少年成長今日: 0|主題: 16023

收藏本版

發帖

返回列表

跳至頁

查看: 4176 | 回覆: 4

父親的角色 [複製鏈接]

csir3290

子爵府

積分: 12079

1^#

發表於 20-6-21 10:49 |只看該作者 |倒序瀏覽 |打印

今日就係父親節，但係一向父親節都比母親節冇咁受重視。我諗都係近呢十年八年先至多咗人去慶祝父親節，呢個可能都係同父親嘅形像有關。普遍都認為媽媽對仔女嘅付出多個爸爸，好可能都係源白小朋友通常都係靠媽媽照顧，而爸爸主要責任就係搵錢養家，所以小朋友一般都係親媽媽多啲，而且爸爸好多時嘅形像都係比較威嚴，亦都因為相對見面嘅時間比較少啲所以同仔女都有關係比較疏離。

但係今時今日做爸爸嘅角色真係比以前複雜咗好多，當然賺錢養家嘅責任依然都喺度，但係好似我老婆咁，其實佢都要返工所以搵錢養家嘅責任其實大家都咁重要，既然大家都要番工咁自然對仔女嘅付出都應該要一樣咁多，任何情況之下照顧仔女嘅責任都應該係同等重要同埋同等付出。返工搵錢同埋攰唔應該變成咗同仔女關係疏離嘅藉口，尤其是當自己做咗爸爸之後就更加體會到爸爸角色嘅重要。

正如之前講其實爸爸係比較威嚴，因為爸爸嘅角色其中一個好重要嘅作用我覺得就係作為仔女行為嘅規範標準。好多時仔女嘅是非觀其實都係嚟自爸爸。唔好以為要做到呢樣嘢只要惡同埋嚴肅就得，更加重要嘅其實係要自己做得好，做到仔女嘅榜樣。要能夠令到仔女信服，唔係真係靠惡就得。

守規則同埋規矩，我覺得好多時係透過同仔女玩嘅時候慢慢潛移默化教佢哋。另一方面，除咗要威嚴之外，我覺得其實做爸爸更加要學同仔女相處，除咗係佢哋嘅榜樣之外，亦都要係佢哋嘅玩伴最好仲有多多嘅幽默感。我好記得自己細個嘅時候我爸爸係我嘅榜樣，但係就真係相對好少時間可以陪我哋玩。我覺得做爸爸嘅更加需要擺時間落去陪伴小朋友，因為先天其實仔女已經同媽媽嘅關係比較親蜜，如果爸爸都唔透過陪仔女去玩同佢哋建立關係嘅話，關係只會越嚟越疏離。只係懂得惡同嚴嘅爸爸只會令仔女越走越遠，尤其是係小朋友細個嘅時候，因為當佢哋越嚟越大個，你想陪佢哋亦都變得越嚟越困難。我成日都會提醒自己要認識自己對仔女喜歡同埋鍾意嘅嘢唔可以同佢哋脫節，雖然有陣時返工都真係好攰，想多啲休息，甚或至乎自己都想打下遊戲機，但係時間始終都係自己安排，當你願意花時間陪仔女佢哋亦都會明白。除咗要惡得，仲要玩得，笑得，仲有攬得，要經常俾好多擁抱自己嘅仔女，令佢哋感受嚟自到爸爸嘅愛一樣都係咁深。

所以今時今日要做一個好爸爸真係唔容易，尤其係當自己都做咗爸爸之後就更加覺得今時今日爸爸嘅角色真係唔易做得好。父親節真係要好好同爸爸慶祝。