少年成長今日: 0|主題: 16008

收藏本版

回覆發帖

返回列表

跳至頁

查看: 6923 | 回覆: 1

派位結果 [複製鏈接]

csir3290

子爵府

積分: 11964

1^#

發表於 25-6-15 11:37 |只看該作者 |倒序瀏覽 |打印

小一派位大抽獎應該個幾星期已經公佈咗，派得好嘅當然開心，派得唔好嘅而家可能正在叩門之中。睇新聞今年整體嘅派位結果滿意度都畀之前好，其中好主要嘅原因當然係學生人數少咗競爭冇咁激烈，所以派得好嘅比例當然高咗，不過就算點高都好，都會有人失望派得唔係咁理想。我自己都記得我阿女當年小一派位嘅時候都係要參加大抽獎，但派出嚟嘅結果係非常令人不滿意，揸住個結果嘅時候我老婆爭啲喊出嚟。雖然就算之前點樣有心理準備都好，但係都冇諗過個結果會同自己嘅想像差咁遠。
雖然我同老婆對個結果都好唔滿意，但係喺返屋企嘅途中，我哋大家都先平復咗情緒，因為當知道如果返到去屋企，畀阿女見到我哋對結果嘅不滿，或者甚至乎喺阿女面前表現到好似個天要冧落嚟咁，其實對阿女嚟講都係一個非常之唔好嘅影響。所以我同老婆攞完派位結果之後，都唔係第一時間返屋企，而家係首先去食個早餐平復吓情緒，然之後諗吓下一步點樣做，好似點樣預備叩門同埋扣邊啲學校咁，然之後再返屋企。因為講真去到參加做大抽獎嘅時間，其實已經同阿女嘅表現無大關係，反而好大程度已經係同運氣有關。如果返到屋企之後，喺阿女面前都係咁多怨言，反而會令阿女覺得係佢自己嘅表現令到我哋唔鍾意個派位結果。

返到屋企之後我哋好平淡咁好似平時一樣，同阿女講派咗去邊間學校，跟住幾時去註冊之類嘅說話，幸好平時我哋已經同阿女做咗心理準備，亦都唔會講想阿女派到去邊間學校，一路同阿女嘅溝通都只係話畀佢聽政府會公佈派位嘅結果，而佢就會跟呢個結果升小一。所以對阿女嚟講，一個幼稚園高班嘅小朋友只不過係預備去另外一間學校開始升小一，間學校好定唔好或者對個派位結果滿唔滿意其實只不過係家長嘅表現。我絕對明白，因為我自己都經歷過如果派位結果唔好，對家長嘅衝擊可以有幾大，但係亦冇必要去影響細路仔嘅情緒。而對往後嘅叩門其實我哋都只係同阿女講係想試多兩三間學校，等自己可以多啲選擇，到時先至揀自己最鍾意嗰間，我哋知道絕對唔可以同阿女講因為唔滿意而家呢個派位結果所以叫佢去叩門，因為我哋都知道叩門唔一定會成功，如果唔成功而阿女知道係因為我哋唔滿意而家呢個結果先至去叩門嘅話，到頭來阿女入咗原本獲派嘅嗰間學校，反而會畀我哋影響咗佢學習嘅情緒，可能先入為主已經覺得爸爸媽媽唔鍾意佢讀呢間學校。我同老婆都已經有最壞打算，萬一叩門唔成功到最後都係要入去呢一間小學度讀書，所以更加唔可以畀阿女知道我哋唔鍾意，況且到最後其實我哋都需要安慰自己，就算邊一間學校都可以出到好學生，我哋希望阿女能夠開開心心讀得好好哋嘅話，我哋就更加要平靜地接受結果。如果由一開始我哋已經畀阿女覺得我哋唔鍾意或者唔滿意結果，但係最終又要阿女入去呢間學校讀書，最受影響嘅都始終係自己個女。所以做家長嘅首先自己要學懂接受同埋要平復自己嘅情緒。幸好最終阿女都能夠叩門成功，去到我同老婆最心儀嘅學校升讀小一。講真我哋都係去到差唔多阿女小學畢業先至同阿女講返當年佢派少一嘅經驗同埋我哋嘅諗法。