少年成長今日: 0|主題: 16047

收藏本版

發帖

返回列表

跳至頁

查看: 16904 | 回覆: 1

怕英文 [複製鏈接]

csir3290

子爵府

積分: 12213

1^#

發表於 22-3-13 10:49 |只看該作者 |倒序瀏覽 |打印

早幾日同個同事傾開點樣幫細路仔學英文，因為佢個仔已經中四但係英文嘅分數好低，又比老師投訴冇心機上堂，佢有啲擔心佢讀上去驚佢考唔到大學。

我細個英文嘅情況都唔好，其實而家都唔係太好。細個我直情係怕英文，因為覺得學極都唔識，同埋根本就覺得唔係好需要用，直至到讀大學同埋出嚟做嘢嘅時候先至開始知道英文有幾重要，不過我嗰陣時要追始終都係覺有啲遲。其實同好多英文成績唔好嘅細路仔一樣，當時根本就覺得英文冇乜用，再加上少接觸，家長就更加唔識教自己，所以細個一路睇住張成績表都知道自己英文成績唔好，阿爸阿媽亦都冇能力畀自己去補習，更加唔好話有啲咩方法教到自己啦！所以一路對英文都係半放棄狀態，只不過越讀越高班就知道英文唔合格冇得再升上去，先至叫做盡下人事，最終總算好彩符符碌碌咁過咗關。

其實自己從來都知道英文係需要時間去浸，要浸嘅話就根本冇可能急得嚟。所以自己做咗家長就好刻意幫阿仔阿女多啲去接觸英文，當然我哋未至於話喺屋企都要同阿仔阿女講英文啦！但係我哋知道只有接觸得多佢哋先至會覺得英文唔困難，同埋細路仔十歲以前都係學語文嘅關鍵期，只要經常畀佢哋接觸其實佢哋要學根本唔係咁困難。

其實中國人學英文最困難嘅唔係學文法，最困難嘅係因為聽得唔夠多，講得唔夠多同埋用得唔夠多。針對呢幾樣嘢，聽同講其實可以利用多啲睇英文節目，細路仔細個識鍾意睇卡通片，透過睇英文卡通唔用字幕其實細細個佢哋會開始慣聽英文，不過我始終覺得唔好只係畀佢哋自己睇，間中都要陪佢哋一齊睇，亦唔好俾佢哋倚賴。而家我對仔女已經好慣睇外國嘅電視劇同埋卡通片，根本連字幕都唔使用，再加上佢哋因為有好多興趣，佢哋都會喺youtube搜尋啲同自己興趣有關嘅短片睇，而呢啲短片大多數都係外國拍嘅所以聽英文對佢哋嚟講根本就唔係問題，因為由興趣主導所以佢哋會主動去聽。另外嘗試畀佢哋讀下啲簡單嘅英文書，細個我就一定會帶阿仔阿女每兩個禮拜去一次圖書館，除咗中文書之外一定借同樣份量嘅英文書，每日都要同佢哋一齊睇，仲要同佢哋一齊讀，讀嘅意思係要讀出聲，等佢哋慣講英文亦都唔介意喺人哋面前講。越大個嘅細路因為佢哋少講英文就只會越嚟越怕喺人哋面前講，但係只要佢哋細個慣讀英文，當然家長未必一定需要好執著佢讀得啱定錯啦！最緊要佢哋肯去試讀等佢哋慣咗讀，同埋給予適當嘅支持同讚賞，細路仔就會好樂意咁樣去講英文。當然如果能力許可，畀佢哋去讀下啲拼音班其實幫助亦都好大，如果識拼音再加上成日睇英文書亦都嘗試去讀，其實就算有啲字本身佢哋未必識但係都可以透過拼音嘗試學點樣讀。學語文都係一樣越細個開始學習越好，再加上多啲嘅成功感自自然然就會有進步。

我同我同事講佢個仔都已經中四，好多嘢都係由基礎唔好所以造成，再加上咁耐以嚟累積嘅挫折感同無力感，要改善真係要落好多心機。除咗補習之外，我提議佢可以嘗試做返啲淺啲嘅補充練習，即係佢而家中四可以嘗試下做啲中一中二嘅。因為根本就係基礎唔好，如果再做啲難嘅其實只會越嚟越冇成功感，與其做極都唔識不如做啲淺嘅開始，等佢慢慢搵番啲成功感覺得唔係困難，然之後習慣睇多啲英文嘅媒介，書又好電視電影又好，希望佢慢慢可以搵返啲興趣。

我覺得學語文最緊要就係興趣同埋成功感，要令佢哋覺得嗰樣嘢有興趣有用同埋有成功感，佢哋先至會肯用時間慢慢去浸，其實做幾多練習未必最有用，因為佢唔覺得嗰樣嘢喺日常生活入面有用。正如我對仔女學好英文對佢哋嚟講係接觸佢哋興趣，同埋喺日常生活佢哋會用到，所以佢哋根本就唔會抗拒英文。所以如果希望細路仔可以學好語文，其實真係要幫佢哋造就一個可以用到，同埋有興趣嘅環境，佢哋先至會容易咁學到。如果好似我咁，自細就已經怕咗英文，到大個其實咪就係因為覺得要用，所以先至會死死地氣擺啲心機落去學，但係人大咗先至學始終畀起細路仔去學校果真係冇咁好。