少年成長今日: 2|主題: 16008

收藏本版

回覆發帖

返回列表

跳至頁

查看: 17638 | 回覆: 1

咁都有得投訴？ [複製鏈接]

csir3290

子爵府

積分: 11960

1^#

發表於 25-1-26 12:04 |只看該作者 |倒序瀏覽 |打印

上個禮拜講過好多家長都知道運動嘅好處，點知早兩日我個喺band3學校教體育科嘅朋友就不停係咁呻，佢話佢嗰科應該喺間學校入面都係最與世無爭，講難聽啲應該都係冇乜人理，點知佢都遇到個怪獸家長打電話嚟係咁話佢。佢話佢都好少形容啲家長係怪獸家長，但係佢嗰次遇到嗰個，真係連平時只係收喺心入面嗰句說話，嗰日同我傾嘅時候都要講埋出嚟。

佢話其實佢間學校嘅學生都唔係好重視體育運動，咁佢又唔想淨係啲運動叻嘅學生體育科就成績好，佢又想鼓勵下啲體育運動成績冇咁好嘅同學平日做多啲運動，但佢又心知如果叫啲學生每日要跑幾遠步或者打幾耐波或者練習幾多體能，其實啲學生都會唔係好理佢，所以佢就諗咗個獎勵計劃，教啲學生用手機入面嘅計步apps，每日返學放學就開咗個apps，平時去街亦都袋住部手機開咗個apps，咁就可以記錄到佢哋每日嘅步數，佢話想啲學生每日都注意下自己嘅運動量，所以佢就要求啲學生每一晚開返個apps出嚟，將記錄咗佢每一日步數嗰個畫面截圖，然之後上傳去老師嘅群組入面，老師就會幫佢哋記錄低每一日嘅運動步數同埋距離，佢話其實每一日只係用十零秒鐘截一張圖，咁啲學生就可以攞到嗰日嘅分數。佢呢個做法嘅目標就係希望啲學生每一日都注意下自己嗰日有冇運動，亦都因為每日都要交呢張截圖，所以希望鼓勵到學生有恆心咁去做嘢，而且因為每日都有分數，所以唔需要運動好叻嘅學生，因為每日都已有維持住運動嘅習慣而取得分數，所以體育科嘅成績都可以好好。佢話佢嘅最大目標就係想佢啲學生知道體育科其中一個最重要嘅目標，就只不過係希望學生可以建立一個恆常嘅運動習慣。咁我聽佢咁講完，其實都覺得成個計劃對於學生嚟講唔會特別增加運動量，亦都唔係特別困難，而且日日都可以攞分好似打機咁，咁我聽起上嚟都幾吸吸引。

點知佢就話，佢收到個家長嘅電話打嚟投訴，一嚟就已經好惡咁質問我呢個朋友點解要啲學生用手機交功課，個家長話佢唔想畀個女用手機，因為驚佢會攞嚟玩，而唔係交功課。咁我呢個朋友已經好聲好氣，非常耐心地解釋畀個家長聽，話就算唔畀手機個細路仔，其實都可以每一晚畀個細路仔揸住部手機，喺屋企做下擺手嘅動作，做吓運動15分鐘至到30分鐘就已經有運動嘅紀錄，可以喺家長面前做，咁就可以又交到功課又唔使畀部手機個細路仔keep住。點知個家長跟住就話咁做好麻煩，佢話佢唔會叫個女交呢份功課，因為佢個女運動好叻，學跆拳道學咗好多年，所以佢話佢個女一定夠運動量。咁我朋友心諗都費事同佢拗，咁你唔交就最多冇咗嗰個部分嘅分數，點知呢個家長可能都已經諗到，仲即刻恐嚇我呢個朋友，話畀佢聽叫佢唔好諗住因為佢個女冇交呢啲截圖而畀得分數低佢個女，因為佢個女運動好叻，如果因為只係冇交截圖呢個部分嘅分數冇咗而令到運動低分嘅話，佢會去教育局投訴，話學校點解要學生用手機交功課。總言之就係佢唔會幫個女交呢份功課，但係亦都唔可以畀得低分。其實我朋友話佢都唔覺得份功課難交，尤其是喺佢啲band3學校，佢已經用一個最簡單嘅方法，諗住啲學生最容易做到最容易攞分，點知遇到個咁樣嘅家長。佢話喺同個家長嘅對話入面，最後佢終於有少少明白點解個家長嘅心態係咁。因為個家長鬧緊我朋友嘅時候，最後就講到話都唔明點解你間學校咁煩，其實佢個女好叻，都唔知點解會派到入嚟你間學校讀，佢成日強調佢個女係band one，就係唔明點解會派咗入去佢間學校，所以佢就覺得呢間學校乜嘢都睇唔順眼，小小事都唔理有冇原因，總之乜嘢都係學校有問題。

我朋友畀呢個家長激到都唔知點回應，亦都唔會同佢嗌交，總之佢就會按本子辦事，因為佢覺得要對其他同學公道，佢話佢嘅考試會分幾個部分計算，記錄每日運動量交截圖只係佔期中嘅四分一分數，佢既然唔交，咁只要佢其他個三部分做得好，佢就一定係按分數比分，到時個家長就算唔滿意要去投訴，佢都係攞返個分數紀錄出嚟，每一個同學都係用呢一個方法評分，而佢亦都提出有咗替代方案，可以畀佢個女交到呢份功課，只不過佢嘅家長自己唔接受。到時就算佢要投訴去教育局亦都冇辦法。

我朋友話佢教咁多年體育科，係呢一間學校都未遇過呢啲家長，因為佢嗰科其實係呢啲學校係真係最與世無爭，家長亦都唔會特別關心，但係估唔到今次都會遇到啲咁樣嘅投訴。但係講到尾，我朋友話其實根本個家長就係唔滿意個女派咗去佢間學校，佢覺得自己個女好叻，所以乜嘢都係其他人有問題，佢個女冇問題佢自己冇問題。但係我朋友話其實如果佢個女真係咁叻，佢隨時可以轉到校，但佢都轉唔到，咁就知道係乜嘢原因，所以佢根本就係攞學校嚟發洩，少少嘢就話要投訴，如果佢咁唔鍾意呢間學校就應該盡快幫佢個女轉校，但係因為轉唔到所以最終就攞學校嚟發洩，而且佢覺得佢個女咁叻，所以學校就應該要將就佢個女嘅情況。我朋友其實都冇佢咁好氣，但係佢同我哋講嘅時候依然都仲係好勞氣，咁我哋都唯有安慰吓佢，算啦呢個世界乜嘢人都有，而且佢呢種咁樣嘅教女方法，到頭來只係教到個女又唔鍾意學校，又唔會享受校園生活，而且樣樣都咁負面，到頭嚟其實佢自己都會受返曬。