少年成長今日: 1|主題: 16011

收藏本版

回覆發帖

返回列表

跳至頁

查看: 17643 | 回覆: 0

人人都知運動好 [複製鏈接]

csir3290

子爵府

積分: 11987

1^#

發表於 25-1-19 09:42 |只看該作者 |倒序瀏覽 |打印

琴日同阿仔一齊去參與香港學校體適能獎勵計劃嘅頒獎禮。因為個頒獎禮喺體育園舉行，所以順道都同阿仔行一行體育園。當然個頒獎禮嘅主題就係有關香港細路仔嘅體適能情況。其中有個港大教授就喺個頒獎禮上面做咗個分享，佢講香港嘅細路仔嘅體能情況畀亞洲其他地區好多地方都差好多。教授語重深長感喺個分享會上面講細路仔嘅體適能情況，對佢哋嘅身心發展同健康發展有幾咁重要，亦都提醒啲家長，要幫細路仔建立恆常運動嘅習慣，其實最需要家長嘅幫忙。但係香港嘅家長，普遍都只係將注意力集中喺學業上面，而忽略咗細路仔喺運動方面嘅發展。佢話當個細路仔變成大人之後，如果都仲要保持恆常嘅運動習慣，就好睇喺細路仔嘅時候家長點樣幫佢哋培養。而且有恆常嘅運動習慣，就會減少好多心血管嘅疾病，令細路仔將來嘅發展都會健康啲。

我非常之同意教授係分享會上面講嘅嘢，但係我相信佢講嘅嘢，其實好多家長本身都知道，如果你問家長運動對細路仔健康發展重唔重要，我諗你問十個，十個都會答你非常重要，但係有幾多家長又會真真正正只係為培養細路仔恆常運動嘅習慣而花心機花時間去做呢？正如我之前講好多家長都會畀細路仔去學運動，但係有幾多又真係只係為咗要建立一個恆常運動習慣而畀佢哋去學運動呢！正如我之前講一到考試期間或者考試之前嘅一個月，細路仔就要乜都停曬去溫習就知道。

教授仲喺個分享會上面講到，其實一個細路仔應該每日有60分鐘中等或以上強度嘅運動量先至係合適，但我相信香港有百分之90以上嘅細路仔都做唔到呢一個標準，細路仔細個嘅時候都仲還可以，但係當越嚟越高班，我諗唔好話每日隔日甚至每星期兩三日都未必做得到。喺呢個分享會上面，教育局長亦都係主講嘉賓，佢又提到出年開始將小五小六嘅呈分試加入體育科分數作為評核標準之一，希望咁樣可以提升細路仔嘅健康發展，亦都令到家長更重視體育運動。但係問心講，咁樣只不過係令家長為咗分數而更催逼啲細路仔做體育訓練，咁細路仔又係咪可以培養到恆常運動習慣呢！不過咁講啦，做好過唔做，起碼多咗啲誘因去令啲家長叫啲細路仔去參與體育運動同訓練。

其實要培養細路仔恆常運動習慣，係冇可能只係靠學校嘅體育課程去做，講真一個禮拜有幾多次體育堂呢！正如我有教體育科嘅朋友講，有啲細路仔去到四五年班或者五六年班，連手眼協調都未必做得咁好，好多我哋以為細個應該已經要做到嘅動作，連拍波咁基本嘅嘢，去到五六年班都仲係未做到，就知道其實平時家長係冇乜點同佢哋去做運動。個個家長都話知道做運動對細路仔嘅健康發展有好處，但係叫佢哋唔好話每日，每個禮拜搵一兩日陪下啲細路仔去做下運動，就有千百個理由，包括冇時間，攰等等而冇去做。當細路仔都仲係兩三歲嘅時候，啲家長都仲好肯陪啲細路仔去公園跑吓跳吓玩吓，但係越大個嘅時候，大家呢啲時間就越嚟越少。最主要嘅原因就係家長返工好攰冇時間。既然個個都講得出運動對健康咁緊要，但係原來做起上嚟就有千百樣嘢畀健康更緊要，所以最先放低嘅就係運動。其實在於我，運動除咗對細路仔嘅健康發展重要之外，其實一齊做運動亦都係一家人建立親子關係嘅好機會。所以我自己就每個禮拜都會搵時間，就算唔能夠book到個球場打波都好，都會一齊去跑下步或者去散下步做下運動。放低所有其他嘅原因，只係單純一家人做下運動傾下偈，對身心健康有益之餘，仲可以幫細路仔建立行常運動嘅習慣，更重要嘅就係增進大家親子關係。所以作為家長千祈唔好淨係得把口講，覺得做運動對細路仔有幾多好處，而係真真正正應該用心去諗下點樣幫細路仔去建立恆常嘅運動習慣。