少年成長今日: 2|主題: 16050

收藏本版

發帖

返回列表

跳至頁

查看: 5065 | 回覆: 2

主題閱讀 [複製鏈接]

csir3290

子爵府

積分: 12219

1^#

發表於 19-7-14 11:24 |只看該作者 |倒序瀏覽 |打印

又到暑假，呢兩個月都安排緊暑假會同阿仔阿女去英國所以呢幾個星期我老婆好勤力咁睇緊資料安排緊嗰十幾日嘅行程。阿仔阿女好雀躍因為好多地方佢哋都喺電影入面睇過佢哋好想去。其中我老婆安排咗一日去拍哈利波特嘅片場度參觀，我個女好有興趣，咁我就借勢同佢講話不如佢喺出發之前可以睇完哈利波特英文版本小說，因為個片場入面有好多嘅場景都係第一集拍攝嘅地方。其實我之前都問過佢有冇興趣睇哈利波特嘅小英文版小說，因為我老婆係哈利波特迷屋企有細有齊全套英文版小說，但係我阿女可能見到本書太厚所以佢又好似冇乜興趣咁。但係呢次旅行我哋同佢一齊睇資料，佢忽然間好有興趣咁攞返本小說出嚟睇，上個禮拜去行書局佢仲自己揀咗本用倫敦嘅地方做背景嘅小說，本小說又係幾百頁咁厚，佢都好有興趣咁睇曬。

至於細佬佢就好鍾意柏靈頓熊，係都要我哋安排去去柏靈頓車站度參觀，仲話一定要買到柏靈頓熊嘅紀念品。咁我哋就問細佬有冇興趣睇柏靈頓熊嘅書。我個仔其實佢唔抗拒睇英文書，但係佢就對嗰啲好多字嘅英文書就冇乜興趣，咁嗰日我哋去行書局行咗兩三間就係特登幫佢搵柏靈頓熊嘅書，搵到一本故仔書但係好多字，開頭都諗住佢冇乜興趣，點知佢有好有興趣咁話要買，買咗返屋企之後呢兩三個禮拜佢都係晚晚同我老婆一齊喺度睇仲自己肯讀。呢次去旅行明顯係引起咗佢哋對同英國有關嘅書籍嘅興趣。

我想講其實我對仔女平時本身係唔抗拒睇書嘅，每一晚佢哋都有閱讀時間。但係我成日都覺得佢哋睇書嘅種類比較狹窄，對睇英文書尤其是頁數同埋字比較多圖畫比較少嘅英文書佢兩個嘅接受程度真係低啲，但係我估唔到佢兩姊弟因為英國呢一個主題可以睇到咁多嘅英文書，尤其是喺家姐連兩本厚到好似字典咁嘅英文小說佢都可以好快睇得曬。所以我開始都要諗下，除咗叫佢睇書之外，原來閱讀係真係需要興趣係需要目標，雖然喺屋企我哋已經盡量造就咗一個有閱讀氣氛嘅環境畀佢哋，但係有陣時都需要諗一啲主題發掘佢哋嘅興趣等佢哋睇多啲唔同種類嘅書，只有培養佢哋對唔同種類書都有興趣去睇先至會容易維持佢哋閱讀嘅興趣，呢次經驗話俾我知，要培養佢哋嘅閱讀興趣除咗要做就一個環境等佢哋有一個閱讀嘅氣氛之外有陣時仲要幫佢哋搵一啲主題等佢哋有興趣睇唔同種類嘅書。