少年成長今日: 0|主題: 16008

收藏本版

回覆發帖

返回列表

跳至頁

查看: 19161 | 回覆: 0

親密感 [複製鏈接]

csir3290

子爵府

積分: 11962

1^#

發表於 25-1-5 11:17 |只看該作者 |倒序瀏覽 |打印

「夫妻關係正正就係一面鏡，反映出同仔女嘅關係究竟係親密定係冷漠」，呢個好多人都識得講嘅道理，其實正正就係好多人最容易忽視嘅道理。有啲人成日都會話同仔女關係好疏離同仔女又冇乜嘢講，大家嘅關係好似好冷淡好疏離只係同屋主嘅關係咁，睇好多唔同嘅書或者學好多唔同嘅親子教育方法想去改善大家嘅關係，但係反而冇去反省一下，其實呢個同仔女相處嘅情況會唔會正正就係兩夫婦大家相處情況嘅反映呢！

剛剛嘅聖誕假期當然多咗時間同對仔女出街，同阿仔行緊街嘅時候，阿仔好突然間會伸隻手埋嚟拖住我隻手一齊行，嗰一刻突然間自己都會諗下其實我自己細個好似阿仔咁嘅年紀嘅時候，出街都已經好似冇拖過自己爸爸隻手一齊行，但係到阿仔而家都已經中二，阿女仲中四添，但係佢兩個出街都仲會自己伸隻手埋嚟要我同我老婆拖住一齊行，而且就算喺街都好，都會無端端都會走埋嚟攬下我哋。有陣時喺屋企坐坐下無聊或者佢哋自己喺房做咗一輪嘢，都會突然間出嚟見到我同老婆坐喺廳度，佢兩個都會走埋嚟攬下我哋，我自己回心一諗，喺我自己細個嘅時候好似佢哋兩個咁嘅年紀，呢一個情況好似都冇發生過咁。

自己都慶幸而家自己一家都仲有一個咁甜蜜嘅關係，諗返轉頭都應該係一向自己同老婆相處嘅方式有關。講真到而家，我都仲好鍾意成日攬下個老婆，不論係咪喺仔女面前，就算出街我都仲唔會拖住老婆或者搭住老婆一齊行，好多時阿仔阿女都仲要特登分開我同老婆，然之後佢哋去拖住我哋。我同老婆嘅相處一路都係咁，所以啲仔女看在眼內，佢哋就會覺得呢一啲拖同埋擁抱嘅方式係習以為常，都係生活習慣，所以就算到而家佢哋咁大個，我哋繼續都係用咁樣嘅方式相處，佢哋都唔會覺得尷尬。正如我之前講過，阿仔而家每一朝起身，出房門嘅第一件事就係先攬住我一陣然，之後先再去刷牙。而且我同老婆嘅相處方式好多時都仲會傾計傾到大家雞啄唔斷，所以佢兩個細路亦都好習慣有啲乜嘢就攞出嚟傾。

作為爸爸如果想同仔女保持一個親密嘅關係，我認為其中一個好重要嘅方法就係要先同老婆保持一個親密嘅關係。你點樣同老婆相處，相處得開唔開心，就會反映咗喺仔女點樣同你相處嘅關係上面。所以我覺得如果要家庭相處融合甜蜜，作為爸爸真係首先要檢討下自己同老婆相處嘅情況。如果同老婆相處得好，自自然然同仔女嘅關係亦都唔會差得去邊，作為爸爸嘅應該真係要謹記。