少年成長今日: 0|主題: 16018

收藏本版

發帖

返回列表

跳至頁

查看: 4942 | 回覆: 1

又要預備搵學校 [複製鏈接]

csir3290

子爵府

積分: 12051

1^#

發表於 20-9-20 11:47 |只看該作者 |倒序瀏覽 |打印

阿女今年六年班，又要進入另外一個搵學校嘅緊張階段。比起之前嗰兩次，即係揾幼稚園同小學嘅時候，阿女而家都已經大個咗亦都明事理，所以我哋都會畀佢知我哋希望佢入到邊類型學校，當然我哋唔係盲目咁同阿女講要佢一定考到啲乜嘢學校，係分析畀阿女聽以佢嘅成績可以點樣揀法，當然佢啱啱先至六年班都仲有機會，所以我都會一路幫佢希望佢盡力，我哋唔係要俾過多嘅壓力佢，而係希望佢知道以佢嘅能力係可以去到啲乜嘢學校，我總係相信以我哋兩公婆自細嘅培養，其實阿女係知道自己能力同埋自己想去邊一類型嘅中學，我哋只係鼓勵佢如果要達成目標就要努力同要盡自己能力。

記得以前阿女細個揾幼稚園同小學嘅時候，以呀女當時嘅年紀其實都唔係好知道點解要搵學校。我同老婆嘅共識就係唔可以畀到阿女有啲乜嘢壓力，所以雖然我同老婆都有啲目標嘅學校想阿女入到，但係我哋從來唔會喺呀女面前講。當時嘅阿女淨係知道因為唔同嘅階段就要搵唔同嘅學校，所有嘅小朋友都係一樣，阿女雖然知要面試，但係因為其他小朋友都係咁，所以亦都唔會有啲乜嘢壓力。更加我哋唔會喺面試之前先至特別話要同佢操練，我哋相信細路仔面試其實只要喺嘅日常生活入面有足夠嘅訓練同埋培養就可以。面試前先至操練反而會令到個細路仔更加感受到壓力，更加唔能夠輕鬆應對。另外一個好主要嘅原因係我哋好少喺阿女面前提到想佢考咩學校，就係因為要做最壞打算。好記得當時搵小學嘅時候要去到大抽獎階段。我同老婆都知道去到呢個階段好有機會派到一啲唔係我哋理想嘅學校。所以更加唔可以畀阿女知道或者感受到壓力，因為最壞打算係就算派得唔好，好可能阿女都要入個間學校讀書，所以我哋從來唔會喺個女面前講邊間學校好邊間學校唔好。當時我哋更加要喺阿女面前表現得平靜，等阿女知道其實搵學校係一個普通嘅過程，個個都要經歷。

最記得到放榜嘅時候真係派咗去一間我哋連揀都冇揀過嘅學校，我老婆當然好失望，但係返到屋企番到屋企我哋亦都表現得好平靜亦都冇即刻同阿女講派到邊間學校，所以阿女當時根本唔知放榜係一件乜嘢事。當時我哋只係同阿女講因為就嚟放暑假，所以我哋仲要面試多幾間學校，其實只不過係因為要去叩門所以要面試。其實我都要讚當時我老婆真係表現得好冷靜亦都已經計劃好曬預備點樣去叩門。我哋嘅打算就係如果萬一叩門都唔成功，最後先至會同阿女講九月開學會去邊間學校讀書，其實以當時阿女咁細過嚟講去邊間學校根本對佢自己嚟講根本冇乜大意義，意義只係家長身上，所以我哋一定唔可以畀阿女知道我哋唔鍾意嗰間學校，如果唔係阿女入去讀就會讀得好唔開心。到最後幸好阿女都能夠透過叩門入到我老婆最想佢入嗰間嘅津貼小學。總算平安大步檻過呢一個階段。其實我老婆嘅功勞先至係最大，我真係幾佩服佢當時嘅冷靜同埋喺整個搵學校階段嘅鋪排。

講到尾其實我覺得越細個嘅細路仔，搵學校嘅壓力其實最主要係來自父母，所以喺整個搵學校階段開始之前，其實父母應該先調整好自己嘅心態，尤其是應對一啲唔理想情況嘅時候要調整自己嘅心情。咁細個嘅細路仔嘅心情係最受父母影響，如果父母都唔能夠坦然面對放開心情嘅話，細路仔就更加唔開心，最怕係嗰細路以為自己做得唔好而令到父母唔開心。始終學校都係細路仔每日要返去面對嘅地方，如果父母唔能夠調整好自己嘅心情，細路仔又點樣去面對佢嘅學習生活呢！乜嘢學校都能夠有好學生同埋成績優異嘅學生出現，千祈唔好因為派出嚟嘅學校父母覺得唔理想而削弱細路仔嘅自信心。對於而家要面對細路仔搵學校階段嘅父母嚟講，我覺得最重要嘅就係平靜同冷靜面對，千祈唔好畀到壓力細路仔，細路仔越有壓力，佢去面試嘅表現就可能越唔好。