少年成長今日: 0|主題: 16114

收藏本版

回覆發帖

返回列表

跳至頁

查看: 528 | 回覆: 0

聽話 [複製鏈接]

csir3290

子爵府

積分: 12632

1^#

發表於前天 10:20 |只看該作者 |倒序瀏覽 |打印

之前喺網上睇過有個女仔喺Threads出咗邊篇帖文，講話佢爸爸放工返到屋企叫佢沖涼，由於佢打緊機所以冇即刻去沖，跟住佢爸爸就越嚟越激動係咁鬧佢，最後搞到個女仔避咗入廁所，而個爸爸喺門外面就係咁拍門，個女仔話好驚，喺網上出帖文求教點做。雖然唔知篇帖文係真定假，但係都好多網民好踴躍咁發表留言，其中有個我覺得都幾深刻，亦都我哋作為家長應該諗下嘅，就係究竟個爸爸咁嬲係嬲個女唔沖涼呢個行為，定係嬲個女唔聽佢話呢！
好似講得有啲複雜，但係其實只要細心諗下，如果只係唔鍾意佢唔沖涼呢個行為，其實中間係可以有好多轉彎嘅餘地，但係如果個爸爸咁嬲係因為嬲個女唔聽佢話嘅話，就好似關喺度爸爸嘅尊嚴問題，即係父母一講佢就即刻要做，咁無論係乜嘢行為都好，只要唔係即刻做就已經可以觸發到個爸爸嘅情緒。

做父母由細到大睇住個細路仔，當然期間我哋有責任幫佢建立良好嘅生活習慣，當中可能有好多行為覺得細路仔需要改正，但係我哋會接受係需要時間慢慢逐步建立一步一步嚟，而且當細路仔一路一路長大，佢哋亦都有自己嘅生活節奏未必時時都跟住家長所設定嘅時間去做，但係只要我哋合理地要求，亦都容讓彈性，其實仔女好多時都會跟住父母嘅要求去做。

但係如果將個層次上升到仔女一唔立即跟我哋嘅指示去做就係唔聽話唔尊重，咁就變成仔女無論任何時候都要立即跟指示去做，就唔再係單純嘅唔鍾意個行為咁簡單，而係父母要有全權控制，而且係要即時跟父母嘅指示。咁只會令到同仔女之間嘅磨擦越嚟越多，講真我哋自己做家長返工嘅，自己都唔鍾意啲老闆上司樣樣都控制曬，樣樣都要即刻跟佢嘅指示去做，咁我哋自己都唔鍾意嘅，點解我哋有要求我哋嘅仔女要即刻跟我哋嘅指示呢，咁只不過係對仔女嘅極度操控，對細個小朋友嚟講可能都仲可能可以，但係當進入青春期嘅時候，其實咁樣做只不過係將佢哋推得越嚟越遠，到佢哋有朝一日能夠作出反抗嘅時候，關係就已經變得無可挽回。

所以我哋要諗下乜嘢叫做聽話，係咪時時跟足我哋嘅指示立即去做就先至叫做聽話呢。當仔女一路長大有自己嘅諗法，仲係盲目地要求佢哋只係要聽話又係咪合乎現實呢！父母唔應該只係要求聽話，反而我哋要接受佢哋已經開始成為獨立嘅個體，有自己嘅諗法有自己嘅生活節奏，多啲嘅商量多啲嘅彈性，先至可以拉近彼此嘅距離，能夠搵到一個大家都覺得舒服嘅生活方法。