這天從十二點半到六點半，太太共塞了三次藥，藥效也的確是十分明顯。根據她的描述，一開始就像是一般的M痛，然後再痛點的時候有少少想拉肚子的感覺，塞第三次後就慢慢開始有強烈的陣痛。當然，身體上的痛有時候也比不上心靈上的痛。但我們很幸運，這次有一位好護士幫我們走過這段旅程。
「你好吖，我是周姑娘，知道你地呢兩日都唔容易了。係咪早兩日檢查先知道咁突然的消息吖？」
「是啊，本身果日都唔係regular產檢，之前一星期先照過無問題，點知果日就話兩個都無左心跳。」
「明白的，辛苦你們啦。一定會唔捨得的。而家塞左兩個鐘藥啦喎，開始有感覺未吖？」
「又真的比我想像中快有感覺，好似keep住M痛咁，唔通真係咁快得？」
「快未好囉。拿不過咁，有d媽媽就話想他們留在肚仔耐d，不過大部分媽媽都寧願唔好痛咁耐嘅。拿你記住喎，好痛就要出聲同姑娘講啦，幫你打止痛針。個心已經夠痛啦，唔洗死頂呢啲痛嘅。應該陣間塞完藥都會有panadol比你，不過止痛針就再effective啲。係patpat打的，打果下痛但之後就好像飲大左咁，好似蘭桂坊啲人wink下wink下撞到燈柱都唔痛繼續行咁囉。」
「咁會唔會打完止痛針會感覺唔到BB要出來架？」
「哈，咁我見所有媽媽都好神奇架喎，雖然眼訓但係去到果下就會識得按鐘叫姑娘過來。我們都會監察住的，唔洗擔心。」
「係呢，你們點叫他們兩個架？」
「你又可以講下你啲理論。」我太太望着我說。
「我幫他們改左名，一個叫子鯤，一個叫子鵬，兩個加起來就是逍遙，是莊子的東方哲學來的。」
「Wow 阿鯤阿鵬，寫名字都寫到他們傻眼了。拿到時阿鯤阿鵬出來之後呢，你們可以先休息一下，姑娘會幫他們穿好衫仔，先描述比你們聽他們個樣，你們再決定想唔想看同幾時看。記住，幾時看都可以，不用急的。」
「其它親友知道未呀？」
「最親的，熟的朋友都知道了。其實本身知道唔太穩定，頭三個幾月都真係冇乜點同人講，唔夠膽plan任何野。係去到四個月以為開始穩定，本身仲約左僱傭公司果日下午產檢完就interview印尼姐姐，點知就出事了…」太太哽咽的說。
「阿鯤阿鵬係兩隻小氣鬼，媽媽以為你小氣一陣姐，點預到你小氣咁耐喎。」周姑娘安撫着她說。
「我們明白的，眼淚代表著我們對阿鯤阿鵬的愛，對他們的想念。如果無愛，又怎會有眼淚呢？
所以要哭的時候，儘管哭出來。你們都是對方最親近最信任的人，無需要在對方面前掩蓋自己的情緒。不過，我們也可以想想，這兩天是否真的只是想用眼淚去代表我們對他兩兄弟的愛呢？
會唔會有其它方法都可以表達呢種愛意呢？
把眼睛哭到通紅對自己也辛苦吧，是嗎？」
接着，周姑娘拿來一些布和縫紉工具，一些心意卡，一些摺紙材料。
「每個人喜歡的方式不同，有人喜歡畫畫油顏色，之前有個媽媽講她寫日記，又有另一個爸爸話他摺紙鶴。好搞笑喎，我之後過左一排問返他摺成點，他話「係喎，我都唔記得幾時開始無摺」。呢度有啲材料，可以整啲手作仔啦，整張被仔比他們蓋，或者寫啲說話比他們。有時候我們人係好得意架，件事係我地面前我地覺得好大好難受，當然亦都代表着我們的愛同想念真的是有這麼大。」她把手掌放在她臉龐前說道。
「但隨住時間過去，它會行到來這裡。」她把手掌移開說。「那份愛來到這裡其實是一樣大的份量，只是它不再是在我們面前，所以我們不再悲傷。但肯定的是，它永遠都在，他們兩兄弟與爸爸媽媽的連繫永遠都係度。這份愛沒有離開過。」
我們都流下了眼淚，但這是釋懷的淚。是的，我們永遠是他們的爸媽。
發表於 
返回列表
