少年成長今日: 0|主題: 16056

收藏本版

發帖

返回列表

跳至頁

查看: 3761 | 回覆: 0

暖男細佬 [複製鏈接]

csir3290

子爵府

積分: 12260

1^#

發表於 19-12-29 11:40 |只看該作者 |倒序瀏覽 |打印

趁幾日假期又一家人去咗個短線旅行，今次旅行其中最有印象係一家人第一次一齊浸溫泉。以前浸溫泉都係我同阿仔浸，家姐就同老婆一齊分開浸。就算係去混浴都要著住泳衣先至可以一齊浸，今次因為個溫泉係喺自己嘅酒店房入面，所以第一次可以一齊四個人浸喺個溫泉入面。開頭都擔心會有啲尷尬始終都係第一次四個都唔著衫一齊浸溫泉。但原來尷尬只係我哋大人覺得，阿仔阿女都唔知幾期待一齊浸溫泉，跟住玩下玩下大家有講有笑都唔知玩得幾開心，浸完溫泉一齊飲汽水食薯片睇電視，咁又過咗一晚。去旅行其中一個最重要嘅作用就係增加大家一齊溝通嘅時間，乜嘢都講。雖然大家好多時都係講啲無謂嘢，但係咁樣先至係最好嘅溝通。

喺今次旅程入面我哋又睇到細佬越嚟越懂得照顧家姐，細佬真係非常之錫家姐乜嘢都會等埋家姐，連買紀念品，甚至食粒糖咁簡單嘅嘢都要同家姐一齊做佢先至做。今次甚至幫家姐執埋嘢，所以我哋成日都會同家姐講細佬真係好錫你㗎，你更加要照顧架細佬。如果細佬第時對佢女朋友都係好似對家姐噤照顧，細佬應該好受女仔歡迎，連我都覺得佢應該係一個暖男。不過都係嗰句其實兩姊弟嘅感情真係好睇做父母喺佢哋細個時點樣幫佢哋培養，如果成日都只係大讓細又或者父母唔懂得用身教去教佢哋點樣去愛人，佢兩個嘅感情未必會咁好。

另外同佢哋去咁多次旅行，其實開始見到我哋平時嘅身教而家漸漸見到成效。最簡單每一晚返到酒店第一件事就係執嘢。而家佢兩個都好懂得每一晚沖涼嘅時間點樣將啲污糟衫點樣擺好，點樣執好個喼，亦都一定會執定曬第二朝要用嘅嘢，執好曬個背囊然之後先至做其他嘢。雖然唔係啲乜嘢大件事，但係好多嘢佢哋懂得自己做其實都幫輕咗我同老婆好多，其實呢啲生活小細節就係平時佢哋喺父母身上學返嚟嘅嘢。有一日搭搭吓火車，細佬見到個媽媽抱住個bb上車，細佬就第一時間同我講話要讓座畀佢哋，咁梗係我企起身讓咗啦。其實呢啲嘢平時我哋冇特別教，不過係我同老婆平時都會做嘅嘢，所以佢哋响我哋身上學返嚟亦都會主動咁做。做父母就係唔可以忽略自己生活嘅小細節，因為仔女就係喺我哋身上學呢啲細節學侍人處事。