少年成長今日: 0|主題: 16013

收藏本版

發帖

返回列表

跳至頁

查看: 12638 | 回覆: 12

向學校請假去旅行 [複製鏈接]

csir3290

子爵府

積分: 12008

1^#

發表於 19-4-28 10:45 |只看該作者 |倒序瀏覽 |打印

阿仔阿女嘅復活節假啱啱已經放完喇，本來諗住同佢哋去旅行玩下，但係佢哋實在放假放得太遲，一放已經係公眾假期唔想人多又貴，終於都係留喺香港冇去到旅行只係同佢哋四圍去玩下。

阿女臨放假嘅前一日，佢嘅好同學千叮萬囑提呀女要幫佢攞功課，因為佢臨放假嗰日約咗牙科檢查所以要請假。呢個同學嘅屋企同我哋一家都好熟，嗰晚阿女返嚟同我哋講話第二日要幫呢個同學攞功課，我仲同阿女講話呢個同學就好啦可以提早一日放假。但係我老婆就好心水清，佢話牙科保健通常都係半晝邊會請全日假。果然隔兩日我哋就喺呢個朋友嘅facebook上面睇到原來佢哋一家提早咗一日去咗日本旅行。

有陣時都會幾羨慕有啲人可以提早放假去旅行，因為可以避開繁忙時間又可以有平啲嘅機票。自從阿仔阿女讀咗書之後都未試過可以喺學校假期以外嘅時間去旅行。其實喺阿仔阿女讀幼稚園嘅時候都曾經諗過不如早啲同佢哋請假去旅行，因為當時諗住幼稚園功課冇咁忙，返少兩日學都冇所謂。但係當佢哋一上咗小學功課會忙好多又要追進度又要温默書，到時就驚冇咁容易行得開，所以都諗過不如趁讀幼稚園嘅時候早啲放假同佢哋去旅行。

最後點解冇咁做到呢？因為我同老婆傾過最後都係覺得唔應該畀一個錯誤嘅觀念佢哋，就係可以為左玩而唔返學。我哋覺得對於細小朋友嚟講返學校學習係佢哋最重要嘅責任，喺佢哋呢個年紀嚟講冇乜嘢畀返學更加重要。如果為咗玩而可以唔返學而父母又畀嘅話，咁佢哋慢慢就會覺得返學其實唔係咁重要，只要一開咗個頭就番唔到轉頭。而且只要父母開聲嘅話學校就要畀佢哋放假，只會令佢哋慢慢輕視學校嘅規矩同埋責任。我唔想由細個開始我對仔女就會覺得返學其實唔係咁重要，為咗平啲嘅機票同埋冇咁多人去玩就可以唔返學，就可以隨隨便便就請假，我唔想將來成為佢哋唔想返學嘅藉口。

另一方面我哋知道大部分校學校都應該係唔畀啲學生正正式式咁樣請假話去旅行，所以如果真係要去嘅話就唯有同父母一齊夾埋講大話向學校請假。其實咁樣嘅話影響仲嚴重，細細個就開始我哋成日要教佢要誠實唔好講大話，點知為咗去玩做父母嘅竟然可以同佢哋夾埋一齊講大話請假，我真係諗唔到點樣樣可以自圓其說，因為咁樣係同我哋平時教對仔女嘅價值觀相違背。誠實同埋責任感係小朋友其中兩樣我覺得好重要嘅價值觀，但係原來為咗玩係可以放棄，咁佢哋仲點會重視呢。如果唔係父母嘅驅使佢哋根本唔會咁諗，我明白父母有陣時都係想同仔女去玩，但係為咗平機票為咗洗費平啲，咁其實呢啲只係父母自己嘅諗法，大人為咗想去平玩而犧牲咗仔女呢啲嘅價值觀咁值唔值得呢？我同老婆就已經疊埋心水諗住到阿仔阿女畢業之前都唔可能享受淡季旅行嘅樂趣。