少年成長今日: 0|主題: 16008

收藏本版

回覆發帖

返回列表

跳至頁

查看: 21289 | 回覆: 0

習慣 [複製鏈接]

csir3290

子爵府

積分: 11960

1^#

發表於 24-9-22 11:27 |只看該作者 |倒序瀏覽 |打印

記得有人講過，生活越係自律越係有良好生活習慣嘅細路仔，將來可以有成就嘅機會就會越大。呢輪開學，成日都講開學要幫細路仔養成習慣好緊要。家長成日都投訴仔女冇溫習做功課嘅習慣，好似要養成呢啲習慣需要好多時間同好困難咁。其實年紀越細嘅細路仔，除咗學習習慣之外，仲有好多生活嘅習慣係真係需要慢慢養成，好似幫佢哋提高自理能力同埋品德水平咁。有咁多習慣要養成好似好難咁，但係其實做落就會發覺以為好難嘅嘢，其實講到尾就係家長肯放幾多時間落去陪細路仔一齊養成呢啲生活習慣。更重要嘅就係越細個開始就越慳時間，成效越大。

記得以前睇過本書講過，人要養成一個習慣其實大約只需要兩至三個禮拜重覆做同一件事就可以。對我對仔女嚟講將來係點就暫時仲未知道，但係養成生活習慣只需要兩至三個禮拜我就非常之認同。呢個我真係有經驗，不論做功課，練琴或者其他生活習慣，我同老婆由對仔女細個開始就已經刻意陪佢哋養成呢啲習慣。而我覺得仲中之重嘅就係陪伴，如果家長真係陪伴住喺細路仔身邊，一齊去養成呢啲習慣，其實真係兩至三個禮拜就可以幫佢哋變成習慣。即係話趁細路仔細個嘅時候，家長要用身教同佢哋一齊去做，唔可以成日得把口叫佢哋溫書做功課，我自己對仔女細個嘅時候就真係要坐喺佢哋身邊同佢哋一齊溫一齊做，真係兩至三個禮拜就可以養成到習慣，放學返嚟就會自動自覺攞功課出嚟做。你要佢哋有禮貌亦都係一樣，家長自己有禮貌先，例如朝朝早同我樓下見到嘅保安叔叔或者姨姨主動講早晨，慢慢又係兩至三個禮拜，細路仔就唔使你提自己主動都會叫。所以唔好以為要養成一個習慣好困難，只要趁細路仔細個，家長用啲時間陪喺身邊其實多數都會做到；好嘅習慣可以咁樣養成，相反壞嘅習慣亦都一樣更容易養成，只要家長唔留心唔注意，壞習慣一樣成，調返轉要改就要用更多時間，而且越大個就越難改。

有家長可能會覺得小朋友細個，係咪應該畀多啲自由，唔需要樣樣都好似時間表咁限時限刻，好似要幫佢養成好多習慣咁，但係我所講嘅並唔係要喺短時間內做好多嘢，完全限制細路仔嘅自由發展，反而係家長應該循序漸進覺得邊樣重要就先做邊樣，而且好多嘅生活習慣根本就係日常生活嘅細節，只不過係家長自己有冇留心咁解，所以千祈唔好誤解幫細路仔養成生活習慣同規律，就係要無時無刻限制佢哋呢樣唔畀佢哋嗰樣。其實只要家長願意花時間陪伴，同佢哋一齊去做，例如好似做功課同溫習咁，其實只要細個開始，功課壓力唔太大，其實一樣都係可以開開心心咁做。我自己對仔女學畫學琴做運動，或者其他品德上面嘅習慣，其實都係用呢個方法慢慢幫佢哋去做。一樣可以開開心心咁慢慢養成生活習慣。只要我哋成日都記住要養成一個習慣其實唔係需要好多時間，只需要家長肯付出，其實對細路仔將來嘅影響將會好大，咁付出嘅時間同心機都會值得！只要你想細路仔養成乜嘢習慣，你就用時間陪佢一齊去做，好快趣佢就可以養成你想要嘅習慣，相反壞習慣嘅養成，其實家長亦都要負上很大的責任。