少年成長今日: 0|主題: 16017

收藏本版

發帖

返回列表

跳至頁

查看: 18984 | 回覆: 0

好日都拎起本書温習 [複製鏈接]

csir3290

子爵府

積分: 12040

1^#

發表於 22-2-20 10:59 |只看該作者 |倒序瀏覽 |打印

講到長假期容易產生磨擦，另一個高危就係父母平時要返工到長假期多咗時間喺屋企對住個仔女，就會發現佢哋成日唔溫書甚至乎係整日都揸住部手機。好多父母都會講自己嘅仔女成日都唔溫書，好日都唔見佢哋拎喺下本書或者做功課，問親佢哋就話做曬或者冇嘢溫。父母眼中仔女得閒唔溫書就係篤眼篤鼻，如果再加上成日揸住部手機就更加眼火爆，所以農曆新年長假期為咗呢樣嘢真係好容易就會引發親子衝突。

其實溫習習慣又真係要自細培養，好多時家長因為平時都返咗工根本就唔會理得到仔女喺屋企點樣溫習，亦都冇刻意點樣去培養佢哋溫習嘅習慣，家長總係會覺得仔女自己喺屋企總之做曬啲功課就叫做完成，因為好多家長放工返到屋企都未必會再有時間去睇仔女嘅功課。咁幾時先發現問題呢？一係就係考試成績差，一係就係老師聯絡家長有關仔女啲功課嘅問題，但係去到呢個地步，其實仔女嘅生活習慣好多時都已經成晒形要改又係要用多好多時間先可以。所我哋自細開始就刻意幫對仔女建立一套溫習習慣，因為唯有自細幫佢哋養成習慣，到佢哋長大先至會自己去完成。

細個嘅時候除咗每日放工都會睇佢哋啲功課，了解佢哋功課嘅進度之外，逢佢哋放假亦都會畀適量嘅補充練習佢哋做，就算我哋返咗工佢哋放長假嘅時候，都習慣咗要佢哋每個早上都會用大約一個鐘頭嘅時間嚟完成啲補充練習作為溫習，慢慢佢哋就養成到就算放假都好，朝頭早都係佢哋溫習同埋練習嘅時間，包括完成大約一個鐘頭到嘅溫習同埋練琴，總之呢個就已經成為佢哋嘅生活習慣，當然每日放工返嚟都會睇佢哋完成嘅練習，等佢哋知道其實父母係緊張佢哋嘅學業亦都知道佢哋嘅進度大約係點。當佢哋由幼稚園開始一路到小學都養成呢個習慣，而家到家姐讀中學我都已經冇額外再畀練習佢做，但係佢都習慣咗每天都要溫習，睇返當日教過嘅嘢，同埋做返佢之前唔識做嘅功課。家長要知道溫習同做功課對於細路仔嚟講其實唔係一樣受歡迎嘅嘢，邊有細路仔會寧願放棄玩而主動去溫習呢！唯有自細開始幫佢培養習慣就好似返工一樣，當溫習成為佢自己嘅責任同埋習慣，咁佢哋先至會主動去完成。所以溫習習慣其實係需要家長自細幫佢哋培養。

另外又係嗰句成日揸住部手機，其實好多家長自己放假何嘗又唔係成日揸住部手機呢！講到最尾其實咪就係因為個細路仔冇其他生活興趣，而且手機嘅遊戲或者社交平台就實在太吸引，所以佢哋咪會經常揸住部手機。所以家長要有備無患只細要幫佢哋培養唔同嘅興趣，自細就要習慣同佢哋四圍去仲要同佢哋玩，盡量減少以手機作為娛樂嘅方法，擴闊佢哋嘅眼界培養同佢哋嘅感情。我對仔女到而家去到長假期都一定會同我哋兩個出街四圍去，而佢哋又實在太多其他興趣，所以手機對佢哋嚟講都仲只不過係一種工具，都有嘢唔明或者要搵資料嘅時候佢哋就會攞部手機出嚟google一下，又或者我個仔會鍾意用手機嚟睇新聞或者其他有趣嘢然後同我哋分享，基本上除此之外佢兩個都好少會揸住部手機。

所以家長如果要減少呢啲磨擦，就應該要自細開始用時間心機去培養自己嘅細路仔生活上嘅呢啲習慣。當然自己嘅心情亦放開一啲，同仔女嘅關係就係不知不覺嘅磨擦中越來越越疏離。