少年成長今日: 0|主題: 16054

收藏本版

發帖

返回列表

跳至頁

查看: 3829 | 回覆: 2

無能為力的家長 [複製鏈接]

csir3290

子爵府

積分: 12272

1^#

發表於 18-4-15 12:32 |只看該作者 |倒序瀏覽 |打印

上次講過自我中心嘅家長今，其實嗰次同教書嘅朋友傾開都仲有好多好奇怪嘅家長。今次想講呢一種家長，佢哋都係好緊張自己嘅仔女，但係佢哋唔會好似啲自我中心家長咁，樣樣以為自己啱，佢哋同學校好合作，好聽老師嘅講法，為咗教仔女佢哋會睇好多唔同嘅書，聽好多唔同嘅人講學好多唔同嘅方法，但係佢哋都有一個特點就係成日覺得呢啲方法冇作用。我聽我朋友講呢一種家長如果用俗語講，一個最簡單嘅講法就係畀仔女食住。每當佢哋嘅仔女喺學校遇到問題，老師打電話同佢哋傾，睇下有乜嘢辦法可以做好啲嘅時候，呢一種家長最通常嘅答案就係同老師講話我冇辦法我試過好多辦法都唔得，老師你有乜嘢辦法可以幫手解決。當老師嘗試提供啲方法幫佢手解決嘅時間，佢哋好多時都會話我試過喇我試過喇，但係都冇辦法。有陣時連我個朋友都心諗如果連你做家長都冇辦法咁其他人仲有乜嘢辦法呢？嗰個點樣都係你哋自己嘅仔女嚟。其實呢一種家長佢哋唔係冇辦法，只係佢哋缺乏咗實行嘅毅力，另一方面當佢哋試緊一啲方法嘅時候，佢哋又期望好快會帶嚟改變出現好嘅結果，當個結果唔係同佢哋預期中咁快出現嘅時候，佢哋就覺得個方法無用又唔想再試，想搵其他方法。我個朋友講，佢哋啲仔女去到我朋友手上嘅時候都已經係中學生，去到呢個時間佢哋知道父母原來都冇方法管到佢哋，自自然然就會越嚟越放肆越嚟越冇管束，根本就係食住佢哋自己嘅父母。呢種家長只係兜兜轉轉不停咁諗同試用唔同嘅方法，但係全部都係得個試字完全冇毅力冇恆心亦都冇決心去做。最慘仲有啲家長就連試都唔想試，淨係得個諗字同聽字，佢哋表面上係好似好聽老師講好合作，當老師同佢講嘅時候佢哋嘅回應都好積極，但係當返到屋企叫佢哋試嘅時候就顯得無能為力。其實教仔女冇話有啲乜嘢方法可以個個人都啱用，好多時都係要試唔同嘅方法同因應仔女嘅性格，但係我會提醒自己無論用乜嘢方法都好都係需要有耐性同埋要有恆心，亦都要因應仔女嘅反應而作出微調，因為要去改變一個人其實係需要一定嘅時間，亦都唔係一件易事。如果啲仔女都知道家長係冇決心嘅話，其實用乜嘢方法都唔能夠得到佢預期嘅效果。唔知係咪而家呢個社會乜嘢都講求效率，連教仔女啲人都希望有啲方法係做咗即刻會有效果出現。如果我哋嘅仔女係機械人可以好似改電腦程式咁話咁快就搞掂，咁就梗係冇問題啦！但係我哋嘅仔女係人，要改變人就需要感情時間愛心同埋好多好多嘅耐性，千祈唔好期望有方法係可以今日做聽日就即刻出現結果，我認為應該冇無能為力嘅家長，只有用唔用心同肯唔肯堅持做嘅家長。