩查T18高風險＋SafeT21出唔到有效報告＋抽羊水
https://www.baby-kingdom.com/forum.php?mod=viewthread&tid=23662213&fromuid=3439151
簡單背景資料：高齡/第一胎/子宮正常/2023年8月預產
T18成功翻盤後
以為可以安安樂樂等bb出世
點知無幾耐
我哋終於失守中咗COVID
嗰時真係好擔心
驚對bb有咩唔好嘅影響
睇醫生休息咗一星期總算無咩事
點知到29週產檢時發現bb兩邊肺都有積水
醫生即時寫信轉介我返公立醫院跟進
當時真係呆咗唔識反應
我有問醫生關唔關我中COVID事
醫生話未有相關數據證明
我問醫生有咩成因同即時有咩可以做
佢話成因有好多可能
叫我唔好太擔心住
而家情況唔係差
返公立醫院睇咗先
醫生今次產檢語氣特別認真
又唔想講太多胎兒肺積水嘅嘢
我估佢唔想我亂諗太多
但我心裡明白..今次應該好大件事..
產檢係星期五
拎到轉介信即時趕去公立醫院排期見專科醫生
姑娘幫我約到星期一見醫生
個人一直都呆呆地
直到返到屋企先識喊
上網搵胎兒肺積水嘅資料唔多
香港嘅分享機乎係零
爬完台灣網站之後發現
胎兒肺積水其中一個成因係胎兒患上乳糜胸
乳糜胸簡單ｄ理解就係胎兒淋巴管發育不良
大概1萬至1.5萬個胎兒當中會有1個
假如喺胎兒時期發現乳糜胸但唔去處理
胎兒可能會胎死腹中或者發生胎兒水腫
即使出世都可能會變成好難治療嘅狀況
關於乳糜胸可以參考：
https://today.line.me/tw/v2/article/ORpaPD
真係越睇越驚..越睇越徬徨..
好驚bb未出世就要做宮內手術
等待見醫生嘅時間真係好忐忑不安
除咗不停叫bb加油
真係無咩可以做到
公立醫院安排咗梁教授見我
佢係婦產科嘅權威
所以有佢睇住bb都安心d
今次照超聲波bb左邊肺已經唔見有積水
係右邊肺仲有積水
好彩情況唔算嚴重
無擠壓到心臟或其他器官
所以暫時唔需要考慮做宮內引流
梁教授話現階段唔知成因
懷疑係乳糜胸
要抽水出嚟化驗先會知咩事
梁教授話現時按bb情況
知道成因意義唔大
持續觀察bb情況重要d
暫時都無咩可以做到
媽媽要保持心情輕鬆
Feel到bb有咩唔妥就即刻入急症室
見完梁教授個心踏實咗好多
感恩bb唔需要做宮內手術
每日都同bb講要努力到足月出世
之後我一至兩星期返公立醫院覆診
雖然唔再係梁教授見我
但有持續覆診都安心嘅
加上私家醫生產檢
每星期都最少見到bb一次
bb都好乖好叻叻
一直情況穩定無惡化落去
直到39週入院催生
疼痛咗30多個小時
bb順產嚟到呢個世界
bb一出世就入住NICU
最後留院50日
留院詳情日後有機會再分享
雖然孕期好多時間都在擔憂中度過
雖然產後好多時間都在流淚
雖然日子彷彿很難熬
但熬過去回頭看
只要bb健健康康平平安安
一切都是值得的
一切都是珍貴的過程
發表於 
返回列表
