少年成長今日: 0|主題: 16046

收藏本版

回覆發帖

返回列表

跳至頁

查看: 6389 | 回覆: 0

家長群組 [複製鏈接]

csir3290

子爵府

積分: 12208

1^#

發表於 25-9-28 11:08 |只看該作者 |倒序瀏覽 |打印

最近喺社交平台睇到兩段有關媽媽嘅post都幾值得講下。
第一段係有人將喺學校家長群組入面一啲媽媽嘅對話截圖放咗上網。內容係其中有個媽媽喺家長群組度提出質問，話佢個仔畀人喺學校欺凌。欺凌啲乜嘢呢？就係話佢個仔掛咗一隻公仔喺個書包度，點知佢個仔就畀同學話佢帶嗰隻公仔係一隻冒牌貨，咁應該係個細路仔返到屋企同媽媽講。點知個媽媽就喺個家長群組度想搵出話佢個仔嘅同學身份，同時亦都喺個家長群組入面幫自己個仔辯護，又話人哋嘅仔女如果冇證據就唔應該亂咁講。我見到個群組入面只有一兩個家長叫呢位媽媽冷靜啲，但其實都冇乜人回應，但個媽媽就一路喺度鬧。我自己就覺得呢位媽媽嘅反應有啲過激。首先關於個公仔嘅真假，係咪真係咁大件事到要擺喺個家長群組上面講呢？我呢個時代其實好多家長都有唔同嘅家長群組，尤其是係學校嘅，群組主要都係攞嚟交流下學校消息，我老婆由對仔女入學開始，都一路有加入呢啲家長群組，其實主要都係交流下學校資訊。但係我老婆都講過，有啲家長其實唔係好懂得用呢個家長群組，乜嘢都可以喺個家長群組上面講，我老婆有時甚至話睇到啲家長群組嘅對答都幾好笑，幾有娛樂性。第二其實佢嘅所謂欺凌，可能只不過係同學仔之間嘅取笑內容。但係而家個阿媽咁樣喺個家長群組入面大講呢件事，對呢位媽媽嚟講可能只不過係諗住想去個群組入面找出講呢句說話嘅細路仔，但係其他家長望到一定會同自己嘅仔女講，呢位媽媽有冇諗過當佢個仔返到學校之後點樣面對佢啲同學呢！同學又會點諗呢？如果你問我我就會覺得呢啲只不過係好日常甚至乎只係小事嘅同學相處問題，做家長嘅並唔係要搵出邊個話自己個仔，反而重點應該係教自己個仔應該點樣去面對呢啲情況。講真呢個細路仔第時長大要出嚟做嘢，係咪呢個阿媽都仲可以咁樣成日幫佢出頭呢？就算係你可以繼續幫佢出頭，但係呢個細路仔將來又點樣面對呢個社會同其他人呢！成日都話學校根本就係一個社會嘅縮影，所以做家長嘅就應該教佢哋點樣面對呢個小社會，而唔係事事都干涉，都想幫自己嘅仔女出頭，講好聽啲就係話要公平公道，講得唔好聽啲就只不過係時時強出頭做埋啲無謂嘢！事實喺嗰個截圖入面，你就睇到其實其他家長只不過係喺度食花生，當戲咁睇，由得個阿媽自己喺度鬧，話唔定仲會叫埋自己啲仔女一齊睇添！呢種咁嘅處理方法都唔知係幫咗定害咗個仔！但係我相信個仔返到學校要面對自己同學嘅時候，其實就一定更加唔好受！不過我相信以呢位媽媽咁樣對事嘅處理方法，只要佢個仔返嚟再講，佢一定會將件事越搞越大跟住就去到學校層面嘅投訴，只不過係為咗一隻掛飾公仔嘅真假問題就搞到天咁大嘅事係咪值得呢！

仲有另外一篇關於媽媽嘅post就留返下個禮拜先至再講。