每逢過時過節我都好鬱悶, 因為又要同細佬妹一齊食飯. 細佬已婚, 細妹單身. 我地三姐弟妹都上晒年紀. 本來同細佬關係唔差, 不過自從社會事件後各自思想轉變而家好怕同佢傾計. 細妹無政治立場, 但佢自細性格係好強, 鍾意安排(甚至控制)其他人嘅行為. 父母在生時我唔希望家嘈屋閉所以習慣性唔同佢拗, 盡量配合. 呢種心態到今時今日父母已不在但我改唔到.
細妹自己一個人住所以時間安排上好容易, 但我一家幾口有時就比較麻煩. 細妹揾屋住突登近我屋企, 佢話咁樣一齊出去食飯時我地就可以接送埋佢. 本來我無所謂, 但佢次次都要我喺指定時間地接佢, 遲咗就鬧點解唔早D出門口, 點解行條塞車嘅路.?!.... 我其實都會同C6 & 仔講叫佢地盡量配合一下, 但佢地會鬧返我, 點解咁就佢(我妹)? 叫幾點就幾點. 我地要返工, 有時收工講唔埋. C6話唔明點解我咁驚, 點解唔照直講?! 我無試過好好地解釋咩? 我妹鬧我無用, 少少事都安排唔到, 點解控制唔到老公同仔?? 佢地唔配合應該鬧到佢地配合. 驚收工遲就應請半日假 / 同上司講早D走…..etcetc. 我兩面不是人.
睇到呢度相信好多人會咬牙切齒講: ”理鬼佢吖”….”叫佢自己去囉”…..”鬧返佢轉頭, 而家邊個求邊個呀?!”…”叫佢自己同你老公&仔講吖嘛!”. 第一, 我試過, 結果細妹鬧咗姐夫一大餐. 第二, 我妹會話: “點解我要同佢地講呀! 你屋企人梗係你去面對啦!”. 當然, 我可以發爛渣以後唔一齊食飯, 唔好見面, 咁一定解決所有事. 我認失敗, 我做唔到!!!! 幾十歲喇, 都係咁怕事.
發表於 
返回列表
