少年成長今日: 6|主題: 16008

收藏本版

回覆發帖

返回列表

跳至頁

查看: 21224 | 回覆: 0

拍片公審 [複製鏈接]

csir3290

子爵府

積分: 11956

1^#

發表於 24-11-17 11:50 |只看該作者 |倒序瀏覽 |打印

自從智能手機嘅普及，每人都有部手機係身，而人人都揸住部相機之後，而家連教仔都要小心啲。喺網上面嘅社交群組經常都會見到一啲人，將喺街見到別人教仔嘅情況或者細路仔嘅醜態影咗放上網，而呢啲片段通常都會引起好多討論。近呢個星期又喺網上面睇到兩段片段，都係影住啲細路仔喺公眾地方嘅言行舉止。其中一段係講喺餐廳入面影到個細路女，大約四五歲，由兩個老人家帶住喺餐廳食嘢，但期間不停大叫，而且仲對兩個老人家呼呼喝喝，又不停搞迴轉帶上面嘅食物。另外一段片就係影個細路仔喺公園入面玩唔守規矩又喺度鬧阻住佢玩嘅人。通常放呢啲片段上網嘅人都係覺得啲細路仔冇規矩，但係大人又理唔到或者直情唔理，所以就放段片上網。可能佢哋會覺得希望啲父母睇到自己細路仔嘅情況會多加約束同管教，但係更多嘅可能只係為洩咗心頭嗰度氣。因為佢哋覺得就算當場同佢哋啲父母講，佢哋啲父母可能都係冇辦法又或者搬出一句以為係最佳理由嘅藉口就係「細路仔係咁㗎啦」！所以拍片嘅人都費事出聲幫人教仔，所以要擺上網其實好大程度上係想消消氣。

通常呢啲片段擺咗上網頭兩三日都會引起好多討論，好多時就會分開兩派，第一就係認為父母教細路應該要顧及他人，亦都要教佢哋守規矩，但係另一派通常就係話人哋小提大做，唔通生仔要考牌，講到未做過父母嘅人唔會明白湊細路嘅艱難，又或者拍片嘅人根本唔明白細路仔有嘅困難，可能細路仔本身有問題先至導致到事情嘅發生。

我唔係話誰是誰非，反而我想講其實而家人人都手揸一部手機，個個都當自己係記者，好多時見到唔公平或者心中唔開心嘅事就會將件事拍低然之後擺上網，所以作為父母，教導細路仔嘅時候就要更加比以前小心，因為拍片嘅人冇成本嘅，對佢嚟講擺咗上網，件事就已經完結。但係相反當擺咗上網之後，就算父母或者其他人喺網上面點樣撐片中嘅細路仔都好，其實都已經影響咗個細路仔。有陣時見到有啲片段，例如喺公共交通工具上面啲細路仔著住校服喺度嘈喧巴閉，或者影響其他人，甚至乎拍片嘅人會將個片段發埋畀學校投訴，咁就算學校最終無處分啲細路仔，但係學校都要對細路仔作出管教甚或似乎要通知家長。所以今時今日教仔，做家長就更加要懂得教養，如果事事都以為細路仔係咁嘅，人哋就要對你自己嘅細路仔忍讓，其實只不過係自欺欺人，無論乜嘢原因都好，喺公眾地方就應該更加要懂得關顧人哋嘅感受。試問一下當一個人喺餐廳安安靜靜想食餐飯嘅時候，點知隔離枱嘅細路嘈喧巴閉，係咪就係因為我要接受你個細路係咁樣，我就要容忍咗你呢！拍咗片擺咗上網，有啲仲要冇打格仔，咁最終影響嘅係邊個呢！其實當條片擺咗上網，就算你作為父母或者其他人點樣撐點樣辯護都好，其實都只不過係希望為作為父母嘅自己開脫，但係始終都對自己嘅細路仔造成影響。所以做父母而家更加要懂得自細就要教細路仔關顧別人感受同守規矩，要明白教養嘅重要，因為一個被別人認為冇教養嘅細路仔，都係源於冇教養嘅父母。