少年成長今日: 2|主題: 16120

收藏本版

回覆發帖

返回列表

跳至頁

查看: 1760 | 回覆: 0

老人家幫忙 [複製鏈接]

csir3290

子爵府

積分: 12689

1^#

發表於 26-5-31 12:30 |只看該作者 |倒序瀏覽 |打印

我相信好多父母由於都要出外工作，所以好多時候都會將仔女交畀老人家幫手湊，但係好多時就會遇到大家對教細路仔嘅方法有分歧，有唔同嘅意見。有一日聽收音機仲聽到，有個媽媽喺電台節目度投訴老人家過份縱佢個仔，畀佢個仔打機又畀佢個仔睇電視，希望電台節目主持畀啲意見。
將細路仔交畀老人家湊，呢個係好普遍嘅現象，而老人家錫啲孫又可以話差不多係必然嘅事，好多老人家都係對自己仔女嚴厲，但係對啲孫就非常寬容。我自己就覺得作為父母教養自己仔女點都係自己嘅責任，老人家嘅幫手又唔係必然，始終仔女都係自己嘅！老人家根本就冇義務要幫你手湊。所以你既然交得仔女畀老人家幫手，你就要尊重啲老人家！而且你都要預咗老人家會比較縱容啲孫。如果有咁多唔滿意，講得難聽啲其實你不如自己攞返嚟自己教自己湊，但係既然現實未必容許嘅時候，就唔好咁多嘅怨言，因為始終老人家同我哋呢一輩做家長所接受嘅一套好唔同，對老人家嚟講啲孫就好似寶貝一樣，所以唔好話鬧連少少苦都唔想啲孫受，況且你想像下啲細路仔喺度嘈喧巴閉嘅時候，啲老人家又有幾多方法令到佢哋靜落嚟呢？所以既然畀得細路仔啲老人家湊就要尊重佢哋嘅教導方法，如果覺得老人家湊細路仔嘅方法同自己有啲唔同，咁做父母就要落多啲時間落多啲心機，自己落手落腳真係去教，而且亦都可以同老人家商量一下，例如呢一位家長講到話老人家畀細路仔打機，其實你係真係要教自己嘅細路仔幾時可以打機幾時唔可以，然之後同佢哋設定一個合適嘅時間表，例如做完功課先至可以打機，仲要規定打幾耐，如果做唔到有啲乜嘢後果，仲要畀老人家知道添！父母每一日都要問返仔女嘅情況，如果有唔妥嘅時候就要教自己嘅仔女。我明白老人家有時係好頑固亦都有自己嘅諗法，但係教自己嘅仔女始終都係父母自己嘅責任！老人家可能令到喺照顧仔女上面方便啲，但係做父母始終都唔應該放曬手乜都唔理，由得老人家自己去處理所有細路仔嘅問題。如果真係覺得喺管教上面大家有分歧嘅話，唯有就係開心見成大家傾，不過最緊要心平氣和，講真都要設身處地諗下，如果連父母自己都教唔掂仔女，你有要求老人家點樣教呢！所以教養上嘅問題始終都係需要父母親力親為，老人家可能只係幫手照顧到細路仔平日生活起居飲食，但係教，始終都係要父母落手落腳。