少年成長今日: 7|主題: 16033

收藏本版

發帖

返回列表

跳至頁

查看: 14073 | 回覆: 0

被動 [複製鏈接]

csir3290

子爵府

積分: 12121

1^#

發表於 22-11-6 10:27 |只看該作者 |倒序瀏覽 |打印

嗰日同阿女傾開偈講緊學校上堂嘅情況，忽然間我問阿女而家上堂仲多唔多同學舉手答問題，阿女話中學啦，其實都冇乜人舉手答問題通常都係老師叫名先至答。咁我問阿女佢自己有冇舉手答問題呢？阿女就話都間唔中啦！因為其他人都冇舉手，就算自己明明識，如果只係得自己舉手好似好奇怪咁！

自己諗下自己讀書嘅時候其實又真係好少舉手答問題，但係明明小學嘅時候大家都好鍾意舉手鬥快搶答，但係越大就越唔想，究竟問題喺邊度呢？另外唔知有冇遇過有啲小朋友，乜嘢都話唔知，乜嘢都唔想試，做嘢好冇自信呢？我有陣時去睇阿仔阿女上興趣班就會見到，有啲細路仔教練叫佢試一啲動作嘅時候通常都唔會主動行出嚟話想試，如果畀教練叫出嚟示範，仲要好唔願意或者覺得好尷尬咁，表現得好冇信心。最通常係企喺後面睇完一輪到最後教練要嗌名試嘅時候，先至不情不願咁行出嚟試，但係你睇到佢個樣其實係唔想嘅。

其實出現呢啲情況好多時都係因為細路仔自細已經開始累積挫敗感，冇乜成功嘅經驗。當佢越嚟越大個嘅時候覺得最安全嘅做法就係唔好試新嘢，又或者做嘢越嚟越冇信心驚失敗驚畀人話，所以連舉手答問題都唔敢。出現呢種情況嘅細路仔好多時都係因為喺成長過程中父母太在意成就，又或者經常忽視細路仔一啲小成功，但係當仔女做錯事或者係達唔到父母要求嘅時候，父母就會用一啲好負面嘅方法嚟處理。最多時就係講一啲負面嘅說話。又或者父母自己本身平日都係一個好負面嘅人，諗法或者講說話嘅方式都係比較負面，對仔女嘅期望都係比較負面嘅父母，好多時都總係覺得唔及其他人，甚至乎連自己嘅仔女都係唔及人哋好。慢慢連佢哋啲仔女都會習以為常，小朋友本身都沾染到父母呢啲嘅諗法。再加上細路仔都係傾向避免畀人話，既然父母諗法咁負面或者對成敗對錯睇得咁重要嘅時候，咁細路仔為咗避免被鬧或者處罰就會變得被動唔積極唔肯去嘗試新嘢。因為只要唔犯錯就唔會被鬧又或者只係做一啲自己好有信心做得到嘅嘢而唔去嘗試新嘅嘢。慢慢細路仔就會越嚟越被動只係懂得喺自己嘅舒適圈入面。正正好多華人細路仔嘅長大都係經歷緊呢個過程，所以當華人嘅細路仔一路長大嘅時候比起外國人嘅細路仔都好似被動啲亦都冇咁積極。其實好多時都係由於父母諗法嘅影響。最慘係呢一種被動同埋唔肯試新嘢嘅氣氛係會被傳染嘅，諗一諗班上面就算有一啲好主動嘅同學，但係始終都係少數而其他嘅同學都係唔唔係咁主動，慢慢主動啲嘅同學就會變成好另類。雖然未至於會比其他同學排斥，但係因為成個氣氛係咁，慢慢呢一啲比較主動嘅同學可能都會受到感染覺得主動會令到自己尷尬，不如變得被動啲費事畀人話自己高調或者博出位。但係正正就係呢啲氣氛窒礙咗細路仔嘅發展。

要避免細路仔慢慢變得被動唔肯試新嘢其實都係要由父母出發，唯有父母自細幫細路仔建立足夠嘅自信心，重視過程多多於重視成果，細路仔先至有機會繼續維持積極同埋主動。所以雖然有啲家長可能個人性格比較負面，但係為咗細路仔嘅成長，家長都應該逐漸學習正面同埋積極啲嘅諗法，咁樣對細路仔嘅成長先至有正面嘅幫助。時時都負面事事都先諗失敗，事事都係對細路仔冇信心，到頭來只係教出一個諗法負面被動同唔積極嘅細路仔。所以千祈唔好信上一代教細路仔嗰套，就係話細路仔讚得多唔好會驕傲，我明白家長亦都要教細路仔謙虛，但係根本就係兩個概念，你讚賞嘅係讚賞細路仔過程中付出嘅努力，亦都唔係教佢哋要去炫耀，所以同教佢哋做人要謙虛根本就唔會有抵觸。反而自細多啲嘅讚賞只會令細路仔更容易建立自信心。