論盡家傭今日: 1|主題: 134027

收藏本版

發帖

返回列表

跳至頁

查看: 17229 | 回覆: 4

請海外姐姐中伏記（長文） [複製鏈接]

BerniceL

大宅

積分: 1391

1^#

發表於 21-5-30 05:04 |只看該作者 |倒序瀏覽 |打印

我尋日（定前日？！）回覆左一位jm要比4萬蚊請海外姐姐既post, 分享左我平佢好多，之後有幾位jm都問我點攪，我嘗試響呢度解答一下點解會平左。錢方面係咁計的：我係agency fee:10,000, 酒店揀最平果間用左11,000, 額外買野比姐姐食用左唔夠1, 000, 海外檢測費 800，保險 1,100兩年即係550一年，所以total cost within 24,000。如果各位jm既agency fee係大約15,000，咁你請一個海外姐姐來港點都唔會貴過3萬。
至於點解agency fee咁平，係另一個故事黎，其實我都係悲劇中伏女主角

事源...我請工人係因為有bb，本身係2小口子寫意生活左數年，有一日，有左，經商量之後家人同意幫忙湊，我生完繼續返工。好啦生完bb，經過前0後10，即係自己湊足2個月，之後復工1個半月，家人似乎有d頂唔住，始終湊初生壓力大又困身，所以我只有請工人，當時下決定請工人時bb 4個月大。
Agent係亞姨介紹，3x年前我表妹出世佢屋企就開始用工人，經驗豐富，而佢由唔知邊年開始就用定呢一間agency ，因為覺得負責佢果位職員（A小姐）跟得好，服務好，所以先後介紹左唔少朋友去，包括我媽同我，我媽響佢度都用緊第3個工人，亞媽又介紹左佢朋友。
因為我地可以叫做成個家族都幫襯緊佢，所以我既agency fee係discount 左既，第一次（之後就會知點解咁講）收費只係9,000蚊。
A小姐的確細心，佢比左好多人我揀，同我分析以我既情況同要求我應該點揀人，例如應該揀個有小朋友既（因為點都叫有生同湊仔經驗），菲（因為姐姐單拖湊b我要求佢係醒目有sense既人），請海外（我第一次請工人，個樣又一睇就知好淋善，本地既老油條會恰我地，所以寧願請個未黎過香港既自己關埋門教）。佢同我分析左3大條件之後，細項就我地自己慢慢再磨。但可惜果一期既人選都唔算適合，睇中左一個當晚就比其他人book左，基於我等唔到佢地下一批新人，所以響佢既介紹吓揀左而家呢個。其實都唔係最夾既人選，但佢覺得呢個姐姐係可給予機會，性格算乖又有禮貌，入到屋慢慢夾應該都可以。
Phone interview不過不失就簽文件請人比錢，話3個月左右就到埗，開始左之後漫長既等待。
等左2個月左右我公司大蝕錢炒左1/4人我係其中一個，因為計時間我等多個零月就有姐姐，所以打算自己湊b湊埋姐姐能夠獨當一面先再搵工都好perfect, 我就做左全職媽媽。
點知等吓一個月等吓又一個月，爆疫封關停飛炒埋一碟，姐姐一路都黎唔到，我理解。但當身邊既朋友請既海外姐姐都到埗，我就唔明點解得我果個未得，就開始追問，係等左7個月之後第一次追問進度。之後每個月問一次，得到既答案分別係：姐姐家鄉爆疫所以佢出唔到首都搭飛機/菲既海關未覆文件/香港呢邊未批...呢類，到等到第10個月我又例行追問，A小姐回覆佢已辭職，個案回歸公司，請我自行聯絡...我大驚，即時打落公司問我既case去到咩進度，佢地既另一個員工竟然覆我佢check 電腦睇到status係pending. 我晴天霹靂又嬲到震，pen咩ding姐，我等左10個月你地原來冇幫我proceed?! 衝左落佢公司理論，其實如果佢地答到我進度去左幾多成，仲要等幾耐，我都可能再諗下點，但佢地竟然話唔知幾時開始proceed變pending ，所以答唔到我到底仲要等幾耐...我最後要求退錢close case. 如是者結束我第一次請工人。
2個星期之後，情緒平復左，回歸現實係我都係要請工人湊仔...老公話如果果個姐姐仲係等緊我地請佢，未有新僱主，不如搵返呢個姐姐啦，佢無辜的，錯不在佢，我地點都要搵人幫手，與其下一個都係博一博，不如比多個機會大家...所以我又返去同佢講，我地想繼續請果個女傭，叫佢幫我問吓同攪手續。我踩上門果次心情雖火，但仍然理性有禮貌，而且出錯在佢地，今次我地肯回頭，佢地係樂意的。
令人無語既事再出現...佢過幾天覆我姐姐係available, 未有人請，點解呢？因為佢地根本冇同姐姐講我地已經中止左合約，姐姐仍然傻傻在等黎香港。
竟然仲會有一個比我更無辜既人。
我嘆氣之後同佢講我繼續請呢個姐姐，please proceed ！佢同我講，咁要比左錢先，今年加左價要比hkd 14,000.
呢下我真係著左火，我爆佢：我上年同你地公司請姐姐等左成年都未有，我足足一年冇返工冇收入，請姐姐由唔洗隔離到要隔離14日到而家要隔離21日，我要比多一倍成本，全部都係因為你地內部混亂有問題，你而家仲要收我萬四？！（我已經好難點得著火，但係真係忍唔到）
幾經討論，佢公司最後特。別。優。惠。收我一萬蚊。2個幾月之後姐姐到港，快係因為，佢地連香港入境處都冇通知我既中止合約，入境處竟然傻傻地繼續排我既外傭申請...姐隔離完21日，響我等左14個月之後，我做左一年ftm之後，bb已經識行識走黎緊讀n班之後，終於入屋。
姐姐仲未做夠2個月，暫時不過不失都叫ok, 我要求唔高，bb冇穿冇爛屋企乾淨煮到2個餸我就收貨。希望佢能做長d唔好轉頭辭職...我等佢黎仲耐過懷孕生仔...