少年成長今日: 2|主題: 16039

收藏本版

發帖

返回列表

跳至頁

查看: 8382 | 回覆: 4

考試温習 [複製鏈接]

csir3290

子爵府

積分: 12179

1^#

發表於 19-6-16 12:08 |只看該作者 |倒序瀏覽 |打印

阿仔阿女終於考完試，過去呢個幾星期阿仔阿女考試屋企就好似打仗一樣，我同老婆都要全方位幫佢兩個溫習。有陣時我真係懷疑究竟係佢哋考試定係我哋兩公婆考試，平時都已經冇乜時間睇電視，過去呢個幾禮拜部電視差唔多完全冇用過。幸好阿仔阿女都常算聽話都叫做肯自己溫習，我同老婆返工前交低咗佢哋溫習要做嘅補充佢哋都很專心自己做曬，我哋返嚟淨係同佢哋對答案教返佢哋唔識嘅嘢。雖然係咁但係佢哋每一日都有好多嘢要溫每一日我哋放工返到屋企就好似進入另一個戰場一樣，總之呢個幾星期個人都忟憎咗。

考試真係好辛苦，雖然阿仔阿女平時都叫做有溫開習，但係去到考試之前都總係覺得有好多嘢要溫，總之溫極都仲有嘢溫啦。有陣時見到佢兩個溫到悶曬，都要畀佢哋玩下同休息下。溫習考試又係另外一個考驗親子關係嘅難關。做家長嘅要有耐性唔在講，仲要經常保持心平氣和。如果唔係溫吓溫吓大家都變得忟憎，溫唔到之餘大家嘅關係亦都變得緊張。我當然緊張阿仔阿女嘅成績，但係只係緊張唔懂得放鬆，可能效果仲會適得其反。我覺得幫仔女溫習最高嘅境界唔係要溫得有咁多得咁多，而係要懂得幾時要停，幾時要休息。小朋友經常處於緊張狀態根本佢都未必記得到咁多。我都試過越心急愈迫越緊張反而佢哋唔知點解溫極都唔識問極都答唔到。反而適當時候畀佢哋抖吓，效果可能仲好。做家長一定會覺得溫習係溫唔完，因為溫極都仲會有嘢溫，所以我覺得我哋做家長一定要知道究竟幾時停，同埋溫幾多。溫習係幫小朋友鞏固佢哋已學到嘅知識，唔係要破壞大家嘅親子關係。我會覺得阿仔阿女而家都只不過係讀緊小學，如果要溫習都搞到大家唔開心咁第時讀中學咁點算呢。

咁多科入面我覺得最難溫嘅就係默書，平時默嘅範圍都已經多，考試默書就更加多到想死咁濟，n咁多課要默。故得阿仔呢阿女就真係要教佢哋自己溫。幸好阿女都已經習慣咗我哋幫佢錄曬所有範圍佢自己平時聽返啲錄音嚟自己默。今次考試我哋又嘗試教佢哋互相幫手溫習，佢哋揸住對方嘅常識作業互相好似問答比賽咁幫對方問書，可能佢哋覺得似問答比賽又幾好玩，又真係很自己問。我哋放工返嚟只係幫佢哋覆多次就得。

考完試雖然未派成績表但係我哋都已經成日讚佢哋，因為今次佢哋用咗啲好啲嘅方法去溫習，例如佢哋肯喺個幾月前已經開始每日做一啲補充慢慢開始呢溫習，細佬亦都冇咁抗拒要佢放假嘅時候做補充溫習，因為佢都知道自己上個學段嘅考試考得唔係咁好，呢一次考試佢哋兩個亦都肯自己互相幫手溫習。其實唔理成績考得好定唔好，總之佢哋用咗啲好啲嘅方法去改善自己嘅溫習其實都應該讚。我哋做家長當然重視成績，但係只係著眼於成績而唔著眼喺佢哋平時嘅努力上面而抹殺咗佢哋嘅努力，咁樣又點樣鼓勵到佢哋繼續努力去做好繼續努力去溫習呢！我同老婆都知道如果今次考試成績好咗當然係好啦，就算成績冇乜點樣大進步我哋都會知道其實都唔會退步得去邊，所以佢哋一考完試我哋就即刻帶佢哋去睇戲去食飯去慶祝佢哋考完試。亦都讚賞佢哋喺考試呢段時間嘅努力。透過父母嘅讚賞可以正面加強佢哋繼續努力，亦都等佢哋知道其實我哋唔係淨係重視結果其實過程更加重要。