仔仔唔0係身邊的一些體會
仔仔出生的一分鐘開始,便忙過不停,差不多4年時間裡面,每日由早上張開眼至深夜閉上眼前,做每一件事都係為了仔仔,這段時期,自己偶爾呻下沒有私人時間,沒有朋友,沒法休息...(當然親眼看見親手湊大仔仔的滿足感+開心係無可比的)
一日,一星期,一個月,一年,兩年,三年...每日忙得團團轉, 當中容不得我有閒情靜下來思考一些事情,就是這樣,過了快4年。
今個星期,仔仔學校有個小休假期, 於周三四五放假,連同周六日,算是個長假期。由於仔仔剛巧上周末生病,連帶周一二我也替他向學校請了病假, 一個真正的悠長假期來了。
問題係,剛病好的仔仔嚷著悶,怎樣可以既可給他出外抖抖氣又不會玩得"創", 唯有同仔仔去探婆婆(我媽),我媽住屯門我住西區,同仔仔坐巴士是他至喜愛的。晚上當我準備離開時,仔仔卻堅持留在婆婆家,經過商議,仔仔留低,我自己回家。這是仔仔第二次在外留宿。
我照上次一樣,call我老公,待他收工一起dinner,逛逛街...睡前還說笑同老公講 "明天可以訓到有咁晏得咁晏lu.."
今早起身時, 9:21am, 慢慢的梳洗, 然後食早餐,跟住執屋,執完已經中午過後。好奇怪, 電話一直未響過, 上次仔仔密密打電話比我問幾時接番佢, 心裡面掠過一絲失落感...忍唔住打電話比我媽問下仔仔情況, 仔仔接過電話有一句沒一句的"應酬"我,跟住已經pass番比我媽,我仲聽見仔仔話 "我唔想傾啦"
social兩句之後我便掛線。繼續有D失落,有D空虛的感覺。
坐在sofa, 心裡開始想, 仔仔快4歲, 比起2、3歲時候的他,開始更獨立了,不只思想,連行為也獨立起來了,沒有幼兒時期那樣像AA膠一樣痴到實。我這個媽媽也得要調節一下心態了。
平日因為冇時間而積積埋埋的大小事情都搞掂了, 屋企好靜,自己冇乜好做,突然覺得原來個仔唔響度自己竟然會悶??!跟住想到奶奶, 想到自老爺過身後她亦是自己一人生活,我好似體會到奶奶,當有一天不再需要為家人忙這忙那的時候,那種渡日如年的感覺。深入明白0左為何每逢周六日假期,奶奶就會攬救生圈咁攬住是但一個仔(攬得最多的係我地),係因為寂寞。
我曾經不只一次為了每個假期陪奶奶的問題,同老公鬧交,我好豪咁講過 "個個人老左都係咁ga la, 大把阿公阿婆自己一個人啦,唔通第日我老左,又要個仔成日番 0黎 陪我 lor wor,個仔有自己家庭架啦嘛 !!"
今日之後,我不再這樣想了, 因為我嘗到了兒子,親人不在身邊的寂寞感。可以的話, 都盡量同奶奶飲下茶, 陪陪她, 縱使奶奶有時仍然是麻煩的奶奶．
從天空到大地, 心臟在持續著令人眩暈的擺動, 那是初戀
發表於 
返回列表
