少年成長今日: 1|主題: 16112

收藏本版

發帖

返回列表

跳至頁

查看: 20486 | 回覆: 2

家長日 [複製鏈接]

csir3290

子爵府

積分: 12590

1^#

發表於 22-4-10 11:13 |只看該作者 |倒序瀏覽 |打印

昨日阿女學校家長日，都係循例講下阿女喺學校嘅成績同埋情況，其實阿女讀書一向都冇乜問題，但係冇諗到老師同我哋講話阿女全級考第二，仲要讚阿女平時上堂好留心對自己亦都要有要求，真係冇諗過阿囡會考得咁好。咁當然梗係要大大力咁讚賞佢啦！其實阿女讀書一向都唔使我哋點樣擔心，因為而家中學好多嘢佢都自己搞掂，都係因為細個嘅時候所養成嘅生活習慣。

其實我主要唔係要講阿女嘅成績，反而係真心佩服我老婆幫阿女揀學校嘅策略。阿女而家讀緊呢間學校，佢能夠應付到之餘亦讀得開心，都係因為我老婆同佢揀學校嘅策略成功所致。阿女而家讀緊嘅呢一間學校喺區入面雖然都係band one嘅英中，但係並唔係成績最好嗰間，我老婆成日講如果以區入面嘅排名嚟講應該係第二或者第三度。其實以阿女當年小學嘅成績應該佢係可以再考高一格嘅中學，因為喺呀女間小學入面比佢排名低啲嘅同學仔都入到排第一個間。但係正正就係因為我老婆覺得唔想阿女讀得咁辛苦，而果間中學亦都出名係成績要求高之餘亦好重視競爭，個個都要爭入精英班，所以我老婆驚阿女入咗去讀嘅時候壓力會大而且驚佢會有好多挫敗感，所以就幫阿女揀咗而家呢間中學，而以阿女嘅成績亦都順利入到呢一間中學。其實我當時都有少少介意，覺得點解唔幫阿女搵最top嗰間，我同好多家長嘅心態都係一樣，梗係希望阿女讀出名啲嗰間啦，但係經過老婆解釋同埋自己都想阿女讀得開心啲，所以最後都係尊重老婆嘅決定。正如我成日都講細路仔學嘢係需要成功感，同埋需要學得開心，如果經常處於一個高壓力嘅環境而個競爭性又咁大，再加上如果冇乜成功感嘅話，咁佢就算讀到最叻嗰間都未必會有好嘅成績。雖然而家佢唔係讀緊區入面最出名成績最好嗰間，但係阿女而家讀得開心，佢又鍾意呢間學校，最重要係佢覺得自己能夠掌握到同埋應付到學校嘅學習，咁似乎我哋當初都冇為佢做錯呢個決定。

可能有啲家長會覺得揀學校梗係要揀成績最好，要配合自己仔女成績甚至乎要揀高一格嘅學校咁先至係對仔女嘅前途最好，除咗覺得對仔女好之外，當然自己亦都覺得會有面啲，但係究竟點樣先對仔女最好，其實都要還原返最基本嘅問題，就係究竟佢點樣先至係讀得開心同埋應付到。真係見過好多細路仔入咗去啲所謂名校，但係因為入面壓力同埋競爭實在太大，最後因為唔適應而搞到成績一落千丈，再加上父母嘅唔了解，最終以為係幫咗個仔女其實點知係害咗佢。我唔係話我老婆呢個簡校嘅策略係適合於每個人，只係話家長幫仔女揀學校嘅時候真係要要考慮清楚，而且係要喺仔女嘅立場去考慮先至啱。