少年成長今日: 0|主題: 16023

收藏本版

發帖

返回列表

跳至頁

查看: 3620 | 回覆: 1

適當時話事 [複製鏈接]

csir3290

子爵府

積分: 12081

1^#

發表於 20-3-1 11:28 |只看該作者 |倒序瀏覽 |打印

琴日同阿仔阿女行書店，佢兩個睇緊書嘅時候，我都自己睇下書，睇睇作聽到後面有對父女喺度講嘢，個女應該大約二三年班，阿爸就成日叫個女唔好咁大聲講嘢，咁其實佢兩個講嘢都幾大聲，主要係阿女不停問爸爸買邊啲書得，但係個爸爸就通常都話唔好。應該就係個爸爸同個女講叫佢入書局自己揀買乜嘢書睇，但係阿女揀乜嘢書個爸爸都話唔好，個爸爸可能嫌阿女揀啲書字少又或者係冇乜學術價值所以話唔好。佢個女揀書期間，佢老豆又會間唔中揀一啲書行埋去問阿女好唔好，但似乎佢個女對佢爸爸揀啲書都冇乜興趣。其中我聽到佢爸爸揀咗啲補充同埋㨂咗本教作文書畀佢個女睇。但係就同個女講話如果佢肯自己睇本作文書就應該會學到人哋點樣作文。又話叫個女自己讀本作文書畀佢聽，如果佢個女肯佢就會買一本佢個女自己揀嘅書畀佢。又同個女講如果肯做呢啲練習又會買多本佢鍾意嘅書畀佢。因為佢哋講得好大聲而間書局又明顯比平時少咗好多人，所以其實都有啲人望住佢哋，尤其是佢哋兩父女爭持不下嘅時候。

其實佢兩父女講嘅嘢都冇乜特別，因為好多家長都係用緊呢啲方法，即係等價交換你做一樣嘢我就另外買番一樣嘢畀你作為獎勵之類嘅方法。我就唔係好認同呢個家長嘅做法，我覺得佢係應話事唔話事，唔應該話事嘅時候就想話曬事。點解咁講，首先從成件事嚟睇佢個女應該平時都應該唔係好睇書，所以佢爸爸就成日話想佢喺停課期間自己可以睇多啲書，但係睇書呢啲嘢真係要講興趣同慢慢培養，你迫佢睇佢冇興趣嘅書都頭來其實佢只會越嚟越冇興趣，所以由佢之前唔係好睇書開始，你想佢而家睇就要畀佢揀佢自己有興趣嘅，字多字小號唔係問題，最緊要就有興趣，內容主題亦都唔係問題，我自己對仔女都係由佢哋自己嘅興趣開始，其實唔需要擔心，當佢自己睇多咗書，佢哋就會開始接觸唔同種類嘅書去睇。我成日覺得可能大人冇咁多時間睇書所以好多時都會將書本是為工具有需要時先睇，其實咁樣嘅諗法係好難培養細路仔睇書嘅興趣。所以重來睇乜嘢書揀乜嘢書嘅話事權都應該係個細路仔自己度。

另一方面到你要佢學嘢，其實咁細個嘅細路仔真係需要爸爸媽媽話事，呢個就係建立規律嘅開始。每一日要做啲咩嘢尤其是呢段停課期間個話事權就應該係父母身上。唔係話要迫佢做好多而係要幫佢細細個開始建立呢個規律，做多做少唔係問題。我唔係話要永遠由父母話事，而係當佢哋建立咗規律之後根本都唔需要個父母話事佢自己都會開始去學去做。我好相信學習係需要自律但係自律點嚟呢？就係由細細個開始父母幫佢慢慢建立。

現代嘅父母好多時都會問仔女好唔好，我唔係話咁樣係錯曬，但係唔好事無大小都問過仔女好唔好。有啲嘢係真係應該由父母話事，尤其是細個嘅細路仔。越細個父母話事嘅嘢就應該越多，到個細路一路長大，開始建立規律父母就應該開始放手。父母變成只係提供資料，由個細路仔自己作決定。我相信只要父母喺細路仔細個嘅時候肯建立一個榜樣同埋肯教佢哋，我相信細路仔大個嘅時候做錯決定嘅機會相對應該比較少。總之千祈唔好應該話事就唔話事唔應該話事嘅時候就想話曬事。