擔保人真係要想過至好，唔好話一間屋，就算係一張信用咭一部手機，你係估唔到手尾會幾長幾多。一個真實例子：以前我老公開公司，有另外兩個合伙人，生意做得唔錯，點知後來發現主要管數果個偷公司錢，於是老公退股，所有嘢上律師樓辦妥晒，如是者已經過咗接近廿年，點知有一日銀行打電話俾我老爺（因為冇我老公手提電話），搵到我老公電話，同我老公講有條數我老公做擔保嘅，而家當事人幾個月冇還錢，因為我老公係擔保人，所以責任去咗佢同另一個舊公司擔保人身上，老公初時以為係詐騙電話，後來再打去該銀行一個相熟朋友度打聽，發現原來係以前開公司時申請嘅一張商業信用咭，一直我老公都冇用過，但偷錢果個原來咁多年都用緊呢一張咭，第三名合伙人幾年前都同偷錢果個拆咗伙，呢一間公司喺事發幾個月前都執咗，但張咭都仲用緊，用咭果個以前係一直有還錢，唔係個個月清，但叫做有借有還，唔只還最低數額，去到銀行打電話俾我老公前幾個月開始連最低數額都冇還，我老公查到佢喺一個好區有間屋，又有唔只一架車，仲知道佢父母住邊度。
後來聯絡到另一個已退股合伙人，大家搵完律師商量過後，律師話冇得搞，因為佢地兩個當時簽紙做擔保人，即使公司已執笠，佢地冇通知過銀行取消果張信用咭的話，當時簽嘅合約依然生效，如果兩個人唔俾呢條數，法律上佢地都會上身，後來同銀行傾，因為真係唔關兩個人事，最後銀行肯讓步，收少部份錢，我老公同朋友每人一半，叫做係莽之災，亦都教訓唔好隨便簽名做擔保人。後來我老公同朋友搵到果個欠債嘅人，佢話因為果陣公司做唔住，周轉不靈，唔夠現金，佢會賣車去抵債，答應分期還番D錢，最後佢有還到，不過已係半年以後，呢次算係好彩，最後都可以冇損失，但唔係個個人或者次次都咁好運。
花旗太太生活在花旗國，留意時差，你問我未必即時答到。
發表於 
返回列表
