少年成長今日: 2|主題: 16026

收藏本版

發帖

返回列表

跳至頁

查看: 20123 | 回覆: 1

書包 [複製鏈接]

csir3290

子爵府

積分: 12098

1^#

發表於 21-9-19 11:28 |只看該作者 |倒序瀏覽 |打印

早兩日臨出門口送細佬返學嘅時候，突然間工人姨姨問我放學接細佬嘅時候可唔可以幫細佬拎書包。過多幾日佢又問我可唔可以幫家姐拎書包，因為佢話覺得家姐個書包好重，而佢又要孭住嚟搭巴士。原來細佬同家姐好聽話，因為我哋講過唔好畀個書包姨姨同佢拎，要自己孭返，所以佢哋返學放學嘅時候就點都唔肯畀個書包姨姨拎。可能姨姨覺得有啲為難，咁我就同姨姨講叫佢幫細佬拎個功課袋同埋食物袋啦，個書包就點樣都要佢兩個自己孭返。

其實我最開心嘅係估唔到佢兩個都咁聽話，都咁守規矩。細路仔嘅書包我從來都覺得應該係自己孭，就算幾細個都好，因為呢個係你嘅責任，如果佢覺得個書包重，唔係要人幫佢孭，而係應該要自己執好入面嘅嘢。最唔好嘅就係因為有人幫佢拎所以乜嘢都帶曬。我個仔講得好聽啲就係一個好小心嘅人，好多時都驚帶漏嘢，所以佢會將所有佢認為有機會要用嘅都帶返學校，搞到個書包鬼死咁重。唔好聽啲就係佢因為驚畀老師罰所以好多嘢都帶曬。除咗書包之外，仲要孭多一個功課袋同埋一個食物袋添。但係當佢自己要孭返個書包嘅時候佢自己就要去決定邊啲嘢要帶邊啲嘢唔要帶，如果決定唔到乜都要帶曬咁就算幾重都要自己孭返。呢個除咗係教佢負番自己嘅責任之外，亦都係教佢要整理自己嘅書包。

可能有啲人會覺得幫個細路仔拎個書包啫，都唔係好大件事點解要咁計較，但係凡事都應該係小處著眼，從小處就要教佢哋正確嘅價值觀。自細就已經乜嘢都係人哋幫曬佢，自己乜嘢都唔負責任，到大嘅時候佢又點知道邊啲嘢係需要自己負責嘅呢！如果覺得個書包重，唔係要家長幫佢解決咗個問題，係佢應該自己去解決問題。如果佢覺得樣樣都要帶嘅就更加要自己孭返個書包。

好多時都仲見到啲細路仔五六年班都仲係家長或者工人都仲要幫佢拎曬所有嘢去到學校門口，如果可以上埋班房可能佢哋仲會幫佢拎埋上班房添。咁樣唔好話教唔教細路仔要負自己嘅責任，淨係咁樣我都覺得好難睇啦！

今次另外一樣最開心嘅就係原來佢兩個都係咁守規矩，雖然我同老婆都唔喺佢身邊嘅時候，佢哋都仲記住我哋教嘅嘢。呢個亦都係我哋做家長嘅最需要教到小朋友嘅嘢，就係規矩唔係要有人睇住先至守，守規矩應該係一個態度，就算有冇人睇住或者會唔會備罰，都應該係要自動自覺守規矩，呢個就係自律同埋他律嘅分別。不過呢一種態度其實冇得用說話去教，真係需要家長自細就用身教佢教識細路仔自律守規嘅態度。但係好可惜而家嘅社會入面好多人都仲只不過停留喺他律嘅階段，想提升下一代嘅層次同埋質素，真係好需要有質素嘅家長一齊努力先得！