少年成長今日: 2|主題: 16008

收藏本版

回覆發帖

返回列表

跳至頁

查看: 23420 | 回覆: 1

爸爸的讚賞 [複製鏈接]

csir3290

子爵府

積分: 11960

1^#

發表於 24-11-10 11:08 |只看該作者 |倒序瀏覽 |打印

前幾日喺屋企睇電視劇，其中一幕好深刻就係個仔同個老豆鬧交，原來個仔一路都好少同個老豆溝通，個仔一路都好唔滿意個老豆好似睇唔起自己咁，其中最有印象嘅舉句對白就係話個老豆乜嘢都睇自己唔順眼，就算連自己考到大學都只係同個仔講點解唔係讀醫科；到出嚟做嘢搵到人工畀家用嘅時候，就話叫佢慳啲使；諗住買禮物畀個老豆，個老豆就話唔啱用叫佢攞返去退。個仔覺得個老豆從來都唔欣賞自己。

點解呢啲對白咁有印象，因為其實講中咗好多老豆同仔嘅相處方式，講真劇入面個老豆其實好錫個仔，但係偏偏就用錯方法唔識同個仔溝通。其實呢啲情況根本喺現實生活入面就好常見，尤其是係男人唔知點解咁難開聲讚自己嘅仔女，其中一個原因可能就係成日話驚讚得多會讚壞；又或者男人較難表達自己嘅感情，所以覺得讚人好似好難為情咁。而且喺現實生活入面我哋見到人哋唔順眼要挑剔嘅地方容易過去欣賞別人嘅優點，仲話要開口去讚賞添，根本係難上加難。就以自己為例，其實講真每日喺屋企如果要挑剔對仔女做得唔順眼嘅嘢，真係有千百樣咁容易，但係調返轉如果要開聲表達欣賞對仔女，作為男人就會覺得好似有啲難為情。而且日常生活入面我哋總係會覺得做得啱做得好係應該嘅，做錯咗就當然要提醒啦！所以作為家長都偏向對仔女做得唔好嘅地方就立即出聲，但係就甚少欣賞佢哋做得好或者係做得啱嘅地方。

但係設身處地調返轉喺細路仔嘅立場諗，其實又有邊個唔鍾意人哋欣賞同埋讚呢！做得啱做得好冇人讚但係一做錯或者做得冇咁理想就即刻畀人話，咁又點會開心呢！其實做家長只要唔好經常放大細路仔做得唔好嘅地方，慢慢從小處開始欣賞佢哋一啲一啲嘅進步，多啲講好聽嘅說話，用讚賞嚟代替埋怨。咁做先唔好講會唔會令到細路仔進步，但只係咁樣嘅態度已經可以改善同仔女之間嘅溝通，已經有賺啦！千祈唔好以為鬧得多話得多先至會改善唔好嘅行為，反而多啲欣賞鼓勵佢哋做得正確嘅行為，反而仲會從中慢慢養成良好嘅習慣。而自己作為男人當然都明白要開聲讚人有時係比較難為情，但係只要諗下當個細路仔細個嘅時候，其實有陣時我哋都會扮細路仔同佢講bb話，用嗰種心態慢慢開始自細就講多啲正面嘅說話，講多啲欣賞嘅說話，其實都係訓練自己多啲去表達感受，自自然然講說話嘅方式都會慢慢開始變得正面同埋習慣欣賞。其實我自己都係用咁樣嘅方式去訓練自己多啲去講正面積極同埋讚賞嘅說話。講真我自己就覺得，如果呢啲正面同埋讚賞嘅說話係出自爸爸把口嘅話，其實對細路仔嘅影響仲大，因為喺細路仔嘅心目中，爸爸一向都係屋企入面比較權威同嚴肅嗰個，如果連爸爸都懂得欣賞自己，對細路仔建立自信同埋正面嘅價值觀嘅效果，絕對比你想像中大。而且撇開對細路仔將來嘅影響唔講，淨係可以改善大家相處嘅關係同埋氣氛，其實作為爸爸嘅就更加應該學習點樣去欣賞同埋正面咁佢同仔女相處啦！