懷孕前後 今日: 0|主題: 330622

現在趁懷孕個肚未好大不斷在參加產前講座同展覽，還記得之前就係不斷在上網睇人地Sharing幫到我好多，我都想分享一下，有點長不要介意。

A. 媽媽會產前講座+展覽

(1) 4 - Feb - 2018 <荷花 BB春季購物節>
地點: 香港會議展覽中心舊翼Hall 3F&G
第一次去BB展，都係不斷見隊就排入會做媽媽會會員攞禮品，見D奶粉商真係好落本呀，已經有兩張BB被了，而且有好多小遊戲玩完拿獎品。

(2) 10 - Feb - 2018 <美素佳兒
十全營孕產前講座>
地點: 尖沙咀金域假日酒店
第一次參加媽媽產前講座，一定係最專心果次了，因為真係有做notes。一開始講孕婦要食乜食乜，其實跟外國就乜都食得，之後有姨姨教點抱BB同基本點沖涼。個大禮物係竹棉孕婦三角枕，但我都宜家都未開，唔唔。

(3) 17 - Mar - 2018 <惠氏
產前產後湊B實習班>
地點: 尖東富豪九龍酒店3樓凡爾賽廳
呢個係每pair夫婦有隻公仔練習的講座，個BB公仔幾好笑容。不過首先都係聽下營養師講下先，也有嬰兒要用D乜野用品，之後先到嬰兒著衫同洗澡示範。今次在外面看見有姨姨俾form叫人入媽媽會，都填了又攞了點禮物。

(4) 18 - Mar - 2018 <雀巢
雀巢防敏1000天
準爸媽湊B實戰坊 >
地點: 旺角帝京酒店六樓喜宴堂
可能連續兩日去媽媽talk，有點覺得悶了，佢沒有實習BB沖涼時間，不過在門口有counter俾你近少少睇專業示範。我見有時間都玩埋個一對一營養師諮詢。禮品個媽媽袋很可愛但我一定沒有勇氣帶出街，俾BB好了。

(5) 21 - Mar - 2018 <卡洛塔妮
嬰幼兒皮膚護理及坐月小貼士>
地點: 麥花臣匯3樓遊協禮堂

不是在酒店舉行，感覺像中學去聽書咁。之前少聽卡洛塔妮，原來是羊奶粉。呀，送枕頭呀BB你有第一個枕頭喇~

(6) 7 - Apr - 2018 <雪印
產前講座>
地點: 旺角帝京酒店6樓喜宴堂
第一件事要講的就是雪印奶粉真係唔甜，起碼同之前試飲過的牌子比較都不甜。之前一直以為雪印就是日本奶粉，一定是在日本製造的所以福島件事之後都唔會特別會揀佢，但今日先知原來佢D奶粉係澳洲黎既，噢。中場休息有幸運曲奇派，話係用媽媽奶整的，幾好食。個禮品媽媽袋我覺得真係靚，仲有肩帶可斜孭，又多格數，我會用的。

(7) 22 - Apr - 2018 <雅培
美國雅培媽媽學堂>
地點: 尖沙咀凱悅酒店
D人話雅培的講座一定要攞因為禮物好落本，真的。佢唔多Sample，因為寧願奶粉送一大罐一大罐俾你。果日已經收到一張可以熊仔包被，竟然係仲有一支正常裝女性潔膚泡沫同一大罐媽媽奶，仲有一張coupon去Kinetics診所，居然仲有兩罐1號心美力同BB手腳袜，嘩。

(8) 25 - Apr - 2018 <(美素佳兒活動)Baby Planner 互動育兒實習班>
地點: 軒尼詩道188號TOWER 188
這是美素佳兒代俾錢的一個2小時課程，小班教學的教我地點幫BB著衫，掃風同埋沖涼。今次個練習BB公仔好肥唷。重點就係一定一定要護住BB的頸椎同兜好BB個pat pat，明白。之後都有送野。

(9) 29 - Apr - 2018 <喜寶
孩子成長從有機開始產前講座 >
地點: 太古康山道2號康蘭居201號ClubONE
個場好靚，亦都有推廣介紹D爸爸媽媽去ClubONE擺百日宴。喜寶係德國牌子專做有機野的，個talk就....都幾hardsell，有點廣告雜誌feel。不過入面的試飲果汁同授乳菜就好好飲。禮物都係成支成支清潔產品送俾你，仲有一個可以年尾上網換的嬰兒有機奶粉。仲有ClubONE會員咭呀呢個幾好飲茶可以有折。

(10) 6 - May - 2018 <美贊臣
產前講座>
地點: 旺角康得思酒店7樓宴會廳
竟然是由之前閃電傳真機的伍文生做MC，好識帶氣氛。今次講座由專科醫生講，有D野第一次聽，特別係公立醫院同私家醫院的比較，D人攞哂D手機出黎影個ppt，也有show到公立醫院個聯網一年有幾多BB在唔同醫院出世。中場有薑汁撞奶食，而禮物的媽媽U形枕真係好大。呀，仲有一套BB和尚袍呀。

(11) 12 - May - 2018 <媽媽咪咪嘉年華2018>
地點: 亞洲國際博覽館Hall 3
其實我收到成6張不同媽媽會一共成6張coupon入去嘉年華，本來想送D出去但反而之前沒時間交收而作罷。之前都有上網book時間玩遊戲：寶寶 3D 超聲波照相館，母乳餵哺工作坊，「胎兒心跳錄音」溫馨留回憶，全部都玩哂。但入面有的更多是俾幼童或BB玩的counter，所以參加完果三個活動之後都走了。

(12) 15 - May - 2018 <Kinetics 母乳餵哺及疫苗小百科講座>
地點: 觀塘基督教家庭服務中心
第一次聽的BB疫苗講座。個場唔係酒店，反而似大學D lecture hall。Kinetics真係好多禮物，連mustela沖涼裝都一次過俾兩套你(可能入多左)，而且又有coupon俾你去診所換一大罐美素力奶粉。幾好幾好。今次又見到門口有姨姨叫人入媽媽會喇。

(13) 9 - Jun - 2018 <香港醫護聯盟
新世代孕媽媽準備秘笈講座>
地點: 城景國際酒店2樓水晶廳
寶血醫院介紹接生過程，然後介紹佢間醫院。然後有臍帶血公司介紹間公司。最後係鴻福堂介紹佢D湯水薑醋同滴雞精。完場都多人去買鴻福堂既野。

(14) 9 - Jun - 2018 <公立醫院
產前講座>
地點: 公立醫院
認真的，之前在醫院產檢的時候醫生姑娘既語氣都係恐嚇的多，今次姑娘講野就溫柔好好好多。禮品是書仔，書仔，全部都係書仔。

希望遲D再有新講座可以再更新~