少年成長今日: 4|主題: 16114

收藏本版

發帖

返回列表

跳至頁

查看: 3736 | 回覆: 5

必要的堅持 [複製鏈接]

csir3290

子爵府

積分: 12659

1^#

發表於 18-1-7 12:44 |只看該作者 |倒序瀏覽 |打印

本帖最後由 csir3290 於 18-1-7 12:44 編輯

呢兩個星期工人姨姨都放假返咗菲律賓，所以真係非常之忙又要返工又要做家務仲要照顧兩個小朋友。但係又係一個好好嘅機會教兩個小朋友點樣去承擔責任同分擔家務。呢兩個星期嘅經驗令我發覺到想小朋友分擔家務同好好按指示去做，真係需要同小朋友一齊傾一齊合作先至可以成功。以前總係覺得叫阿仔阿女做嘢好困難叫極都唔做，總之就我急你唔急，好多時仲會產生磨擦添。今次工人姨姨放假我哋嘗試一早就同對仔女講，大家一齊傾下有啲乜嘢嘢佢哋可以幫到手，尤其是會同佢哋傾吓朝頭早返學嘅安排。因為我同老婆都要一早返工，所以要安排公公湊佢哋返學。因為要一早起身搞掂曬所有嘢先至趕得切由公公湊佢哋返學，所以佢哋嘅合作係非常重要。同佢哋傾嘅時候佢哋都會講會朝頭早早啲起身，會合作一叫就起身。佢哋都明白到佢哋要好合作重要快手，咁爸爸媽媽媽先至可以趕得切準時出門口。咁佢哋又真係講得出做得到，係仲返緊學嗰幾日真係非常之合作。另外，我哋會嘗試叫阿仔阿女做嘢時都會講明要幾時之前做完同點解要嗰時做完。因為只有佢哋明白點解要趕，佢哋先至會願意按時去完成。因為佢哋要明白所有嘅計劃佢哋都有份參與，佢哋要合作先至可以一齊完成。另外為咗令佢哋明白邊啲家務係佢哋必須要幫手做嘅，我同老婆都唔會幫手會堅持由佢哋做，我覺得呢個堅持係必要嘅，等佢哋知道唔會有人幫佢做自己嘅工作需要自己負責返。我哋講咗邊樣嘢係佢哋做，我哋就會一定等佢自己做完之後先至可以畀佢哋玩或者做其他嘢，不過堅持還堅持，千祈唔好越嚟越心急最後演變到又係自己發脾氣或者忍唔住手幫佢哋做，我發覺反而心平氣和同佢哋講講完一次最多第二次之後就唔再講，但係就唔可以畀佢哋去玩直至到佢哋完成為止，曾經試過為咗等佢地執好嘢然後出街食飯，但係佢哋一路都唔得執，寧願唔出都要佢哋執好曬，但係千祈唔好發脾氣只係需要解釋畀佢哋聽，嗰次本來可以去遠啲地方食，終於就變成喺樓下茶餐廳食。嗰次我哋只係解釋畀佢哋聽，因為佢哋唔快手做完啲嘢所以先會搞成咁。當小朋友發覺家長係真係會堅持嘅話，最終佢哋都係會自己完成自己要負責嘅工作。教仔女除咗唔好做一啲無謂嘅堅持之外，亦都要有必要嘅堅持，尤其是係教佢哋規矩同埋責任嘅時候。