如題, 如果唔係因為佢係過咗嚟新加坡幫我做, 我炒左佢嘅話我冇第二個可以代替, 唔係嘅話我一早就炒左佢
年齡: 67 (但係interview呃我哋60頭)
電話: 9439 64xx
佢做嘅嘢講嘅嘢全部都係錯㗎，佢真係唔好再學人做陪月啦唔該，對BB唔好，對媽媽唔好，對所有嘢都唔好，做人貪威識食，都唔知道到底係媽媽坐月定係佢坐月，簡直係呃錢。我開刀生佢竟然第一日第一餐煮芋頭俾我食，之後仲要不停煮蛋煮姜比我食！呢啲嘢食咗會發架個傷口，我唔係順產啊！佢到底識唔識架？我每一次同佢講我係咪唔食得呢啲嘢，佢就會話我咩都食得！直至到月尾嗰陣時我已經坐完個月，我媽咪嚟到新加坡先至話佢，梗係食得啦，我係人嚟㗎嘛，又唔係叫我食狗糧，而家講緊係咪坐月餐啊，佢根本冇煮坐月餐比我食！係我最需要補最吸收嘅頭一個月佢完全浪費左我嘅黃金時期！煮埋哂嗰啲咩蕃茄炒蛋，仲煲葛湯比我飲，幾咁寒涼，根本就唔係坐月餐！要到最後我媽咪同我講我先知，但我都食咗啦，救都救唔番！呢啲陪月唔係靠害係咩啊？仲要不停蒸雞髀蒸水蛋比我食，夠膽死唔可以連續三餐每餐蒸一隻雞髀比我食，咁我使乜請佢啊？雞汁一次都冇等過俾我食，講就天下無敵。
到佢煲薑水比我沖涼，煲薑水佢就煲得足，但係佢竟然俾我夜晚沖涼成八點幾十點幾我先沖，佢完全一句聲都冇出過，只係因為佢唔想日頭要趕住做咁多嘢所以就傍晚先煲，由有得我夜晚沖，到我奶奶同我媽咪同我講邊有人夜晚沖涼街坐緊月，我先至係唔得㗎！佢簡直當我嘅健康係垃圾！佢自己都有個女佢會唔會咁樣對自己個女啊？我請陪月就係因為我好多嘢唔識要靠佢哋專業意見佢幫我等我健健康康，結果呢？
明明請佢過嚟嘅時候佢一月有黎做家訪，佢已經知我哋屋企有樓梯，佢七月黎到竟然叫我一個岩岩做完手術生完BB嘅人日日行樓梯落嚟食飯，純粹因為佢唔想餐餐行上嚟俾飯餸我食，真係超自私！仲要同我講係對我健康好叫我運動下，大佬我啱啱生完一個禮拜咋！我一日要行幾多次嚟俾佢照顧？咁我請佢黎做乜嘢？
之後到到BB滿月我哋帶佢睇醫生先發現佢搞到我BB個頭瞓到一邊扁咗！佢由第一日嚟，我BB當時係一個星期大，啱啱出院，因為係早產所以已經瞓咗幾日醫院，佢不停咁要佢瞓向右邊，攝晒好多枕頭呀被呀喺佢背脊等佢郁唔到，結果佢嘅右邊後腦咪扁咗囉，我哋每一次幫佢瞓番去左邊，佢仲會話佢個胃係喺右邊，咁樣訓可以容易消化，我哋之後問醫生，醫生話根本冇啲咁嘅事，簡直荒謬！佢仲話自己做過100個BB，咁我想問係咪嗰100個BB個後腦都係扁咗㗎？到我奶奶話佢嗰陣時，佢仲要反駁話BB唔識得自己轉下左面，我想問個BB幾大呀？同埋佢攝晒野喺後邊點轉啊？想訓平都唔得啦！
照顧BB方面，分別我，奶奶，我阿媽，都話佢掃風可唔可以唔好拍得咁大力，佢就諸多理由，總之唔可以聽我哋講嘅！佢自己一定要行自己個一套嘅！好彩BB冇事姐佢拍到咁樣！個BB幾大呀？我個BB仲要早產左五個星期架！佢一啲憐惜嘅心都冇！到佢依家走咗成兩個月，我細細力同佢掃風佢都會自己嗝啦！根本就冇需要咁大力拍佢！餵奶又不停拍個奶樽逼佢快啲食，個個都叫佢唔好咁樣佢都仲係要咁！固執到一個地步，根本無人講得過佢，但係個BB係我哋㗎！同埋我哋先係雇主，佢可唔可以尊重返我地呀！
同我奶奶去街市買餸，每次佢都問可唔可以買呢樣可唔可以買果樣，但係當我奶奶問嗰啲嘢我食唔食得嘅時候，佢就好猶豫，根本我就唔食得嘅，好似皮蛋豬膶牛肉，我點會食得啊？佢買黎想自己食，其實到底係我坐月啊定係佢坐月呢？煮啲嘢食全部都係食佢自己鍾意食嘅嘢，又或者係煮一啲勁唔啱我食，或好簡單易煮，好似蒸雞髀番茄炒蛋嘅嘢，有冇諗過我嘅健康？簡直極度自私！之後煲薑醋佢仲離譜，根本無人話過佢可以咁樣不停咁攞嚟食，佢自己已經一早食晒啲浸得最耐嗰啲，然後不停叫我地買新醋加落去，到佢走咗嗰陣嗰啲醋根本冇晒味，佢仲要咩姜都落，人哋落老姜，佢落埋子薑添，我覺得其實佢真係唔係好識整囉？係到試，不過最後落咗子薑嗰啲佢就梗係唔食啦，佢真係冇咁傻啊，留返俾我哋食囉！
