美容扮靚今日: 2|主題: 137827

收藏本版

發帖

返回列表

跳至頁

查看: 8186 | 回覆: 22

D記黑心治療師涉嫌惡意燒傷客人 [複製鏈接]

mikamikamore

洋房

積分: 33

1^#

發表於 21-7-13 19:02 |只看該作者 |倒序瀏覽 |打印

小妹幫襯D記超過6年，難卜、硬銷都聽過唔少，但可能我一直都有幫襯開新生意，總體來講D記對我嘅服務都尚算合格。點知一次企硬唔幫襯就奶咗野，我畀佢哋個治療師燒傷咗。尼間公司成日換治療師，以前買幾多換咗人新來嗰個就係白做，所以新接手嘅治療師一定會落足嘴頭叫客人買新單，燒傷我尼位治療師由上年10月開始幫我，相處落都幾hard sell，工作需要我都理解，如果我有需要我都會幫襯，所以我第二三次見佢已經upgrade咗無痛無需敷冰嘅HPD雙波長bikini激光脫毛療程，當時我試完確實無痛先畀錢去update。
之後幾個月上去，尼位治療師都有間中sell我將其他部位都upgrade，我話bikini怕痛部新機唔痛我先upgrade，但其他部位我唔痛亦唔介意敷冰，加上舊plan有永久保養而新plan有次數限制，所以我唔考慮了。
直至出事嗰日，佢又再sell我upgrade全身，大約7萬幾，我好堅決同佢講真係唔考慮了，如果我有需要我會買，但我真係用唔到，唔通夾硬買？佢唔死心，開始呃呃氹氹，又話送尼樣送嗰樣，甚至提出我只需要畀手+腳嘅價錢，佢就幫我做埋全身（大家請留意，尼啲私相授受公司係唔會認數，所以千奇唔好貪小便宜信佢哋講）最後我都係拒絕咗，因為真係用唔到，送畀我我都係用唔到。
佢見我企硬唔買已經有些黑口黑面，開始畀說話我聽，話咩我講到咁你都唔肯買呀，又話我係消費者唔買佢都冇計之類。
之後佢就如往常一樣幫我做bikini嘅脫毛療程，一開機我就feel到特別熱又特別痛，已經不停大叫好痛佢都冇停，只是十分冷淡要我忍住。做完後我明顯見到bikini又紅又腫，我係一個有多年脫毛經驗嘅人，從未試過咁嘅情況，當時我已經懷疑燒傷，於是出去同佢講我唔舒服，佢個樣擺明嚇親似係擔心自己玩出火，一路講冇可能一路即刻拉我入房幫我敷冰降溫。我問佢係咪肯定用安全度數幫我打，點解聲稱無痛無需敷冰嘅療程，而家搞到我又痛又敷冰。佢突然冷笑住答我：唔通我因為你唔肯買新plan就特登整痛你咩？就係尼句此地無銀嘅說話，令我更加肯定，尼個黑心治療師玩野、特登整痛我。
而當晚我都有搵分店經理投訴，尼間分店嘅經理十分擅長卸膊，全程未有出現，最後推咗個所謂主任出來處理我投訴，當我問到假如真係畀燒傷，你公司會如何處理？會唔會賠償客人損失？嗰個主任仲話，小姐你身光頸亮唔似係貪小便宜之人，唔好諗賠償，最緊要係你個人冇事。自己員工涉嫌惡意燒傷客人，一句對唔住都冇，仲要暗示客人想攞著數，咁大間公司，啲主管嘅神級公關加道德標準都實在令人大跌眼鏡。
之後我去睇醫生，證實咗的確有燒傷，就開始咗漫長嘅索償之路。我幫襯咗尼間公司六七年，去到尼一刻先發現之前自己幾天真，間公司完全可以用無良、冷血來形容。
尼度我都想提提大家，萬一同美容中心發生糾紛，任何一次對話都要錄音，另外睇醫生最好睇皮膚科專科，要搵埋消協投訴，或者求助議員（例如袁x文）尼三樣野我全部都有做，但D記一開始都係唔肯退款，個經理第一次打畀我時仲話只會報銷醫藥費加退bikini部位剩餘次數而其他部位未做完嘅唔會退，又話歡迎我繼續上去做埋其他療程（態度輕佻語帶挑釁）一定要態度堅決，報銷醫藥費係本份，退回所有未用療程款項亦合情合理，我冇追討其他賠償都算放佢一馬，但尼間公司態度似係施捨一般。不過好彩我堅持同佢哋交涉，經理話退款佢話唔到事，我就叫佢搵話到事嗰個同我傾。再加send投訴信去佢哋cs部門，最後終於解決咗件事。
尼間公司永遠都會係我黑名單度，在此都溫提各位姊妹，一定要理性消費，遇到不公平對待一定要投訴表達意見，難卜、硬銷乜都好，唔鐘意就出聲，尼啲公司全部都欺善怕惡，企硬為自己爭取權益。另外其實好多皮膚科醫生都有提醒市民，私密部位嘅毛髮係有保護作用，唔一定要脫曬。將來我都唔會再有任何容貌焦慮、體毛焦慮，經過尼件事先發覺，健康安全先係最重要。