少年成長今日: 1|主題: 16049

收藏本版

發帖

返回列表

跳至頁

查看: 5186 | 回覆: 1

暑期作業 [複製鏈接]

csir3290

子爵府

積分: 12217

1^#

發表於 19-7-28 12:09 |只看該作者 |倒序瀏覽 |打印

早兩個星期開始放暑假，放暑假前幾日家姐學校已經派咗暑期作業俾佢，咁家姐一收到暑期作業就已經好努力咁做，希望係放假前就做完本暑期作業。細佬就有啲唔開心因為佢嗰班仲未派暑期作業，佢班主任佢哋講話要放假前兩日先至派。過兩日細佬一收到暑期作業就即刻係咁做。試過有一晚我同老婆都出咗街食飯冇睇住佢哋，點知細佬就不停咁做做到夜晚九點幾我哋返嚟叫佢唔好做先至停，終於佢都喺假期開始之前做曬本暑期作業。

其實佢兩姊弟都有個習慣，就係每逢長假都會盡快做曬啲假期作業，佢哋咁早做曬暑期作業唔係諗住假期可以唔使做嘢淨係玩，而係自細我哋已經話畀佢哋聽學校嘅功課係一定要完成，如果未做曬本暑期作業咁我哋去玩都會玩到心掛掛，因為諗住返嚟仲要做埋啲功課。另外喺假期入面我哋都會繼續畀啲補充練習佢做，咁但係我哋就會同佢哋講補充練習可以隨時唔做，如果我哋嗰日要去玩或者有啲特別嘢要做，但係學校嘅功課就唔得，所以佢哋都習慣咗放假最頭嘅時間就已經做曬本暑期作業。另外，每一日我哋都會keep任畀中英數嘅練習最少各一個佢哋做，而且放暑假嘅時候亦都係可以多啲時間畀佢哋做閱讀理解或者作文嘅練習。佢哋都唔抗拒，因為已經習慣咗，自細都係咁樣。如果我同老婆都返工咁就會前一晚交低定啲練習畀佢，順便教定佢哋。咁佢哋朝頭早一起身就會即刻做，做完等我哋放工返嚟就會幫佢哋檢查，呢個係你每日嘅生活常規。其實小朋友只要自細就教佢哋咁樣做法佢哋習慣咗就會知道每一日都係要溫習同埋做功課，所以佢哋根本就唔會抗拒。因為好似我哋返工咁呢個係佢哋每一日嘅責任。當然我哋做父母嘅每一日都係要認真咁幫佢哋檢查做錯咗要改正，我哋重視佢哋先至會重視呢啲嘅練習。

另一方面逢暑假我都會叫佢哋開始做定下一年嘅補充練習，尤其是係數學同英文。不過當然要前一晚我哋就要教咗佢點做，第二日佢先至會識得自己做。呢個做法有個好處就係因為高一班嘅嘢佢哋喺暑假開始已經接觸，所以到到佢哋真正返學去學習時就會覺得啲嘢容易啲掌握，尤其是好似細佬做嘢冇乜自信嘅小朋友更重要，上堂發覺啲嘢自己都識嘅時候佢就會容易啲掌握。咁多年都係咁做，佢哋亦都形成咗呢一個嘅習慣，所以對於假期嘅功課佢哋都唔抗拒，亦都幫佢哋建立先完成工作後再玩嘅生活習慣。而且暑假比適量練習佢哋做，到佢哋放完假，開始要應付學校功課嘅時候佢哋仍然都會維持返呢個生活習慣。

不過放假當然真係需要時間去玩，所以我哋畀練習佢哋做亦都係好克制，有陣時佢哋覺得多我哋都會酌量減少，不過最起碼都會維持中英數各一個嘅練習，每一晚我哋放工返到嚟亦都要繼續預留時間同佢哋睇書，星期六就全日休息唔使做任何嘢。不過當然我同老婆喺佢呢段放暑假嘅時間都會盡量放假陪吓佢哋。通常我哋放假都係會晏晝先至會同佢哋出去食飯然之後去玩，所以朝頭早都係會叫佢哋先完成曬啲練習同練琴。

我覺得暑假對細路仔嚟講雖然係休息，但係亦都係要幫佢哋建立同維持溫習習慣嘅時機，如果自小懂得幫佢哋好好地運用呢段時間，咁到九月開學佢哋面對啲功課嘅時候困難亦都冇咁大。所以暑假除咗畀小朋友玩之外對於家長嚟講亦都係幫佢哋建立習慣嘅時間。