想生BB 今日: 0|主題: 109627

收藏本版

回覆發帖

返回列表

跳至頁

查看: 184 | 回覆: 1

同準備做媽媽嘅你哋分享一下我嘅故事 [複製鏈接]

mochagenie

複式洋房

積分: 332

1^#

發表於昨天 09:57 |只看該作者 |倒序瀏覽 |打印

冇諗過我都有過母親節嘅一日。。。

我比較遲結婚，結婚後試咗幾年都冇成果。2023嗰年我做AMH，當時42歲嘅我得0.4，所以我哋就決定去做IVF。我哋比較咗香港同台灣，覺得台灣嘅技術同埋價錢都比較好，所以決定咗去台灣嗰度做。2023年12月，第一次攞卵子，得4粒，整咗一個D3嘅胚胎。之後一個月再打排卵針，可能相隔時間太短，嗰次攞唔到一粒卵子，我仲好記得瞓喺床上嘅我，已經開始不停流眼淚。然後聽到醫生同隔籬床嗰個女仔講: 今次攞到28粒，我喺診所喊到收唔到聲。老公見到咁，佢話不如唞吓先，如是者我就唞咗5個月，6月決定再去抽卵子，今次有6粒，整咗兩個胚胎。然後隔咗兩個月，2024年嘅8月，同時間植入咗三個胚胎。等咗兩個星期，結果都係唔成功，當時已經43歲。

我哋當然好灰心，不過我同自己講，畢竟我哋都盡咗力，亦都喺收經之前試過，至少唔會有遺憾。我哋兩個都plan好晒2025年去旅行，買咗機票去日本同埋峴港，諗住用埋個持續進修，不過下年九月先有得讀我想讀嘅。呢兩年嚟我生活都好檢點，幾乎冇飲過酒。之後打消咗生育計劃，就放飛自我，過返我嘅正常生活，12月嗰時，同朋友開Christmas party，嗰個月飲咗我呢兩年飲嘅酒。最記得係12月31日我要考急救，考CPR嘅時候，個阿Sir仲話如果懷孕嘅話就唔適合啦，我心諗: 關我鬼事咩？考完試仲同老公去居酒屋，慶祝2024最後一日。

2025年1月1號，我哋本來約咗媽咪去按摩，但係嗰幾日去poo poo時總係覺得個肚怪怪地，之前屋企買落好多驗孕試紙，無聊驗吓，點知見到兩條線，我即刻拍醒我老公，佢好開心。我話唔好咁開心住，可能啲試紙過期，仲特登落咗萬寧買一支驗孕棒，結果出嚟係二至三個禮拜，我哋真係不敢相信，BB係上天賜嘅禮物。

BB而家八個月啦，share呢個故事俾大家聽，係希望大家唔好灰心，盡力做咗大家想做嘅，同埋真係可能好似我哋咁，放鬆心情，我哋絕對知道好難做到，不過我哋後尾真係做到。同埋我亦都相信試管嬰兒呢個過程，啲針藥可能刺激到個卵巢，所以先有呢個效果。雖然我年紀大，卵巢亦都係正常衰退年紀，但係其實我睇咗幾個中醫，個個都話我嘅身體冇問題，加上我係運動底，中間我有食啲supplement DHEA, CoQ10, 葉酸，Materna (老公都要食)。之前玩排卵試紙玩咗年幾，其實我覺得令人好有壓力。做呢啲事應該係同老公開心事，唔應該係目的性，我相信抱住呢個心態會好啲。另外做IVF嘅時候，每次都好似坐過山車咁，但係大家一定要記得，心理健康比較重要，對自己對將來嘅小朋友都係，所以適當時都要放鬆吓心情，好似我咁take 個break，可能對成件事比較好。

希望將好孕帶俾大家，祝大家下年都可以一齊過母親節:)