少年成長今日: 0|主題: 16038

收藏本版

發帖

返回列表

跳至頁

查看: 19158 | 回覆: 0

建立姊弟關係 [複製鏈接]

csir3290

子爵府

積分: 12168

1^#

發表於 22-2-27 11:29 |只看該作者 |倒序瀏覽 |打印

呢輪兩個小朋友都要喺屋企網課，又因為抗疫所以兩個都冇得點樣出街，盡量都係留喺屋企。幸好佢兩個都成日自己一齊玩，所以都冇咁悶。講開玩，早兩晚就見到佢兩個因為呢輪睇咗套講醫生嘅電視劇，所以佢哋呢期就會兩個成日扮醫生，細佬仲自己用紙做咗好多醫生工具出嚟玩，然之後就叫埋家姐一齊玩。又難得個家姐都已經中一啦！都仲肯同個細佬一齊咁樣玩法。嗰晚就係咁樣兩個匿咗喺睡房扮手術室就玩咗成晚。呢幾日佢哋又突然間鍾意咗玩射箭，兩姊弟就係咁自製啲弓箭不停喺度玩呀玩呀，咁又玩咗幾晚。其實佢兩姊弟感情都真係幾好，成日都一齊玩，細佬仲好鍾意叫埋家姐一齊玩。幸好真係家姐雖然已經中一，但係都仲好樂於同細佬一齊玩埋啲無聊嘢。而且佢兩個真係好少好少爭執，細佬仲會成日讓家姐添。

其實講開兄弟姊妹嘅感情，雖然有啲老一輩嘅人可能覺得呢啲係緣份，但係我總係覺得其實兄弟姊妹間嘅感情其實同父母有直接關係。真係見過好多兄弟姊妹之間嘅感情其實係由父母一手摧毀。好似講得好嚴重咁，但係其實好多時真係父母有意無意間做咗好多嘢間接咁令到兄弟姊妹嘅感情慢慢咁被破壞。好多人會講兄弟姊妹間其實就係喺父母身上爭取資源，呢啲資源可能係食得好啲，多啲玩具甚或至乎多啲嘅注意或者關顧。點樣平衡當中嘅關係，點樣幫兄弟姊妹間建立感情其實都係要父母自細去教佢哋同埋幫佢哋培養。

其中一樣我經常提醒自己唔可以講嘅就係要大讓細，講真好似我個仔同阿女咁，相差都唔夠年半，做大嗰個又點會咁容易明白要照顧同埋要讓細佬呢！如果一齊做錯事嘅時候，但係大嗰個要罰多啲又或者乜嘢都要就曬個細嘅，咁只會令到大嗰個越嚟越唔鍾意細嗰個。所以做家長絕對要平衡當中嘅利害。

另外講到想佢哋一齊玩唔好爭玩具，家長嘅責任就更加唔可以少，我覺得最重要就係自細就要教佢哋點樣一齊玩，唔係得個講字，而係父母邀請佢哋細個嘅時候同佢哋一齊玩，喺細個同佢哋一齊玩嘅時候，等佢就兩個學習一齊玩先至係最開心嘅，父母亦都要從中教佢哋一齊玩嘅技巧，包括一齊分享玩具嚟玩，亦都令佢哋體會到一齊玩嘅開心。如果自細只係不停俾玩具佢哋或者淨係畀部手機佢哋各有各玩，咁佢哋又點會懂得一齊去玩呢？佢哋只會覺得自己霸曬啲玩具先至係最開心嘅。家長好多時最大嘅問題就係得把口叫佢哋自己一齊玩，或者當兩個爭執嘅時候，就話其中一方霸曬啲玩具點解唔可以一齊玩呢啲說話。越細個嘅細路仔就越唔懂得乜嘢叫做分享，其實佢哋係需要家長落手落腳透過經驗去學習乜嘢叫分享。

有啲家長成日話驚生一個小朋友個細路仔會悶，希望有啲兄弟姊妹陪下佢，但係小朋友唔係生出嚟就識得陪另外一個，感情係需要培養。如果唔想生咗出嚟之後兄弟姊妹間只係懂得喺父母身上爭取資源而令到佢哋嘅感情越嚟越差，父母就要襯佢哋細個嘅時候用多啲心機同時間幫佢哋建立感情嘅基礎，所以父母千祈唔可以睇輕陪玩嘅重要性。

我相信兄弟姊妹關係感情可能好一部分都係天生嘅，但係其實後天父母只要肯用心機同時間絕對係會幫到一個非常大嘅忙。好多兄弟姊妹間嘅爭執同埋破壞感情嘅事，其實唔多唔少真係同父母有關，所以我先至話好多兄弟姊妹間嘅感情其實係由父母一手摧毀嘅。