少年成長今日: 0|主題: 15988

收藏本版

發帖

返回列表

跳至頁

查看: 8664 | 回覆: 2

教呀女做奧數的啟示 [複製鏈接]

csir3290

子爵府

積分: 11809

1^#

發表於 18-12-30 11:52 |只看該作者 |倒序瀏覽 |打印

本帖最後由 csir3290 於 18-12-29 11:52 編輯

阿女升咗四年級無端端畀人選咗入數學校隊，問阿女有冇興趣佢自己又話有，所以畀佢參加。參加咗先知原來係要做好多奧數。阿女從來都冇接觸過奧數我哋亦冇畀佢學過，所以啱啱接觸嘅時候都覺得啲數都真係好深，阿女好多都唔識做。老師又好似覺得小朋友應該要識咁，每樣嘢都只係教一條兩條例子就叫佢哋自己返屋企做練習。咁教阿女嘅責任就落喺家長身上。

講真佢啲數其實幾深，我都要一路睇佢啲例子然之後先至可以教阿女，但係最難反而我覺得唔係做個答案出嚟，而係要教佢點樣用方法搵出個答案，更加重要係要佢明白究竟用乜嘢方法可以搵到個答案。我覺得如果次次都係我話個答案畀佢聽而佢唔識方法嘅話，咁佢只會越嚟越覺得自己做唔到而且因為有我話答案俾佢知，佢就會越嚟會因為越倚賴我而唔嘗試，更覺得自己冇興趣到最後就係放棄。所以我覺得教阿女最難唔係教答案，最難係點樣同佢一齊搵個方法令佢覺得條數自己識做。所以開頭真係用咗好多時間教佢點樣睇題目，點樣搵出題目嘅重點同提示，跟住再同佢一齊去搵出計算嘅方法。要用好多提問去引導佢慢慢自己講出計算嘅方法先至係重點。總之我覺得最難唔係教佢搵個答案最難係點樣諗啲問題去引導佢去思考。每一次嘅提問重點唔係淨係要佢講個答案而係佢要解釋點解佢會有呢個答案，唯有咁樣先至可以確定佢唔係撞個答案出嚟而係佢真正明白。另外每一次同佢一齊計完之後我都要佢自己再重新計多一次然之後佢要講返畀我聽點解要咁計，我相信只有透過佢用自己嘅說話重新講一次佢先至可以真正明白當中嘅內容。

當初真係用咗好多時間慢慢同佢一齊計，但係我覺得用咗呢啲時間都係值得，因為慢慢佢覺得自己有能力計到，而且每一次計到我哋都會讚佢從而更加加強嘅自信。諗番以前其實都曾經經歷過一段幾唔開心嘅時間，因為開頭阿女初初接觸真係好多都唔識，而且我又心急又教得好忟憎，所以搞到差不多次次教阿女做奧數阿女都好似唔開心咁。連我老婆都曾經開聲話叫阿女不如放棄唔好參加。幸好阿女當時唔肯放棄，令我又再次諗下不如換個方法教。其實我自己細個讀書數學都唔係幾好，更加冇接觸過乜嘢叫做奧數，所以好多時我都係自己睇番阿女本練習嘅例子之後再教佢。諗返轉頭其實每一次諗到方法教阿女，令佢做到條數咪又係令到自己有一份成功，咁咪就係呢一份成功感令到自己繼續會去研究吓啲數點做之後諗下用啲乜嘢方法教呀女。

呢件事令我更加覺得要令小朋友自己肯去學習，其中一個好有所效嘅辦法就係要不停幫小朋友製造成功感同埋自信令佢哋相信自己有力能夠做到。小朋友要相信自己有能力做得到佢先至會有興趣，更有推動力去令自己學習。我覺得家長應該係諗方法引導佢哋去學習，唔係淨係當仔女一遇到唔識就只係講個答案畀佢哋聽以為幫佢哋解決咗，因為咁樣只會令到仔女產生一種依賴嘅感覺同埋一種無力感，每一次遇到唔識都只會搵家長。其實學習嘅推動力應該係發自小朋友自己嘅內心，要令佢哋相信自己有能力做得到，而每一次嘅成功都會提升佢哋嘅自信，唯有咁樣先至可以産生一種內在的推動力令佢哋去學習。