少年成長今日: 4|主題: 16033

收藏本版

發帖

返回列表

跳至頁

查看: 3344 | 回覆: 1

網絡欺凌 [複製鏈接]

csir3290

子爵府

積分: 12134

1^#

發表於 20-8-30 11:49 |只看該作者 |倒序瀏覽 |打印

自從停課之後兩姊弟呢就開始經常要喺屋企網上學習，學校為咗方便佢哋就幫佢哋開咗啲網上教室同討論區，本來一路都相安無事，直至到前幾日家姐同我講話有啲同學喺網上啲討論區度有少少嗌交，咁我睇下原來係佢啲同學只不過喺度爭拗一條題目嘅答案，大家都覺得自己啱有少少爭論啫，都唔算係嗌交。呢件事令我諗起家姐都差唔多讀中學，係時候開始要教定佢點樣處理呢啲網上爭執，尤其是可能會遇到嗰啲網上欺凌嘅問題。

我哋細個讀書嗰個年代邊有話乜嘢網上欺凌，因為根本連上網都冇，呢個年代真係複雜咗好多。我哋以前細個畀人蝦同屋企人講，最多都係叫我哋唔好同佢哋玩又或者同老師講，但係呢個年代如果係網上欺凌，可以無聲無息但係搞到個細路仔好唔開心。而且情況可以複雜好多，因為可以牽涉好多唔關事嘅人。呢個年代嘅網上欺凌可以由啲好小嘅事引起，好似家姐今次同我講呢啲情況大家各不相讓為咗少少事意見不合，總言之開頭都可以係啲小事。但係其實我自己諗好多時呢啲小事點解演變到越嚟越大呢？就係因為自己落唔到台，再加上身邊嘅朋友因為喺網上煽風點火，個個以為網上講嘢就唔使負責，可能開頭係一對一嘅鬧交，慢慢演變成可能係幾個對一個或者幾個對幾個，甚至乎都最後可能係幾十個對一個嘅嗌交。又因為以為網上面講嘢唔使負責任所以越講越大，甚至乎演邊度係粗口或者係恐嚇之類。

正正係因為呢一啲咁樣嘅網上嗌交網上欺凌可能開頭嘅時候都有啲嘅小事，所以而家就要教我哋細路仔，要明白如果喺網上面發表言論，就要接受唔係個個都會同意自己嘅講法。簡單啲嚟講即係每個人都可以喺網上面講嘢，你講得就預咗有人唔鍾意，有人唔同意自己嘅講法根本唔係一個重要嘅問題。我會教我個女如果遇到呢啲情況當然你可以解釋，但係要明白嘅係解釋亦都唔代表人人接受，冇必要做到個個都要接受自己，亦都更加冇必要為咗一啲睇法而演變到嗌交。我會同阿女講處理呢啲真論尤其是喺網上嘅，如果你不停咁喺度解釋只會沒完沒了，尤其是當各自都有啲朋友加入戰團嘅時候就更加唔能夠解決。所以我會教佢若果遇到呢啲情況，只要唔好再回應，自己唔好再加入戰團，當事主唔出聲嘅時候，個爭拗好快趣就會平靜落嚟。因為網上爭拗好多時連個事主都唔想爭拗，反而係佢側邊嘅朋友以為幫佢手就不停喺度講先至令到件事沒完沒了，反而個事主唔出聲大家亦都冇乜嘢可以再爭拗。

另一方面，網上面嘅爭拗其實係好難私底下解決，如果大家係朋友而為咗網上面有一啲說話就大家不停咁喺度爭拗唔明白自己，反而要諗下呢一啲唔明白自己不停喺度爭拗嘅人係咪仲係適合做自己朋友呢。

我會同阿女講如果呢啲討論區令到自己唔開心，最好嘅方法就係唔再睇，唔好加入爭拗，咁好快趣因為冇咗爭拗嘅焦點，呢啲爭拗就會好快脆平息。而唔睇亦都冇咁容易會令到自己唔開心。

可能有啲人會覺得咁樣係斬腳趾避沙蟲嘅方法，但只要明白網上面嘅嘢係可以沒完沒了亦都可以越嗌越嚴重，因為有啲人真係會覺得網上面講嘢係不需要負責任，咁自己先離開呢個戰團係最容易解決嘅辦法。

要處理網上欺凌或者網上爭論其實真係唔係咁容易，所以自細開始慢慢教佢哋，等佢哋開始對呢啲網上嘅爭拗甚至乎欺凌有防衛嘅意識，亦都知道點樣處理，其實係預防網上欺凌或者被欺凌最好嘅方法。