有一晚我奶奶發現佢煲完嘅湯唔擺落雪櫃，我哋呢度新加坡嚟㗎，天氣到底有幾熱正常人都知啦！結果我奶奶話俾我知，我再好有禮貌咁轉告佢叫佢湯一定要隔渣再擺落雪櫃過夜，佢第日竟然夠膽死黑我奶奶面，成朝唔同佢講嘢！佢到底咩事呀？佢當自己係邊個呀？明明係佢自己做錯唔岩在先，佢真係好有問題！
最後佢更加唔識羞恥，意圖偷野！如果唔係我媽咪粗略咁檢查下佢行李，根本佢就會偷野走。明明有包印尼麵係我媽咪買比個工人嘅，佢成包攞咗去！之後又有一包杏仁，當時我奶奶已經離開咗星加坡去咗美國，嗰包杏仁係佢叫我奶奶買包靚啲貴啲嘅，可以佢俾佢整杏仁糊俾我哋食。到最後佢就梗係冇整到啦，然後佢就想成包杏仁擺落夾攞走，仲同我媽咪講話唔知係唔係我奶奶買來送俾佢，佢都真係好厚面皮！個包杏仁根本無人話過係買俾佢架囉。煲湯啲料我媽咪當初買咗好多過嚟，其中一樣係百合，但係佢一次都冇用過。我媽咪係喺我坐完月最尾嗰幾日先至飛過嚟，佢問佢點解唔煲百合俾我食，佢話因為佢自己唔鍾意食......我媽咪已經呆左，我又要問多次，到底依家真係佢坐月定我坐月？跟住我媽咪唔理佢要佢落百合，佢食咗一次之後就話好鍾意！我哋只係落過一次，一包入邊只係用咗少少，但到佢走咗之後包百合竟然唔見咗大半！啲百合話平唔平話貴唔貴，但個問題係新加坡呢度冇啲咁靚嘅百合，如果真係佢偷嘅，佢有冇諗過會令到人哋好唔方便？
佢亦都要搞清楚，就算我後生，我都係佢雇主，我講嘅嘢佢根本就係從來都聽唔入耳，仲要用勁差嘅態度不停反駁我。佢作為雇員根本就應該聽我嘅說話去做，但係佢就極度固執不停堅持自己係啱嘅。依家佢走咗根本有好多野都證明佢係錯㗎喇，佢仲事事都逼人行佢嗰一套，簡直係荒謬！
有一次佢要BB趴係度訓，因為佢不停喊，佢話佢肚唔舒服，我都明，但係如果BB要趴係度訓，所有醫生護士醫院都講過，一定要有人望住佢。佢由得BB趴係度訓，但係佢自己就向牆瞓咗覺，佢根本唔係睇實佢！如果BB有咩事，邊個負責？佢點賠到賠唔翻俾我！意外嘅嘢，只需要幾秒鐘，一次，已經係意外，返唔到轉頭，點解佢咁都唔明？我去同佢講唔可以咁樣俾佢趴喺度訓，佢就唔出聲成塊面黑晒即刻轉身行出咗房。然後同一日下午BB又喊，我抱住bb等左10分鐘至15分鐘佢都唔入嚟房，然後我大聲叫佢個名佢都唔想黎，特登唔理我，到到差唔多20分鐘佢先至施施然行入嚟，第一句就話「我都話咗你㗎啦」，之後嘅嘢我都唔想再多講，佢根本係特登嘅！呢啲咁嘅人，咁嘅態度，做陪月？佢唔好去害人啦！
人哋話開刀要坐月一百日，我特登請足佢30日諗住坐足啲個月，唔好淨係26日咁樣。但係佢26日之後基本上已經冇乜點做野，因為我媽咪同佢個工人嚟咗之後，啲粗重野例如洗bb衫嘅嘢佢全部比晒個工人做，照顧我嘅嘢佢亦都做得好求其，冇再煲薑水比我沖涼，咁我請佢30日做咩呢？人哋話坐月期間千祈唔好病，我第二個月就病咗！呢啲都係佢間接造成㗎！收人四萬幾五萬蚊 (24hrs)，佢真係冇良心㗎！岩岩生完嘅媽媽真係有需要先至要請，但我簡直係貼錢買難受。
因為我早產左一個月，第二個月嘅時候我媽咪幫我坐月佢諗住繼續幫我，結果佢見到我嘅飲食係咁樣佢都好心痛，冇諗過請左陪月都會搞成咁。開刀生嘅我都有朋友話我知有嘢食得有嘢係唔識得，雞湯雞汁根本係冇問題。食嘢清淡但係唔可以寒涼。開刀傷口嘅食物禁忌佢更加冇理會過。點都好啦，已經過咗去，希望佢知道己所不欲勿施人做人，佢自己都有女有孫，咁自私同埋咁樣嘅態度佢真係唔適合做陪月。請各位準媽媽都要小心千祈唔好請着佢！
發表於 
返回列表
