少年成長今日: 2|主題: 16048

收藏本版

發帖

返回列表

跳至頁

查看: 14959 | 回覆: 1

細路仔係咁㗎啦！ [複製鏈接]

csir3290

子爵府

積分: 12215

1^#

發表於 22-6-5 10:53 |只看該作者 |倒序瀏覽 |打印

有一種家長無論細路仔做錯乜嘢事影響到人都好，最鍾意就係以講「細路仔係咁㗎啦！」嚟做擋箭牌，要人哋就佢嘅細路仔，就算明明係自己嘅細路仔有錯都用呢句說話嚟要人哋相就，令到自己個細路仔以為就算影響到他人或者做錯事，都係應份嘅，因為佢哋係細路仔，所以係咁㗎啦。

上個禮拜喺商場食飯，喺餐廳望出去就係一間好多人排隊嘅食肆，忽然望到兩個應該係兩姊弟都係五六歲咁上下嘅小朋友，走咗入去人哋間賣衫嘅地方玩迷藏，仲要撥開人哋掛喺度嘅衫匿左上啲櫃度，售貨員可能掛住招呼其他人又冇乜特別留心，再望一望以為佢哋嘅父母都係喺間服裝店入面，原來佢哋嘅父母係喺出面等緊位，當然等位嘅時候佢哋嘅父母就顧住睇手機，由得嗰兩個細路仔喺度自己玩。嗰兩個細路仔玩到入咗去人哋舖頭個父母都唔知，直至到售貨員開始留心到嗰兩個細路仔，其實售貨員都好有禮貌都係叫兩個細路仔唔好再咁玩，第一次提嘅時候嗰兩個細路仔即刻走返出去搵阿爸阿媽，佢哋當然冇出聲啦，但係因為對阿爸阿媽繼續喺度玩手機又冇乜點理佢哋，過咗一陣對細路仔又走返入去間服裝店繼續玩，今次可能個售貨員都覺得佢哋玩得有啲過份出聲話佢哋，對細路仔可能嚇到即刻走返出去搵老豆老母，因為佢哋就喺門口附近售貨員都出去同佢父母講，話畀佢哋聽佢細路仔喺度咁樣玩法，對父母可能落唔到台又係用嗰句說話同售貨員講細路仔係咁㗎啦，做乜要咁惡話佢哋，喐啲仲話要投訴。我見到個售貨員有啲無奈，返入去自己鋪頭就算數。對父母都仲要繼續喺門口喺度話，最好笑係我見到佢細路仔呢後面偷笑。

我真係好憎啲父母郁啲就講「細路仔係咁㗎啦！」呢句說話，用呢句說話嚟掩飾自己嘅責任，用呢句說話呢轉移他人嘅視線，將自己仔女嘅過錯，變為他人唔體諒佢嘅細路仔因為年幼而做錯事，責任變成人哋而唔係自己。其實對住呢啲家長真係冇嘢好講，如果要反駁嘅我覺得唯有可以同佢哋講「冇錯細路仔係咁㗎啦！因為就係你哋呢啲父母教到佢哋咁㗎啦！又唔見其他有家教嘅父母佢哋嘅細路仔係咁㗎啦！」會用「細路仔係咁㗎啦！」呢句說話嚟做藉口嘅家長，根本佢哋就唔識教自己嘅細路仔，就係佢哋嘅唔識教同埋冇家教先至教到啲細路仔係咁㗎啦！所以同呢啲家長講道理根本就係冇用，因為根本就係不可理喻不懂反思，又或者只係攞呢句說話嚟遮醜，點解可以用呢一句說話嚟做藉口仲要講到咁大聲呢？根本就係唔識得教仔，但係又落唔到台，難聽啲講就係極度嘅自卑變成極度嘅自大以為大聲就真係代表自己啱。

有家教嘅家長絕對會知道「細路仔係咁㗎啦！絕對係因為自己教成咁㗎啦！」細路仔有陣時做錯事絕對係嚟自家長嘅管教方式，如果家長自細就教細路仔唔好騷擾人哋唔好影響到他人，要顧及他人嘅感受。當佢哋騷擾到人嘅時候絕對係會教佢哋第一時間要同人哋道歉，而唔係反而要人哋就佢哋嘅仔女。我成日都講細路仔根本就係白紙一張，佢點樣待人處事，有冇家教絕對係由家長一手造成，「細路仔係咁㗎啦！」只不過係由家長教成咁。我相信有家教嘅家長絕對唔會輕易將呢句說話講出嚟，因為有質素嘅家長絕對唔會輕易用一句說話就去概括自己細路仔犯錯嘅原因，有質素嘅家長絕對會教自己嘅細路仔做錯事嘅時候就需要承擔責任需要同人道歉。所以遇到呢一類經常用「細路仔係咁㗎啦」呢句說話做擋箭牌嘅家長真係同佢講多都嘥氣，因為以佢哋嘅質素根本就唔理解人哋嘅諗法，唯一可能有少少可惜嘅就係佢哋嘅仔女喺佢哋呢啲家長咁樣教導之下，佢哋成長一定受到好大嘅影響。一句「細路仔係咁㗎啦！」只係反映緊家長自己嘅質素，講之前真係要三思！記住細路仔點解會係咁㗎啦！就係因為家長教成咁㗎啦！